ក្រសួងអប់រំ ប្រគល់សិទ្ធិរៀបចំការប្រឡង​មធ្យមសិក្សាបឋមភូមិ ដល់មន្ទីរ គ្រឹះស្ថានសិក្សា

ក្រសួងអប់រំយុវជន និងកីឡា បន្តប្រគល់សិទ្ធិអំណាច និងការទទួលខុសត្រូវទាំងស្រុង ជូនគ្រឹះស្ថានមធ្យមសិក្សានីមួយៗរៀបចំ ការប្រឡងសញ្ញាបត្រមធ្យមសិក្សាបឋមភូមិ សម្រាប់ឆ្នាំសិក្សា២០២១-២០២២ នេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក រស់ សុវាចា អ្នកនាំពាក្យក្រសួងអប់រំ យុវជន និងកីឡា បានឱ្យដឹងថា ដំណើរការប្រឡង គឺក្រសួងប្រគល់ជូនមន្ទីរអប់រំ យុវជន និងកីឡារាជធានី-ខេត្ត ជាអ្នករៀបចំដដែល ដោយរក្សាយន្តការដូចឆ្នាំកន្លងមក ពោលចាប់តាំងពីការរៀបចំវិញ្ញាសា ដំណើរការសំណេរ កំណែ ស្រង់បូកពិន្ទុ​ និងប្រកាសលទ្ធផល តាមគ្រឹះស្ថាន​មធ្យម​សិក្សា​នីមួយៗ។

លោក រស់ សុវាចា បានឱ្យដឹងថា បេក្ខជនប្រឡងសញ្ញាបត្រមធ្យមសិក្សាបឋមភូមិ ឆ្នាំ២០២២នេះ មានចំនួនសរុប ១៧៤ ៧២៦ នាក់ ស្រី៩៥ ១២៧នាក់, សិស្សចំណេះទូទៅ ១៧៣ ៤៦៦នាក់ ស្រី ៩៤ ៨៧៦នាក់, ស្វៃរិន ១៣៦នាក់ ស្រី ៤៥នាក់, បំពេញវិជ្ជា ១ ០៧៦នាក់ ស្រី ១៩២នាក់, គថ្លង់ ២៩ នាក់ ស្រី ០៩ នាក់, ពិការភ្នែក ១៩ នាក់ ស្រី០៥ នាក់ ដែលមានមណ្ឌលសរុប ១ ៧២៣ បន្ទប់សរុប ៧ ៨១៦។

គួរបញ្ជាក់ថា ការប្រឡងឆ្នាំនេះ មានរយៈពេល២ថ្ងៃពេញ ចាប់ពីថ្ងៃទី២៤ ដល់ ២៥ ខែតុលា ឆ្នាំ២០២២។
សម្រាប់ថ្ងៃទី២៤ ខែតុលា ឆ្នាំ២០២២
ពេលព្រឹក
– ម៉ោង៧៖៣០នាទី ដល់ម៉ោង ៩៖០០នាទី តែងសេចក្តី (៩០នាទី)
– ម៉ោង៩៖៣០នាទី ដល់ម៉ោង ១០៖០០នាទី គីមីវិទ្យា (៣០នាទី)
– ម៉ោង១០៖៣០នាទី ដល់ម៉ោង ១១៖០០នាទី ផែនដី និងបរិស្ថានវិទ្យា (៣០នាទី)

ពេលរសៀល
– ម៉ោង១៤៖០០នាទី ដល់ម៉ោង ១៤៖៤៥នាទី រូបវិទ្យា (៤៥នាទី)
– ម៉ោង១៥៖១៥នាទី ដល់ម៉ោង ១៥៖៥៥នាទី ភូមិវិទ្យា (៣០នាទី)
– ម៉ោង១៦៖២៥នាទី ដល់ម៉ោង ១៧៖១០នាទី សីលធម៌-ពលរដ្ឋវិទ្យា (៤៥នាទី)

ថ្ងៃទី២៥ ខែតុលា ឆ្នាំ២០២២
ពេលព្រឹក
– ម៉ោង៧៖៣០នាទី ដល់ម៉ោង ៩៖៣០នាទី គណិតវិទ្យា (១២០នាទី)
– ម៉ោង១០៖០០នាទី ដល់ម៉ោង ១១៖០០នាទី ការសរសេរតាមអាន (៦០នាទី)

ពេលរសៀល
– ម៉ោង១៤៖០០នាទី ដល់ម៉ោង ១៤៖៤៥នាទី ជីវវិទ្យា (៤៥នាទី)
– ម៉ោង១៥៖១៥នាទី ដល់ម៉ោង ១៥៖៥៥នាទី ប្រវត្តិវិទ្យា (៣០នាទី)
– ម៉ោង១៦៖២៥នាទី ដល់ម៉ោង ១៧៖១០នាទី ភាសាបរទេស (៤៥នាទី)

សម្រាប់ពេលវេលាប្រកាសលទ្ធផល នឹងត្រូវធ្វើឡើងនៅថ្ងៃទី១ ខែវិច្ឆិកា ឆ្នាំ២០២២ នេះ៕