នាយករដ្ឋមន្រ្តីកាណាដា វាយតម្លៃខ្ពស់ចំពោះវិធានការរបស់សម្ដេចតេជោក្នុងការជួយដោះស្រាយវិបត្តិភូមា

នាយករដ្ឋមន្ត្រីកាណាដា លោក ចាស្ទីន ទ្រូឌូ បានវាយតម្លៃខ្ពស់ចំពោះវិធានការរបស់សម្ដេចនាយករដ្ឋមន្ត្រី ហ៊ុន សែន ដើម្បីជួយដោះស្រាយវិបត្តិនយោបាយនៅប្រទេសមីយ៉ាន់ម៉ាដែលកំពុងក្លាយជាបញ្ហាប្រឈមនៅក្នុងតំបន់។

នាយករដ្ឋមន្ត្រីកាណាដា វាយតម្លៃបែបនេះតាមរយៈជំនួបសន្ទនាកំពូលទ្វេភាគីជាមួយសម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា នៅរសៀលថ្ងៃទី១២ ខែវិច្ឆិកានេះ។

ជំនួបកំពូលនេះ លោក ចាស្ទីន ទ្រូឌូ បានថ្លែងដូច្នេះថា៖ «ខ្ញុំសូមគោរពវាយតម្លៃខ្ពស់ចំពោះវិធានការរបស់សម្ដេចនាយករដ្ឋមន្ត្រី ហ៊ុន សែន នាពេលកន្លងមក ដើម្បីជួយមីយ៉ាន់ម៉ាឲ្យវិលត្រឡប់មកស្ថានភាពដើមវិញ»។ ខណៈលោកក៏ប្រកាសស្វាគមន៍ចំពោះគោលការណ៍ និងការសម្រេចចិត្តនានារបស់សម្ដេចតេជោដែលបានប្រកាន់យកចំពោះការឈ្លានពាន របស់រុស្ស៊ីលើអ៊ុយក្រែន។

ត្រង់បញ្ហាសង្គ្រាមនៅអ៊ុយក្រែននេះ សម្ដេចតេជោ ហ៊ុន សែន បានជម្រាបជូនលោក ចាស្ទីន ទ្រូឌូ អំពីកិច្ចសហប្រតិបត្តិការរវាងកម្ពុជា និងជប៉ុន ក្នុងការត្រៀមខ្លួនរួចជាស្រាច ដើម្បីជួយដល់ប្រទេសអ៊ុយក្រែនទៅលើកិច្ចការដោះមីន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ពាក់ព័ន្ធនឹងកិច្ចការអាស៊ាន លោកនាយករដ្ឋមន្ត្រីកាណាដា បានលើកឡើងថា អាស៊ាន និងកាណាដា រួមទាំងកម្ពុជា គឺមានសក្ដានុពលខ្លាំងសម្រាប់កិច្ចសហប្រតិបត្តិការលើវិស័យជាច្រើន ហើយចំពោះទំនាក់ទំនងទ្វេភាគីជាមួយកម្ពុជា គឺស្ថិតនៅចំណុចកណ្ដាលនៃកិច្ចសហប្រតិបត្តិការរយៈពេលវែង ពិសេសទំនាក់ទំនងលើវិស័យពាណិជ្ជកម្ម ការទូត អប់រំ ការប្រែប្រួលអាកាសធាតុជាដើម៕

ដោយ៖ ធឿន វ៉ាន់សុង