ព័ត៌មានជាតិ

លោកស្រី ជា សិរី៖ បណ្តាញទូរសព្ទជាមធ្យោបាយជួយជំរុញសេវាហិរញ្ញវត្ថុដល់តំបន់ជនបទ

បានផុស

៤ years មុន

នៅ

ថ្ងៃសៅរ៍ ២២ តុលា ២០២២

ដោយ

លោកស្រី ជា សិរី ឧបការីទេសាភិបាល និងជាអគ្គនាយកបច្ចេកទេស ធនាគារជាតិនៃកម្ពុជាបានមានប្រសាសន៍ថា ប្រព័ន្ធទូរសព្ទដៃ គឺជាមធ្យោបាយមួយដ៏ប្រសើរក្នុងការជួយជំរុញសេវាហិរញ្ញវត្ថុទៅដល់តំបន់ជនបទ ខណៈការប្រើប្រាស់សេវាហិរញ្ញវត្ថុនៅមានកម្រិតនៅឡើយ ។

ថ្លែងប្រាប់អ្នកសារព័ត៌មានក្រោយពិធីចុះហត្ថលេខាលើអនុស្សរណៈនៃការយោគយល់គ្នារវាងគណៈកម្មការចំពោះកិច្ចចាក់វ៉ាក់សាំងកូវីដ-១៩ ក្នុងក្របខណ្ឌទូទាំងប្រទេស និងធនាគារជាតិនៃកម្ពុជាស្តីពី “កិច្ចសហប្រតិបត្តិការក្នុងការប្រើប្រាស់តំណភ្ជាប់សម្រាប់ស្វែងរកមើលព័ត៌មានចាក់វ៉ាក់សាំងកូវីដ-១៩ របស់សាមីបុគ្គលតាមរយៈប្រព័ន្ធបាគង”កាលពីថ្ងៃទី២១តុលា លោកស្រីបានបញ្ជាក់ថា ការជំរុញការប្រើប្រាស់សេវាហិរញ្ញវត្ថុតាមរយៈទូរសព្ទដោយសារបច្ចប្បន្ននេះមានអ្នកចុះឈ្មោះប្រើទូរសព្ទប្រមាណ២១ម៉ឺននាក់ក្នុងចំណោមប្រជាជន១៦លាននាក់ គឺលើសពី១០០ភាគរយ ដែលមានប្រើទូរសព្ទដៃ។

លោកស្រីបានបន្តទៀតថា ដោយមើលឃើញពីបញ្ហានេះហើយ ទើបយើងចង់ជំរុញបរិយាប័ន្នសេវាហិរញ្ញវត្ថុបន្ថែមតាមរយៈទូរសព្ទ ខណៈបច្ចុប្បន្ននៅមានកម្រិតទាបនៅឡើយដោយមានប្រហែល៥០ទៅ៦០ភាគរយប៉ុណ្ណោះនៃប្រជាជនសរុប១៦លាននាក់ដែលបានប្រើប្រាស់សេវហិរញ្ញវត្ថុផ្លូវការ។

លោកស្រីបានបន្ថែមថា« ទូរសព្ទដៃមានគ្រប់តំបន់ហើយយើងត្រូវធ្វើយ៉ាងណាដើម្បីជំរុញសេវាហិរញ្ញវត្ថុទៅដល់អ្នកប្រើទូរសព្ទ។ នេះជានិន្នាការមួយមិនមែនមានតែនៅប្រទេសកម្ពុជានោះទេសនៅលើពិភពលោកជាទូទៅក៏ជំរុញតាមរយៈប្រព័ន្ធទូរស័ព្ទនេះដែរ»។

លោកស្រីមើលឃើញថា«ទៅថ្ងៃខាងមុខនៅពេលដែលមានការវិវត្តន៍បន្ថែមសឹងតែថា អាចថ្ងៃណាមួយមិនមានសាខាធនាគារឬគ្រឹះស្ថានមីក្រូហិរញ្ញវត្ថុនិងមានមនុស្សធ្វើការទៀតហើយគ្រាន់តែមានទូរសព្ទមួយ អាចទូទាត់បានគ្រប់បែបយ៉ាងហើយបើទៅមុខទៀតមានតែមុខមនុស្សយើងអាចស្កេនក៏អាចចាយវាយបានដែរគឺនៅពេលយើងចូលទៅហាងណាមួយគ្រាន់តែយកមុខយើងឈរនៅខាងមុខហាងស្កេនទៅអាចទូទាត់កាន់តែងាយស្រួល។ជាក់ស្តែងទៅប្រទេសសាំងហ្គាពួរចង់ដើរកាត់កន្លែងប៉ូលីសអន្តោប្រវេសន៍គឺគេមើលតែមុខយើងទេ»៕ អត្ថបទ៖ សំអឿន