ទេសរដ្ឋមន្រ្តី​ លី​ ធុជ​ ប្រាប់​ដៃគូ​អភិវឌ្ឍន៍​ ទស្សនវិស័យ​​សម្តេច​តេជោ​ ប្រែក្លាយតំបន់មានមីន ​ជាតំបន់អភិវឌ្ឍ​

ទេសរដ្ឋមន្ត្រី លី ធុជ អនុប្រធានទី១ អាជ្ញាធរមីន បានបញ្ជាក់ជូនក្រុមប្រឹក្សាភិបាលគម្រោងពី ទស្សនវិស័យដ៏ថ្លៃថ្លារបស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ក្នុងការប្រែក្លាយតំបន់ដែលមានមីន និងសំណល់ជាតិផ្ទុះតាមព្រំដែនជាមួយប្រទេសជិតខាង ជាតំបន់សន្តិភាព​ សុវត្ថិភាព និងការអភិវឌ្ឍសម្រាប់ប្រជាពលរដ្ឋនៃប្រទេសទាំងសងខាង។ ជាមួយគ្នានោះ សម្តេចនាយករដ្ឋមន្ត្រី បានបង្កើត មូលនិធិកម្ពុជាគ្មានមីនឆ្នាំ២០២៥ ដែលនឹងទទួលវិភាគទានដំបូងពីថវិការដ្ឋចំនួនប្រមាណ ៣០លានដុល្លារអាមេរិក និងអាចទទួលវិភាគទានថវិការដ្ឋពីឆ្នាំ២០២៣ ដល់២០២៥ តាមការចាំបាច់ជាក់ស្តែង។ 

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្ងៃទី១២ ខែធ្នូ ឆ្នាំ២០២២ ទេសរដ្ឋមន្ត្រី លី ធុជ អនុប្រធានទី១ អាជ្ញាធរមីន និងលោកស្រី Allisar Chaker អ្នកតំណាងអង្គការ UNDP ប្រចាំនៅកម្ពុជា បានដឹកនាំកិច្ចប្រជុំក្រុមប្រឹក្សាភិបាលគម្រោងបោសសម្អាតមីន ដើម្បីលទ្ធផលដំណាក់កាលទី៤ ដែលមានការអញ្ជើញចូលរួមពី UNDP ប្រទេសអូស្ត្រាលី ភ្នាក់ងារសហប្រតិបត្តិការអន្តរជាតិសាធារណៈរដ្ឋកូរ៉េ (KOICA) និងប្រទេសនូវែលសេឡង់ ក្នុងគោលបំណងពិនិត្យលើវឌ្ឍនភាពនៃការអនុវត្តគម្រោងបោសសម្អាតមីនដើម្បីលទ្ធផលក្នុងឆ្នាំ២០២២ និងអនុម័តផែនការសកម្មភាពឆ្នាំ២០២៣។

ក្រុមប្រឹក្សាភិបាលគម្រោង បានអបអរសាទរ និងកោតសរសើរដល់ឆន្ទៈ និងកិច្ចខិតខំប្រឹងប្រែងរបស់ សម្តេចនាយករដ្ឋមន្ត្រី ក្នុងដំណើរឆ្ពោះទៅរកការសម្រេចចក្ខុវិស័យ កម្ពុជាគ្មានមីន ឆ្នាំ២០២៥។

ក្នុងនាម សម្តេចតេជោនាយករដ្ឋមន្រ្តី និងជាប្រធានអាជ្ញាធរមីន ឯកឧត្តម ទេសរដ្ឋមន្រ្តី លី ធុជ បានវាយតម្លៃខ្ពស់ចំពោះការអនុវត្តរបស់គម្រោងបោសសម្អាតដើម្បីលទ្ធផល ដែលក្នុងរយៈពេល ១១ខែ គិតចាប់ពីខែមករា ដល់វិច្ឆិកា ឆ្នាំ២០២២ នេះ បានរំដោះផ្ទៃដី ៣១គីឡូម៉ែត្រក្រឡាជូនប្រជាពលរដ្ឋជិត ៥ម៉ឺននាក់ ប្រើប្រាស់ និងបានថ្លែងអំណរគុណយ៉ាងជ្រាលជ្រៅដល់ UNDP ប្រទេសម្ចាស់ជំនួយ និងដៃគូអភិវឌ្ឍន៍ ដែលបានបន្តចូលរួមជាមួយរាជរដ្ឋាភិបាលកម្ពុជាក្នុងការបោសសម្អាតមីនឲ្យអស់នៅឆ្នាំ២០២៥៕