មន្រ្តី៦៨៣នាក់បានចូលមកប្រកាសទ្រព្យសម្បត្តិ និងបំណុលនៅអង្គភាពACU

លោកទេសរដ្ឋមន្រ្តី ឱម យ៉ិនទៀង ប្រធានអង្គភាពប្រឆាំងអំពើពុករលួយ (ACU) បានឱ្យដឹងថា គិតត្រឹមខែវិច្ឆិកា ឆ្នាំ​២០២២​នេះ មានមន្រ្តីចំនួន៦៨៣នាក់បានចូលមកប្រកាសទ្រព្យសម្បត្តិ និងបំណុលនៅអង្គភាពACU ក្នុងនោះមានមន្រ្តីទើបតែងតាំងមានឋានៈជាប់កាតព្វកិច្ចត្រូវប្រកាសទ្រព្យសម្បត្តិ និងបំណុលចំនួន៤៣២នាក់។

ថ្លែងក្នុងកិច្ចប្រជុំក្រុមប្រឹក្សាជាតិប្រឆាំងអំពើពុករលួយនៅទីស្តីការអង្គភាពACUកាលពីរសៀលថ្ងៃទី២៨ ខែវិច្ឆិកា លោកទេសរដ្ឋមន្ត្រីបានបន្តថា ចំណែកមន្រ្តីចំនួន២៥នាក់បានមកប្រកាសទ្រសម្បត្តិ និងបំណុលជាលើកចុងក្រោយដោយមូលហេតុចូលនិវត្តន៍ ចប់អាណត្តិ និងលាឈប់ពីការងារ។

លោកទេសរដ្ឋមន្រ្តីបានបន្តថា នៅក្នុងខែវិច្ឆិកា ឆ្នាំ២០២២នេះ អង្គភាពACU បានទទួលពាក្យបណ្តឹងចំនួប៣៦បណ្តឹង។ក្នុងចំណោមបណ្តឹងទាំងនេះរួមទាំងពាក្យបណ្តឹងពីខែមុនៗ ដែលកំពុងតែមានចំណាត់ការ។ ពាក្យបណ្តឹងដែលមិនពាក់ព័ន្ធនឹងអំពើពុករលួយមានចំនួន៨ និងពាក្យបណ្តឹង១៥បានបញ្ជូនទៅកាន់ម្ចាស់បណ្តឹងវិញដោយសារ (មិនពិត) បន្ទាប់ការស្រាវជ្រាវរួច។

ចំពោះពាក្យបណ្ដឹងចំនួន១៤បណ្តឹងអង្គភាពប្រឆាំងអំពើពុករលួយកំពុងទាក់ទងឲ្យស្ថាប័នសាមីខ្លួនរងការចោទប្រកាន់ឲ្យធ្វើការបំភ្លឺ និងបង្ហាញឯកសារភស្តុតាងនៃការបំភ្លឺរបស់ខ្លួនដោយមានបុគ្គល១២នាក់ ដែលអង្គភាពប្រឆាំងអំពើពុករលួយបានអញ្ជើញឲ្យមកបំភ្លឺផ្ទាល់មាត់នៅអង្គភាព។ មានពាក្យបណ្ដឹងចំនួនពីរដែលអង្គភាពប្រឆាំងអំពើពុករលួយបានធ្វើលិខិត​អន្តរាគមន៍សូមឲ្យពិនិត្យឡើងវិញនូវអង្គហេតុ និងការសម្រេចកន្លងមក និងពាក្យបណ្ដឹងមួយករណីអង្គភាពប្រឆាំងអំពើពុករលួយបានកសាងសំណុំរឿងបញ្ជូនទៅតុលាការពីបទកេងយកប្រយោជន៍ខុសច្បាប់៕

អត្ថបទ៖ សំអឿន