មក​ដឹង​គម្រោង​ធំៗ​ ចិន​អះអាង​នឹង​ជួយ​កម្ពុជា​ឲ្យ​​ខ្លាំងក្លា​ថែមទៀត

​​យោងតាម​សេចក្តីប្រកាស​រួមរបស់​រដ្ឋាភិបាល​កម្ពុជា​និង​ចិន​ក្នុង​កិច្ចប្រជុំកំពូលអាស៊ាន ចិន​បានអះអាង​នឹង​ជួយ​ដល់​កម្ពុជា​ ដើម្បី​សម្រេច​បាន​វឌ្ឍនភាព​ថ្មីៗក្នុង​ការ​អភិវឌ្ឍ​ជាតិ​និង​សុខុមាលភាពជូនប្រជាជន។

រដ្ឋាភិបាល​ចិន​បានប្រកាស​នឹង​បន្ត​គាំទ្រ​គម្រោងអភិវឌ្ឍ​នានា​នៅ​កម្ពុជា​មាន​ដូចជា៖

-គម្រោង​អាកាសយានដ្ឋានអន្តរជាតិ​អង្គរសៀមរាប គម្រោង​បណ្ដាញ​ខ្សែកាប​អុបទិក​ក្រោម​បាតសមុទ្រក្រុងព្រះសីហនុ-ក្រុងហុងកុង និង​គម្រោងហេដ្ឋារចនាសម្ព័ន្ធដូចជា ផ្លូវថ្នល់ ស្ពាន ឡូជីស្ទីក និងឃ្លាំងស្តុក។

-ប្រទេស​ចិនបានបញ្ជាក់សាជាថ្មីអំពី​ជំហររបស់ខ្លួន ក្នុងការ​ពង្រីក​ទីផ្សារចិនសម្រាប់ផលិតផលនិងទំនិញកសិកម្មពីកម្ពុជា និងផ្តល់ការគាំទ្រផ្នែកចំណេះដឹង ហិរញ្ញវត្ថុ និងបច្ចេកទេស សម្រាប់ការ​អភិវឌ្ឍកសិកម្មទំនើបនៅកម្ពុជា។

-ចិន​នឹង​ជួយ​ដល់​ការ​អភិវឌ្ឍ​ថាមពលស្អាត ដើម្បី​ជួយ​សន្សំសំចៃ​និង​កាត់​បន្ថយ​ការបញ្ចេញឧស្ម័ន​ពុលនៅកម្ពុជា។

-ពង្រីកការនាំចេញផលិតផលកម្ពុជាទៅកាន់ទីផ្សារចិន តាម​រយៈ​ព្រឹត្តិការណ៍​ផ្សព្វផ្សាយនានាដូចជា ពិព័រណ៍​នាំចូលអន្តរជាតិចិន ពិព័រណ៍នាំចូល-នាំចេញចិន ពិព័រណ៍អាស៊ាន-ចិន និងយន្តការកិច្ចសហប្រតិបត្តិការពាណិជ្ជកម្មអេឡិកត្រូនិក​ទ្វេភាគី។

-កសាង​មជ្ឈមណ្ឌល​កិច្ចសហប្រតិបត្តិការឱសថបុរាណចិន កម្ពុជា-ចិន ដើម្បី​គាំទ្រសេវាសុខាភិបាល​សាធារណៈនៅកម្ពុជា។

-ប្រទេសចិននឹងបន្តគាំទ្រការកាត់បន្ថយភាពក្រីក្រនៅកម្ពុជា តាមរយៈគម្រោងកែលម្អផ្លូវជនបទជំហាន ទី ៣ គម្រោងផ្គត់ផ្គង់ទឹកជនបទជំហានទី ៣ គម្រោងមន្ទីរពេទ្យបង្អែកខេត្តព្រះសីហនុ គម្រោង អភិវឌ្ឍន៍ប្រព័ន្ធចម្រុះទឹកកខ្វក់នៅខេត្តព្រះសីហនុ និងគម្រោងផ្សេងៗទៀតដូចជា ផ្លូវជនបទ ការរក្សាទឹក អប់រំ សុខាភិបាល និងគម្រោងបោសសម្អាតមីន។

-ជំរុញកិច្ចសហប្រតិបត្តិការវិទ្យាសាស្ត្រ អប់រំ វប្បធម៌ ទេសចរណ៍ សុខាភិបាល និងកិច្ចសហប្រតិបត្តិការថ្នាក់មូលដ្ឋាន។

-ចិន​នឹងបន្តគាំទ្រការអប់រំ​ភាសាចិន និងប្រព័ន្ធឌីជីថល ក្នុងវិស័យអប់រំនៅកម្ពុជា និង​រៀបចំ​ការ​ធ្វើដំណើរ​ឡើងវិញ​ជាបន្តបន្ទាប់ តាមជើង​ហោះហើរត្រង់​បន្ថែមទៀត ដើម្បី​សម្រួល​ដល់​ការវិល​ត្រលប់​របស់​និស្សិតកម្ពុជា​ទៅប្រទេសចិន៕