សម្ដេចតេជោ ៖​ រដ្ឋនឹងដំឡើងប្រាក់បៀវត្សរ៍ជូនមន្ត្រីរាជការ កងកម្លាំង និងនិវត្តជន ចាប់ពីខែមករា ២០២៣តទៅ

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានគូសបញ្ជាក់ជាថ្មីថា ចាប់ពីដើមខែមករា ឆ្នាំ ២០២៣តទៅ មន្ត្រីរាជការ កងកម្លាំងប្រដាប់អាវុធ និវត្តជន និងអតីតយុទ្ធជន នឹងត្រូវទទួលបានការដំឡើងប្រាក់បៀវត្សរ៍ ក្រោយពីខកខានដំឡើងរយៈពេល ២ឆ្នាំ ដោយសារវិបត្តិជំងឺកូវីដ-១៩។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅក្នុងពិធីជួបសំណេះសំណាល ជាមួយប្រជាពលរដ្ឋខ្មែររស់នៅតំបន់អឺរ៉ុបជាង ២ពាន់នាក់ កាលពីល្ងាចថ្ងៃទី ១២ ខែធ្នូ ឆ្នាំ ២០២២ សម្ដេចតេជោ ហ៊ុន​ សែន បានថ្លែងថា រាជរដ្ឋាភិបាលកម្ពុជា នឹងដំឡើងប្រាក់បៀវត្សរ៍ ជូនមន្ត្រីរាជការ កងកម្លាំងប្រដាប់អាវុធ និវត្តជន និងអតីតយុទ្ធជន ចាប់ពីថ្ងៃទី ១ ខែមករា ឆ្នាំ ២០២៣តទៅ។

សម្ដេចតេជោ ហ៊ុន សែន បានថ្លែងយ៉ាងដូច្នេះថា «រាជរដ្ឋាភិបាល ក៏នឹងដំឡើងបៀវត្សរ៍ឲ្យមន្ត្រីរាជការ កងកម្លាំងប្រដាប់អាវុធ និវត្តជន និងអតីតយុទ្ធជន ចាប់ពីថ្ងៃទី ១ ខែមករា ឆ្នាំ ២០២៣តទៅ យើងខានឡើងប្រាក់ខែ ២ឆ្នាំហើយ ល្មមដល់ពេលឡើង»។

សម្ដេចតេជោនាយករដ្ឋមន្ត្រី លើកឡើងដែរថា ទោះបីជាក្នុងរយៈពេល ២ឆ្នាំ នៃវិបត្តិជំងឺកូវីដ-១៩ រាជរដ្ឋាភិបាល មិនបានដំឡើងប្រាក់បៀវត្សរ៍ទាំងអស់គ្នា តែរាជរដ្ឋាភិបាលបានដំឡើងប្រាក់ឧបត្ថម្ភដល់អ្នកដែលចូលនិវត្តន៍មុន ព្រោះអ្នកដែលចូលនិវត្តន៍មុន ទទួលបានប្រាក់ឧបត្ថម្ភនៅមានកម្រិតទាបនៅឡើយ៕