សម្ដេចតេជោ ហ៊ុន សែន បង្ហាញរូបភាពដ៏ស្និទ្ធស្នាលជាមួយប្រធានាធិបតីបារាំង

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានបង្ហាញរូបភាពជាច្រើនសន្លឹកអំពីជំនួបដ៏ស្និទ្ធ​ស្នាលរវាងសម្ដេច ជាមួយលោក អេម៉ានូអែល ម៉ាក្រុង ប្រធានាធិបតីបារាំង។

សម្ដេចតេជោ ហ៊ុន សែន បានសរសេរនៅលើទំព័រហ្វេសប៊ុក នៅព្រឹកថ្ងៃទី ១៤ ខែធ្នូនេះថា «ដៃគូសន្ទ​នាដ៏ស្និទ្ធស្នាល ស្មោះត្រង់ និងជឿទុកចិត្តគ្នា ដើម្បីពង្រឹងពង្រីកមិត្តភាពរវាងកម្ពុជា និងបារាំង»។ ជាមួយគ្នានេះ សម្ដេចតេជោ ហ៊ុន សែន ក៏បានអរគុណលោកប្រធានាធិបតីបារាំង អេម៉ានូអែល ម៉ាក្រុង ដែលបានផ្តល់នូវការស្រឡាញ់រាប់អានសម្ដេច។

សូមជម្រាបថា កាលពីនៅយប់រំលងអាធ្រាត ម៉ោង ១ និង ៤៥នាទី ម៉ោងនៅទីក្រុងប៉ារីស ប្រទេសបារាំង ត្រូវនឹងម៉ោង ៧ និង ៤៥នាទាទីព្រឹក ម៉ោងនៅរាជធានីភ្នំពេញ នាថ្ងៃទី ១៣ ខែធ្នូ ឆ្នាំ ២០២២ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានបន្តដឹកនាំគណៈប្រតិភូ តាមជើងយន្តហោះពិសេសទៅដល់អាកាសយានដ្ឋានអន្តរជាតិ Paris Charles de Gaulle ទីក្រុងប៉ារីស។

ការអញ្ជើញដល់របស់សម្ដេចតេជោ នាយករដ្ឋមន្ត្រី និងគណៈប្រតិភូ គឺត្រូវបានទទួលស្វាគមន៍យ៉ាងកក់ក្ដៅពីមន្ត្រីជាន់ខ្ពស់របស់បារាំង និងមន្ត្រីការទូតកម្ពុជា ប្រចាំនៅបារាំងជាច្រើនរូប។ តាមកម្មវិធីគ្រោងទុក ក្នុងពេលបំពេញទស្សនកិច្ចនៅក្នុងប្រទេសបារាំង សម្ដេចតេជោ នឹងអញ្ជើញចូលរួមសន្និ​សីទគាំទ្រភាពធន់នៃប្រជាជនអ៊ុយក្រែន កិច្ចប្រជុំក្រុមប្រឹក្សា សហគ្រាសកម្ពុជា-បារាំង។

ចំណែកក្រសួងការបរទេសកម្ពុជា ក៏បានឲ្យដឹងដែរថា ក្នុងពេលបំពេញទស្សនកិច្ចការងារនៅប្រទេបារាំង គឺលោក អេម៉ានូអែល ម៉ាក្រុង ប្រធានាធិបតីបារាំង នឹងទទួលស្វាគមន៍សម្តេចតេជោ នៅវិមានអេលីហ្សេ (Élysée Palace) ហើយនឹងរៀបចំអាហារការងារពេលល្ងាចជាកិត្តិយស ជូនសម្តេចតេជោផងដែរ៕