គណៈមេធាវីកម្ពុជាផ្តល់វិភាគទានជាង ១ ម៉ឺនដុល្លារក្នុងគម្រោងសម្តេចតេជោសម្រាប់សកម្មភាពមីន

នៅថ្ងៃទី ៧ ខែធ្នូ ឆ្នាំ២០២២ នាទីស្នាក់ការអាជ្ញាធរមីន លោកទេសរដ្ឋមន្រ្តី លី ធុជ អនុប្រធានទី១ អាជ្ញាធរមីន បានទទួលវិភាគទានពី លោក លី ច័ន្ទតុលា ប្រធានគណៈមេធាវីនៃព្រះរា​ជា​ណាចក្រកម្ពុជា និងសហការីនូវថវិកាចំនួន ១១.៦០៣ ដុល្លារអាមេរិក និង ៣,១លានរៀល ដើម្បីចូលរួមក្នុងយុទ្ធនាការបោសសម្អាតមីន និងកម្ពុជាគ្មានមីនឆ្នាំ២០២៥ តាមរយៈគម្រោង​សម្តេចតេជោសម្រាប់សកម្មភាពមីន “ផ្តល់ដីសុវត្ថិភាព បង្កើតស្នាមញញឹម”។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

​លោកទេសរដ្ឋមន្រ្តីបានថ្លែងអំណរយ៉ាងជ្រាលជ្រៅចំពោះទឹកចិត្ត​ប្រកបដោយសប្បុរស​របស់​គណៈមេធាវីនៃព្រះរាជាណាចក្រកម្ពុជា ដែលបានចូលរួមដល់​សកម្មភាពមនុស្សធម៌​ជាមួយ​រាជ​រដ្ឋាភិបាលកម្ពុជា ក្នុងការផ្តល់ដីមានសុវត្ថិភាព និងកាត់បន្ថយការគ្រោះថ្នាក់ដោយសារគ្រាប់មីន និងគ្រាប់មិនទាន់ផ្ទុះ ជាពិសេសចូលរួមជួយលប់បំបាត់គ្រាប់មីនឲ្យអស់ពីកម្ពុជាត្រឹមឆ្នាំ២០២៥ ស្របតាមអំពាវនាវរបស់ សម្តេចតេជោនាយករដ្ឋមន្រ្តី។

​លោកទេសរដ្ឋមន្រ្តី បានចាត់ទុកវិភាគទាននេះ គឺជាការរួមចំណែកក្នុងការធ្វើឲ្យប្រសើរឡើង​នូវ​ជីវភាព​រស់នៅរបស់ប្រជាពលរដ្ឋតាមមូលដ្ឋាន ក៏ដូចជាការលប់បំបាត់ភាពភ័យខ្លាច​របស់​ប្រជាជន​ដែលកំពុងបន្តរស់នៅលើតំបន់សង្ស័យមានមីន និងគ្រាប់មិនទាន់ផ្ទុះ៕