អភិបាលរងរាជធានីភ្នំពេញ ២រូប ត្រូវបានតែងតាំងជាជំនួយការសម្ដេចតេជោ ឋានៈស្មើរដ្ឋលេខាធិការ បន្ថែមលើមុខងារបច្ចុប្បន្ន

អភិបាលរងរាជធានីភ្នំពេញចំនួន ២រូបទៀត ត្រូវបានព្រះមហាក្សត្រនៃព្រះរាជាណាចក្រកម្ពុជា ចេញព្រះរាជក្រឹត្យត្រាស់បង្គាប់តែងតាំង និងផ្ដល់ឋានៈជាជំនួយការសម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា។

ព្រះរាជក្រឹត្យរបស់ព្រះករុណា ព្រះបាទ សម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា ឡាយព្រះហត្ថលេខាកាលពីថ្ងៃទី ២៦ ខែវិច្ឆិកា ឆ្នាំ ២០២២ បានត្រាស់បង្គាប់តែងតាំង និងផ្ដល់ឋានៈជាជំនួយការសម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា ២រូប៖

១. លោក កើត ឆែ មានឋានៈស្មើរដ្ឋលេខាធិការ បន្ថែមលើមុខងារបច្ចុប្បន្ន

២. លោក មាន ចាន់យ៉ាដា មានឋានៈស្មើរដ្ឋលេខាធិការ បន្ថែមលើមុខងារបច្ចុប្បន្ន។

លោក កើត ឆែ និងលោក មាន ចាន់យ៉ាដា មានមុខងារជាអភិបាលរង នៃគណៈអភិបាលរាជធានីភ្នំពេញ។ កាលពីពេលថ្មីៗនេះ លោក ឃ្លាំង ហួត អភិបាលរងរាជធានីភ្នំពេញមួយរូបទៀត ក៏ត្រូវបានព្រះមហាក្សត្រ ចេញព្រះរាជក្រឹត្យត្រាស់បង្គាប់ដំឡើងឋានៈជំនួយការសម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា ឋានៈស្មើរដ្ឋលេខាធិការ បន្ថែមលើមុខងារបច្ចុប្បន្នផងដែរ៕