ព័ត៌មានជាតិ

លោក វ៉ា ថន អញ្ជើញចុះពិនិត្យនិងជំរុញលើកទឹកចិត្តដល់កីឡាករចំណុះទូក-ង-ទាំង ២៦ទូក

បានផុស

៤ years មុន

នៅ

ថ្ងៃសៅរ៍ ២២ តុលា ២០២២

ដោយ

នារសៀលថ្ងៃទី២២ ខែតុលា ឆ្នាំ២០២២ លោក វ៉ា ថន អភិបាលខេត្តក្រចេះ និងលោកជំទាវ គណៈកម្មការរៀបចំការប្រណាំងទូក អញ្ជើញចុះពិនិត្យជំរុញលើកទឹកចិត្តដល់កីឡាករចំណុះទូកង និងផ្ដល់នូវសម្ភារៈគ្រឿងឧបភោគបរិភោគ ដល់កីឡាករទូក-ង ទាំង ២៦ទូក នៅបរិវេណមន្ទីរវប្បធម៌ វិចិត្រ និងសិល្បះខេត្តក្រចេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ខណៈដែលក្រុមកីឡាករចំណុះទូក-ង-ទាំងអស់ បានមកជួបជុំគ្នា នៅចំណុចគោលដៅ ដើមទី ដើម្បីសាកល្បងកម្លាំងទៅតាមចំណុះទូក-ង- នីមួយៗ សមមុនការប្រកួត ថ្ងៃទី២៣ ខែតុលា ឆ្នាំ២០២២ ស្អែកនេះមកដល់។

ក្នុងឱកាសជួបសំណេះសំណាលជាមួយចំណុះទូក-ង នារសៀលដដែលនោះ លោក វ៉ា ថន អភិបាលខេត្តក្រចេះ បានជំរុញលើកទឹកចិត្តដល់កីឡាករចំណុះទូក ទាំងអស់ ត្រូវប្រកួតប្រណាំងគ្នា ដោយត្រឹមត្រូវ តម្លាភាព យុត្តិធម៌ ត្រូវថែរក្សាសុខភាព ជៀសវាងការហូបគ្រឿងស្រវឹង និងខិតខំអោយអស់ពីសមត្ថភាពរៀងៗខ្លួន ដើម្បីទទួលបាន ជ័យលាភី និងដើម្បីបង្កលក្ខណៈល្អប្រសើរដល់ពិធីបុណ្យអុំទូក បណ្តែតប្រទីត សំពះព្រះខែ និងអកអំបុក នៅឆ្នាំនេះ ប្រព្រឹត្តទៅដោយរលូនជាទីមោទនៈ និងជៀសវាងការភ្នាល់ចាក់លុយ ព្រោះអាចបង្កជាជម្លោះរវាងចំណុះទូកនិងចំណុះទូក។

លោកបានរំលឹកឡើងថា នឹកដល់ខេត្តក្រចេះ គឺនឹកឃើញដល់ទូក-ង ឈ្មោះ ម្ជុលពេជ្រ ជាទូក-ង ល្បីប្រចាំខេត្តក្រចេះ។ លោក វ៉ា ថន សូមថ្លែងអំណរគុណដល់ សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងជាបិតាស្ថាបនិក សន្តិភាព និងសូមអរគុណ សន្តិភាព ដែលធ្វើអោយខេត្តក្រចេះមានការអភិវឌ្ឍន៍រីកចម្រើន លើគ្រប់វិស័យ និងផ្ដល់ឱកាសអោយខេត្តបានប្រារព្ធពិធីបុណ្យអុំទូក បណ្តែតប្រទីត សំពះព្រះខែ និងអកអំបុក យ៉ាងឱឡារឹកជាលក្ខណៈទ្រង់ទ្រាយធំលើកដំបូង និងបានផ្ដល់ភាពសប្បាយរីករាយដល់បងប្អូនប្រជាពលរដ្ឋទាំងក្នុងខេត្ត ក៏ដូចជាភ្ញៀវទេសចរមកពីតាមបណ្តាខេត្តផងដែរ។

ដោយឡែក ក្រុមកីឡាករចំណុះទូកទាំងអស់ ក៏បានត្រៀមខ្លួនរួមជាស្រេច និងប្តេជ្ញាចិត្តថានឹងដណ្តើមយកជ័យជំនះរៀងៗខ្លួនជូនក្រុមឲ្យខានតែបានផងដែរ។

ក្នុងឱកាសនោះ លោក វ៉ា ថន អភិបាលខេត្តក្រចេះ និងលោកជំទាវ បានឧបត្ថម្ភដល់ក្រុមកីឡាករប្រណាំងទូក ក្នុង១ទូក ទទួលបានថវិកា៥០ម៉ឺនរៀល សម្លៀកបំពាក់សម្រាប់ អង្ករ ៥០គីឡូក្រាម មី ៥កេស ត្រីខ ១យួរ និងទឹកស៊ីអ៊ីវ ១យួរ៕