នៅថ្ងៃទី១៣ ខែធ្នូ ឆ្នាំ ២០២២ លោក ហ៊ុន ម៉ានី ប្រធានសហភាពសហព័ន្ធយុវជនកម្ពុជា និងជាប្រធានគណៈកម្មការរៀបចំព្រឹត្តិការណ៍អង្គរសង្រ្កាន្តបានបើកកិច្ចប្រជុំជាមួយរដ្ឋបាលខេត្តសៀមរាប ដឹកនាំដោយលោក ទៀ សីហា អភិបាលខេត្តសៀមរាប លើការងារត្រៀមរៀបចំព្រឹត្តិការណ៍អង្គរសង្រ្កាន្ត នៅឆ្នាំ២០២៣។

បើតាមលោក ហ៊ុន ម៉ានី គឺសហភាពសហព័ន្ធយុវជនកម្ពុជា គ្រោងនឹងរៀបចំព្រឹត្តិការណ៍អង្គរសង្ក្រាន្តជាថ្មីម្ដងទៀត នៅឆ្នាំ២០២៣ ដើម្បីអបអរសាទរពិធីបុណ្យចូលឆ្នាំថ្មីប្រពៃណីជាតិខ្មែរ ក៏ដូចជាដើម្បីរំលឹកខួបលើកទី១០ នៃព្រឹត្តិការណ៍អង្គរសង្ក្រាន្ត។

លោក ហ៊ុន ម៉ានី បានថ្លែងថា ព្រឹត្តិការណ៍អង្គរសង្ក្រាន្ត នៅឆ្នាំ២០២៣ ប្រារព្ធធ្វើឡើងក្រោមប្រធានបទ«ក្តីស្រមៃ និងក្តីសង្ឃឹម‌» ដែលនឹងនាំយកសម្បត្តិវប្បធម៌ ទំនៀមទម្លាប់ និងស្នាដៃរបស់បុព្វបុរសខ្មែរមកសម្តែងនៅទឹកដីដ៏ពិសិដ្ឋនៃតំបន់ឧទ្យានជាតិអង្គរ។ ទន្ទឹមនេះ ព្រឹត្តិការណ៍អង្គរសង្រ្កាន្ត ឆ្នាំ២០២៣ ខាងមុខ ក៏គ្រោងនឹងនាំយកកម្មវិធីរំលឹកអនុស្សាវរីយ៍សំខាន់ៗជាច្រើនទៀត ដើម្បីរំលេចឡើងនូវខួប ១០ ឆ្នាំរបស់ខ្លួនផងដែរ។

ក្នុងនាមរដ្ឋបាលខេត្តសៀមរាប លោក ទៀ សីហា បានសម្តែងនូវក្តីសោមនស្សរីករាយដែលព្រឹត្តិការណ៍អង្គរសង្រា្កន្តនឹងរៀបចំនៅឆ្នាំក្រោយនេះ។ លោកអភិបាលខេត្ត បានស្វាគមន៍ និងរងចាំចូលរួមផ្តល់កិច្ចសហការសម្របសម្រួល ដើម្បីឲ្យព្រឹត្តិការណ៍អង្គរសង្រ្កាន្តនេះប្រព្រឹត្តទៅដោយជោគជ័យ។

ជាមួយគ្នានេះ លោក ទៀ សីហា បានរំលេចដែរថា ព្រឹត្តិការណ៍នេះ នឹងផ្តល់ជាឱកាសចូលរួមដ៏អធិកអធម និងសប្បាយរីករាយសម្រាប់ប្រជាពលរដ្ឋនៅក្នុងខេត្ត និងជួយទាក់ទាញភ្ញៀវទេសចរណ៍ទាំងជាតិ និងអន្តរជាតិមកលេងកម្សាន្តនៅខេត្តសៀមរាបផងដែរ។

គួរជម្រាបថា នៅពិធីបិទព្រឹត្តិការណ៍កីឡាជាតិលើកទី៣ និងកីឡាជនពិការលើកទី១ នាពេលកន្លងទៅនេះ សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា បានប្រកាសថា នឹងមានព្រឹត្តិការណ៍អង្គរសង្រ្កាន្តឡើងវិញនៅឆ្នាំក្រោយនេះ។ ទន្ទឹមនេះ ស.ស.យ.ក ក្នុងនាមជាម្ចាស់គម្រោងបាននិងកំពុងត្រៀមលក្ខណៈធ្វើយ៉ាងណាដើម្បីឲ្យព្រឹត្តិការណ៏អង្គរ ឆ្នាំ២០២៣ ក្លាយជាព្រឹត្តិការណ៍ដែលផ្តល់ភាពសប្បាយរីករាយដល់ប្រជាពលរដ្ឋក្នុងឱកាសឆ្នាំថ្មីខាងមុខនេះផងដែរ៕

ដោយ៖ ធឿន វ៉ាន់សុង