លោកស្រី ដាំ ដារិនី គឺជារដ្ឋលេខាធិការជាស្រ្តីតែម្នាក់គត់នៅក្រសួងការពារជាតិ

រាជរដ្ឋាភិបាលកម្ពុជា ដែលមានក្រសួងការពារជាតិ ជាសេនាធិការ បាន និងកំពុងបន្តការយកចិត្តទុកដាក់ និងលើកកម្ពស់ការងារយេនឌ័រតាមរយៈការបន្តលើកស្ទួយ និងផ្តល់ឱកាស តួនាទី ឋានន្តរស័ក្តិដល់បណ្តាស្ត្រីដែលមានសមត្ថភាព បទពិសោធ និងស្នាដៃក្នុងវិស័យការពារជាតិ ជាបន្តបន្ទាប់។ ជាក់ស្តែង ពេលបច្ចុប្បន្ននេះ មិនត្រឹមតែមានកងទ័ពជានារីនោះទេ ក៏មានស្ត្រីដែលកំពុងកាន់តំណែងសំខាន់ៗនៃក្រសួងការពារជាតិផងដែរ មានជាអាទិ៍ រដ្ឋលេខាធិការ អនុរដ្ឋលេខាធិការ អគ្គនាយករង និងជាអគ្គមេបញ្ជាការរង ជាដើម។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ចំណោមបណ្ដាស្ត្រីទាំងអស់ គឺលោកស្រី ដាំ ដារីនី គឺជាមន្ត្រីជាន់ខ្ពស់មួយរូបដែលបានកំពុងកាន់តំណែងជារដ្ឋលេខាធិការក្រសួងការពារជាតិ ចាប់តាំងពីអំឡុងឆ្នាំ២០១៤។ មុនកាន់តំណែងជារដ្ឋលេខាធិការនេះ លោកស្រី ជាអតីតអនុរដ្ឋលេខាធិការក្រសួងអភិវឌ្ឍន៍ជនបទនៃរាជរដ្ឋាភិបាលកម្ពុជា អាណត្តិទី៤ ឆ្នាំ២០០៨ ដល់ឆ្នាំ២០១៣ បន្ទាប់ពីលោកស្រី ធ្លាប់បម្រើការជាមន្ត្រីនៃក្រសួងកិច្ចការនារី ក្នុងតួនាទីប្រធានការិយាល័យក្រុមប្រឹក្សាជាតិកម្ពុជាដើម្បីស្ត្រី នៅឆ្នាំ២០០៦ ដល់ឆ្នាំ២០០៨។

ក្នុងនាមជារដ្ឋលេខាធិការក្រសួងការពារជាតិ លោកស្រី ដាំ ដារីនី ទទួលបន្ទុកលើការងារយេនឌ័រ ការងារនាយកដ្ឋាន​នីតិកម្ម និងវិទ្យាស្ថាន​វិទ្យាសាស្រ្ដ​សុខាភិបាលនៃកងយោធពលខេមរភូមិន្ទ។ ក្រៅពីការងារនៅក្រសួងការពារជាតិ លោកស្រី ដាំ ដារីនី ក៏ជាសមាជិកក្រុមការងារយុវជនគណបក្សប្រជាជនកម្ពុជាថ្នាក់កណ្តាល ទទួលបន្ទុកជាប្រធានផ្នែកសិល្បៈ និងកីឡា ព្រមទាំងជាអនុប្រធានក្រុមការងារចុះជួយមូលដ្ឋានស្រុកត្បូងឃ្មុំ ផងដែរ។

បើនិយាយអំពីកិច្ចការសង្គម លោកស្រី ក៏បានកំពុងដឹកនាំក្រុមយុវជន តាមរយៈតួនាទីជាអនុប្រធានសហភាពសហព័ន្ធយុវជនកម្ពុជា (ស.ស.យ.ក) ដែលមានឯកឧត្តម ហ៊ុន ម៉ានី ជាប្រធាន។ តាមរយៈតួនាទីនេះ លោកស្រី ដាំ ដារីនី ត្រូវបានចាត់ទុកថា ជាស្ត្រីឆ្នើមមួយរូប ដែលបានចូលរួមលះបង់ពេលវេលា កម្លាំងកាយ កម្លាំងចិត្ត និងប្រាជ្ញាស្មារតី ព្រមទាំងធនធានក្នុងបុព្វហេតុជាតិ និងការលើកកម្ពស់តម្លៃយុវជនកម្ពុជានៅលើឆាកអន្តរជាតិ។

ដោយឡែក កម្រិតវប្បធម៌វិញ គឺលោកស្រី ដាំ ដារីនី បាន​សិក្សាសញ្ញាបត្រ​ថ្នាក់​បរិញ្ញាបត្រ​នីតិសាស្ត្រ និងបរិញ្ញាបត្រជាន់ខ្ពស់រដ្ឋបាលសាធារណៈ នៃសាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច ហើយបានបញ្ចប់បរិញ្ញាបត្រភាសាអង់គ្លេសនៅវិទ្យាស្ថានភាសាបរទេស (IFL)។ ជាមួយគ្នានេះ លោកស្រី ក៏ទើបតែបានបញ្ចប់សញ្ញាបត្របណ្ឌិតរដ្ឋបាលសាធារណៈ នៅរាជបណ្ឌិត្យសភាកម្ពុជា កាលពីថ្ងៃទី២៦ ខែសីហា ឆ្នាំ២០២២ ដោយនិក្ខេបបទការពារថ្នាក់បណ្ឌិតនេះ លោកស្រី បានស្រាវជ្រាវលើប្រធានបទ៖ «ការលើកកម្ពស់ស្ត្រីក្នុងកងយោធពលខេមរភូមិន្ទនៅកម្ពុជា»៕

ដោយ៖ ធឿន វ៉ាន់សុង