ពិព័រណ៍សៀវភៅលើកទី៩ មានអ្នកចូលរួម ជិត១១ម៉ឺននាក់

ការតាំងពិព័រណ៍សៀវភៅកម្ពុជាលើកទី៩ រយៈពេល៣ថ្ងៃ ក្នុងឆ្នាំ២០២២នេះ មានអ្នកចូលរួមជាតិ និងអន្តរជាតិចំនួន ១០,៩៥០០ នាក់។ ពិព័រណ៍សៀវភៅលើកទី៩នេះ ធ្វើឡើងក្រោយពីខកខានប្រារព្ធរយៈពេល ២ឆ្នាំ ដោយសារជំងឺរាតត្បាតកូវីដ-១៩។

ពិព័រណ៍សៀវភៅឆ្នាំនេះ ធ្វើឡើងក្រោមប្រធានបទ “មួយថ្ងៃអាន មួយថ្ងៃដឹង” រយៈពេល៣ថ្ងៃ ចាប់ពីថ្ងៃទី ០៩ ដល់ថ្ងៃទី ១១ ខែធ្នូ ឆ្នាំ ២០២២ កន្លងទៅ នៅបណ្ណាល័យជាតិ។ ចំពោះការរៀបចំនៅក្នុងឆ្នាំ២០២២នេះ ចំនួនស្តង់លក់សៀវភៅមានច្រើនជាងមុន ​ដោយកាលពីឆ្នាំ២០១៩ មានស្តង់លក់សៀវភៅត្រឹមតែ ១៤៥ស្តង់ប៉ុណ្ណោះ។ រីឯ ឆ្នាំ២០២២ គឺមានស្តង់លក់សៀវភៅរហូតដល់ទៅ ១៩៧ ស្តង់ឯណោះ។

ព្រឹត្តិការណ៍តាំងពិព័រណ៍សៀវភៅនេះ គឺមិនមែនមានត្រឹមតែការលក់សៀវភៅប៉ុណ្ណោះទេ តែមានកម្មវិធីជាច្រើនទៀតសម្រាប់អប់រំ ជាការកម្សាន្ត និងមានជាល្បែងលេងសម្រាប់កុមារទៀតផង។ ព្រឹត្តិការណ៍នេះ ក៏មានជាការសម្តែងនូវទស្សនីយភាព “ល្ខោនស្រមោលស្បែកតូច”។ ជាមួយគ្នានេះ ក៏មានសិក្ខាសាលាផ្តោតលើប្រធានបទ “តើការអានមានឥទ្ធិពលអ្វីខ្លះទៅលើការរស់នៅប្រចាំថ្ងៃរបស់យើង?” ជាមួយនឹងវាគ្មិនកិត្តិយសដែលមានបទពិសោធ។ បន្ថែមលើនេះ ក៏មានដែរ ការច្រៀងចម្រៀងកម្សាន្តពីសំណាក់តារាចម្រៀងវ័យក្មេងជាច្រើនរូប និងការបង្ហាញពីវប្បធម៌ខ្មែរ អក្សរសាស្ត្រខ្មែរជាច្រើនទៀត។

ជាមួយនឹងចំនួនអ្នកចូលរួមជាង ១១ម៉ឺននាក់ ដែលជាទិន្នន័យគួរឱ្យសាទរមួយនេះ ក្រុមការងារតាំងពិព័រណ៍សៀវភៅបានសម្តែងនូវសេចក្តីរំភើបជាក្រៃលែង ថែមទាំងបានថ្លែងអំណរគុណដល់អ្នកចូលរួមគ្រប់រូប ហើយសង្ឃឹមថា នឹងជួបគ្នានៅការតាំងពីព័រណ៍សៀវភៅឆ្នាំក្រោយទៀត ជាមួយនឹងអ្នកចូលរួមកាន់តែច្រើនជាងនេះ។

សូមរំលឹកថា ពិព័រណ៍សៀវភៅកម្ពុជា គឺត្រូវបានរៀបចំឡើងជារៀងរាល់ឆ្នាំ ដោយក្រសួងអប់រំ យុវជន និងកីឡា ក្រសួងវប្បធម៌ និងវិចិត្រសិល្បៈ និងក្រសួងព័ត៌មាន។ មិនតែប៉ុណ្ណោះ ក៏មានដៃគូសហការរៀបចំកម្មវិធីជាច្រើនទៀត។ ដោយឡែក ឆ្នាំ២០២២នេះ គឺជាឆ្នាំទី០៩ នៃការរៀបចំពិព័រណ៍សៀវភៅថ្នាក់ជាតិមួយនេះក្នុងគោលបំណងលើកស្ទួយ និងផ្សព្វផ្សាយការអាននៅក្នុងប្រទេសកម្ពុជា ទៅដល់យុវជនជំនាន់ក្រោយ ដែលជាទំពាំងស្នងឫស្សីឱ្យកា្លយជាធនធានដ៏ល្អមួយ ដើម្បីអភិវឌ្ឍន៍ប្រទេសកាន់តែមានភាពរីកចម្រើនទៅមុខទៀត៕

ដោយ៖ អុន ស្រីមាន