កងកម្លាំង​ចម្រុះចុះរៀបចំសណ្ដាប់ធ្នាប់​ត្រៀមទទួលសម្ដេចតេជោ​ ហ៊ុន សែន​ អញ្ជើញចូលរួម​ពិធីប្រណាំងទូកង​នៅក្រុងតាខ្មៅ

លោក ណុប ដារ៉ា អភិបាលរងខេត្តកណ្តាល អមដំណើរដោយលោកឧត្តមសេនីយ៌ទោ ឈឿន សុចិត្ត ស្នងការនគរបាលខេត្តកណ្តាលនៅព្រឹកថ្ងៃទី៣០ ខែតុលា ឆ្នាំ២០២២ បានដឹកនាំកងកម្លាំងប្រដាប់អាវុធជាច្រើននាក់ចុះរៀបចំសណ្តាប់ធ្នាប់នៅបរិវេណមាត់ទន្លេរក្រុងតាខ្មៅដើម្បីសុវត្ថិភាពពលរដ្ឋ និងថ្នាក់ដឹកនាំ។

កងកម្លាំងប្រដាប់អាវុធទាំងបីប្រភេទសរុបប្រមាណ ១ ៥០០នាក់ ដាក់ពង្រាយ ដើម្បីការពារសុខសុវត្ថិភាពជូនពលរដ្ឋ និងថ្នាក់ដឹកនាំ។

នៅល្ងាចថ្ងៃទី៣០ ខែតុលា ឆ្នាំ២០២២នេះសម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា នឹងអញ្ជើញចូលរួមទស្សនាក្នុងពិធីប្រណាំងទូកនៅក្រុងតាខ្មៅ ខេត្តកណ្ដាល។

ក្នុងពិធីបុណ្យអុំទូកនៅក្រុងតាខ្មៅមានទូកចុះឈ្មោះចូលរួមប្រណាំង សរុបចំនួន៩២ទូក ក្នុងនោះ ទូកអុំ ចំនួន ៤៦ទូក ទូកចែវ ចំនួន ៦ទូក ទូកខ្នាតអន្តរជាតិបុរស ចំនួន ៣៦ទូក និងទូកខ្នាតអន្តរជាតិនារី ចំនួន ៤ទូក សរុបចំណុះទូក ចំនួន ៤ ៥០៦នាក់ និងមានកម្លាំងត្រៀមការពារសន្តិសុខសុវត្តិភាពចំនួន៧៨៤នាក់។

ពិធីនេះធ្វើឡើងដើម្បីបង្កបរិយាកាសទាក់ទាញភ្ញៀវជាតិ និងអន្តរជាតិ មកទស្សនាកម្សាន្ត សប្បាយរីករាយ ដើម្បីអបអរសាទរ ព្រះរាជពិធី បុណ្យអុំទូក បណ្ដែតប្រទីបសំពះព្រះខែ និងអកអំបុកផងដែល។

ក្នុងពិធីនោះរដ្ឋបាលខេត្តកណ្តាលបានរៀបចំដាក់តាំងពិព័រណ៍ លក់ផលិតផលក្នុងស្រុកជាច្រើនប្រភេទ ដោយឡែក នៅពេលរាត្រី និងមានរៀបចំបណ្តែតគោមលើផ្ទៃទឹកបាញ់កាំជ្រួច និងមានកម្មវិធីប្រគុំតន្ត្រីសម័យ ដែលមានតារាចំរៀងល្បីៗនៅកម្ពុជាចូលរួមផងដែរ៕

អត្ថបទ៖ ឆៃ យ៉ា