ភរិយាឧកញ៉ា លី ឃុនថៃ លោកស្រី ខា ឡេង ជានរណា?

លោកស្រី ខា ឡេង ត្រូវបានគេស្គាល់ថា ជាភរិយារបស់លោកឧកញ៉ា លី ឃុនថៃ ទីប្រឹក្សាសម្ដេចតេជោ ហ៊ុន សែន និងជាប្រធានសមាគមស្បែកជើងកម្ពុជា។ កើតឆ្នាំ១៩៨២ លោកស្រី ខា ឡេង មានស្រុកកំណើតនៅសង្កាត់លេខ៣ រាជធានីភ្នំពេញ ហើយលោកស្រីបានបញ្ចប់ការសិក្សាថ្នាក់បណ្ឌិតផ្នែកច្បាប់។

សម្រាប់ការងាររដ្ឋវិញ លោកស្រី ខា ឡេង កំពុងបម្រើការនៅក្រសួងពាណិជ្ជកម្ម ដែលមានមុខតំណែងជារដ្ឋលេខាធិការក្រសួងពាណិជ្ជកម្ម ទទួលបន្ទុកលើកិច្ចការលើកស្ទួយស្រ្តី និងយេនឌ័រក្នុងវិស័យធុរកិច្ចពាណិជ្ជកម្ម បន្ទាប់ពីលោកស្រី ធ្លាប់បានធ្វើជាអនុរដ្ឋលេខាធិការ។ ក្រៅពីនេះ លោកស្រី ក៏ជាមេធាវីផងដែរ ប៉ុន្តែមិនប្រកបវិជ្ជាជីវៈ។

ដោយឡែក សម្រាប់ការងារគណបក្ស និងកិច្ចការសង្គមវិញ លោកស្រី ខា ឡេង ជាសមាជិកានៃក្រុមការងារគ្រប់គ្រងនិស្សិតអាហាររូបករណ៍សម្តេចតេជោ ហ៊ុន សែន និងជាអនុប្រធានក្រុមការងារគណបក្សប្រជាជនកម្ពុជាចុះជួយឃុំត្រពាំងព្រះ ស្រុកព្រៃឈរ និងជាប្រធានក្រុមការងារចុះជួយឃុំសណ្តែក ស្រុកបាធាយ ខេត្តកំពង់ចាម៕

ដោយ៖ ធឿន វ៉ាន់សុង