មន្ត្រីជាន់ខ្ពស់ក្រសួងសង្គមកិច្ច ជំរុញមន្ត្រីជំនាញបន្តកិច្ចការការពារកុមារ និងចុះតាមដានករណីកុមាររងអំពើហិង្សា

លោក តូច ចាន់នី អគ្គនាយក នៃអគ្គនាយកដ្ឋានសេវាសង្គមកិច្ច របស់ក្រសួងសង្គមកិច្ច អតីតយុទ្ធជននិងយុវនីតិសម្បទា បានជំរុញដល់មន្ត្រីជំនាញ នៃនាយកដ្ឋានកិច្ចការពារកុមារ បន្តចុះតាមដានកុមាររងអំពើហិង្សា កុមាររងការរំលោភបំពាន និងកុមាររស់នៅក្នុងមណ្ឌលថែទាំនានា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការជំរុញបែបនេះ គ្រាដែលលោក តូច ចាន់នី ចូលរួមក្នុងកម្មវិធីចុះអង្កេតតាមដានកុមាររងអំពើហិង្សា កុមាររងការរំលោភបំពាន និងកុមាររស់នៅក្នុងមណ្ឌលថែទាំផ្ទាល់។ ពិធីនោះ មានការចូលរួមពីលោកស្រីប្រធាន គ.ក.ស.ក ប្រធានមន្ទីរ មន្ត្រីបង្គោល និងបុគ្គលិកសង្គមកិច្ច នៃមន្ទីរ ស.អ.យ ខេត្ត ប្រធានការិយាល័យ សង្គមកិច្ចនិងសុខុមាលភាពសង្គមក្រុង សមាជិក គ.ក.ន.ក និងមន្ត្រីជំនាញអង្គការយូនីសេហ្វ នាថ្ងៃទី ៣០ ខែវិច្ឆិកា ឆ្នាំ ២០២២នេះ។

នៅក្នុងឱកាសនោះ លោក តូច ចាន់នី បានថ្លែងថា ទោះបីកុមារនាពេលបច្ចប្បន្ននេះ ទទួលបានកម្មវិធីល្អៗពីក្រសួង អង្គការនានា ពិសេសការគិតគូរពីរាជរដ្ឋាភិបាលក្តី ក៏មន្ត្រីពាក់ព័ន្ធទាំងអស់ ត្រូវបន្តតាមដានបញ្ហាកុមារ ដែលបានរងគ្រោះដោយអំពើហិង្សា ការរំលោភបំពាន ឬការជួញដូរជាដើម។

លោកអគ្គនាយក និងក្រុមការងារ ក្រោយទទួលបានស្តាប់បទបង្ហាញ ស្តីពីស្ថានភាព និងការអនុវត្តសកម្មភាពកិច្ចការពារកុមារ ដោយមន្ត្រីបង្គោលទទួលបន្ទុកកិច្ចការពារកុមារ នៃមន្ទីរ ស.អ.យ ខេត្ត ក្រចេះជាច្រើនរូបរួចមក លោកប្រធាននិងក្រុមការងារ បានចុះពិនិត្យជាក់ស្តែងស្ថានភាពកុមាររងគ្រោះដោយអំពើហិង្សា ការរំលោភបំពាន និងកុមាររស់នៅក្នុងមណ្ឌលថែទាំ ផងដែរ៕ 

អត្ថបទ៖ វិមាន