​ចិនសន្យាផ្ដល់ជំនួយ​ទឹកប្រាក់​ ២០០ លាន​យ័ន​បន្ថែម​ជួយកែលម្អជីវភាព​ពលរដ្ឋកម្ពុជា​

​រដ្ឋាភិបាលចិននៅថ្ងៃទី ៩ ខែវិច្ឆិកានេះ​បានប្រកាសផ្ដល់ជំនួយ​បន្ថែមនូវទឹកប្រាក់​ចំនួន ២០០ លានយ័នសម្រាប់ជួយកែលម្អជីវភាព​ប្រជាពលរដ្ឋកម្ពុជា​, ការស្ដារឡើងវិញនូវបេតិកភណ្ឌ​កម្ពុជា, បង្កើន​ចំនួននិស្សិត​កម្ពុជា​ទៅបន្តការសិក្សានៅប្រទេសចិន, ជួយដល់សកម្មភាពដោះមីន, វិស័យសុខាភិបាល, ការរៀបចំការប្រកួតកីឡាស៊ីហ្គេមនៅឆ្នាំខាងមុខ, ជួយស្ថាបនាស្ពានឆ្លងទន្លេមេគង្គ, ការស្ថាបនាផ្លូវដែកតភ្ជាប់ពីកម្ពុជា ឡាវ ថៃ និងប្រទេសចិន និងជួយដល់កម្ពុជាលើវិស័យកសិកម្មធ្វើយ៉ាងណាឲ្យផលិតផលកសិផលរបស់កម្ពុជាមានគុណភាព​អាចនាំទៅប្រទេសចិនស្របតាមកូតាដែលបានប្រគល់ជូន និងមានគុណភាពសម្រាប់ទៅប្រទេសក្រៅផងដែរ។

នេះជាការបញ្ជាក់ប្រាប់ពីលោក លី ខឺឈាង នាយករដ្ឋមន្ត្រីចិន ក្នុងជំនូបជាមួយសម្ដេចតេជោ ហ៊ុន សែន នាយករដ្ឋមន្ត្រីកម្ពុជានៅល្ងាចថ្ងៃទី ៩ ខែវិច្ឆិកា នៅវិមានសន្តិភាព។

លោកនាយករដ្ឋមន្ត្រីចិនមានប្រសាសន៍ថា ទំនាក់ទំនងរវាងកម្ពុជា-ចិន គឺជាទំនាក់ទំនងយ៉ាងស៊ីជម្រៅលើគ្រប់វិស័យ ខណៈលោករីករាយដែលឃើញកម្ពុជាមានការរីកចម្រើន និងអភិវឌ្ឍយ៉ាងឆាប់រហ័ស ខណៈដែលចិននៅតែបន្តជួយកម្ពុជាបន្ថែមទៀត។

ជាការឆ្លើយតប សម្តេចតេជោ ហ៊ុន សែនបានថ្លែងអំណរគុណដែលចិនបានផ្តល់ជំនួយបន្ថែមដល់កម្ពុជា ដែលធ្វើឱ្យកម្ពុជាកាន់តែរីកចម្រើនមានវឌ្ឍនភាពកាន់តែខ្លាំងឡើងថែមទៀត។

សម្តេចលើកឡើងថា កន្លងមកចិនបានធ្វើជាបង្អែកផ្តល់វ៉ាក់សាំងដល់កម្ពុជាធ្វើឱ្យកម្ពុជាបានឆ្លងផុតពីការរីករាលដាលជំងឺកូវីដ-១៩ បើកប្រទេស និងបើកសេដ្ឋកិច្ចឡើងវិញ។

សម្តេចក៏បានអបអរសាទរភាគីចិន ដែលបានសម្រេចសមិទ្ធផលធំធេងរបស់បក្សកុម្មុយនីសចិន និងជូនពរមិត្តចិនបន្តអភិវឌ្ឍកាន់តែខ្លាំងថែមទៀត ជាពិសេសសម្រេចបានគោលដៅ១០០ឆ្នាំលើកទី២ ក្នុងការកសាងប្រទេសសង្គមនិយម បែបទំនើប៕