ព័ត៌មានជាតិ

សារមន្ទីរមីនលើផ្ទៃដីទំហំ ១២ ហិចតា នឹងលេចរូបរាងនៅខេត្តសៀមរាប

បានផុស

១ year មុន

នៅ

ថ្ងៃពុធ ១៤ ធ្នូ ២០២២

ដោយ

លោក ហេង រតនា ប្រតិភូរាជរដ្ឋាភិបាលទទួលបន្ទុកជាអគ្គនាយក CMAC បានឱ្យដឹងថា អង្គភាព CMAC នឹងសង់សារមន្ទីរសន្តិភាពសកម្មភាពមីននៅខេត្តសៀមរាបលើផ្ទៃដី ១២ ហិចតាដោយប្រើរយ:ពេលសាងសង់ ៣ ឆ្នាំជាជំនួយហិរញ្ញប្បទានឥតសំណងរបស់រដ្ឋាភិបាលជប៉ុន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមរយៈផេកហ្វេប៊ុកកាលពីថ្ងៃម្សិលមិញ លោក ហេងរតនា បានសរសេរថា «ខ្ញុំ រួមជាមួយថ្នាក់ដឹកនាំនៃអង្គភាពCMAC បានចុះពិនិត្យមើលទីតាំងដើម្បីត្រៀមអនុវត្តការសាងសង់សារមន្ទីរសន្តិភាពសកម្មភាពមីន ដែលមានទំហំ ៥២ម×៥២ម កំពស់១៧ម៉ែត្រ បូកសំណង់ខាងក្រៅអាគារមួយចំនួនទៀត»។

លោកអគ្គនាយកបានសរសេរទៀតថា បេសកកម្មនៃការកសាងសារមន្ទីរសន្តិភាពនេះមានពីរគឺ៖ ទី១. ការកសាងអាគារដ៍សំខាន់ជាប្រវត្តិសាស្ត្រ អាគាររាងជាគ្រាប់មីនប្រឆាំងមនុស្សធំជាងគេលេីពិភពលោក ជាធាតុរឹងក្នុងការរចនាសំណង់សិល្បះនៃសារមន្ទីរនិងទី២. ការកសាងធាតុទន់៖ រួមមានការកសាងធនធានមនុស្សគ្រប់គ្រងសារមន្ទីរ និងការកសាងឯកសាររឿងរ៉ាវប្រវត្តិសាស្ត្រដែលប្រជាជនកម្ពុជាបានទទួលរងទុក្ខវេទនាក្នុងសង្គ្រាម និងបន្តប្រឈមមុខជាមួយសំណល់យុទ្ធភណ្ឌមិនទាន់ផ្ទុះក្រោយសង្គ្រាម។ ទន្ទឹងនឹងនេះត្រូវប្រមូលភស្តុតាងប្រវត្តិសាស្ត្រ សំរាប់មនុស្សជំនាន់នេះចងចាំនិងមនុស្សក្រោយៗទៀតបានសិក្សាស្វែងយល់។