ព័ត៌មានជាតិ
៥ឆ្នាំ ស្ថាប័នរដ្ឋ និងឯកជនទទួលយកជនមានពិការភាពចូលបម្រើការងារជិត ៤ម៉ឺននាក់
នៅក្នុងរយៈពេល ៥ឆ្នាំនេះ ស្ថាប័នរដ្ឋ និងឯកជនបានទទួលយកជនមានពិការភាពចូលបម្រើការងារប្រមាណជិត ៤ ម៉ឺននាក់ ក្នុងនោះវិស័យឯកជនជាង ២ ម៉ឺននាក់។
ថ្លែងក្នុងវេទិកាជាតិស្តីពី ការងារ និងមុខរបរប្រកបដោយបរិយាបន្ន សម្រាប់ជនមានពិការភាព ឆ្នាំ២០២២ នៅថ្ងៃទី២៣ ខែធ្នូនេះ លោកស្រី ព្រុំ សុខន អគ្គនាយករង នៃអគ្គនាយកដ្ឋានស្តារសម្បទារបស់ ក្រសួងសង្គមកិច្ច អតីតយុទ្ធជន និងយុវនីតិសម្បទា បានឱ្យដឹងថា ក្នុងរយៈពេល ៥ឆ្នាំចុងក្រោយនេះ (ឆ្នាំ២០១៨-២០២២) ជនពិការទទួលបានឱកាសសេដ្ឋកិច្ចពីកម្មវិធីសហការជាមួយអង្គការដៃគូមានចំនួនជាង ៧ ពាន់នាក់, ជនពិការត្រូវបានជ្រើសរើសឱ្យចូលបម្រើការងារនៅតាមស្ថាប័នរដ្ឋ មានជាង ១ម៉ឺន ៦ពាន់នាក់, និងជនពិការត្រូវបានជ្រើសរើសឱ្យចូលបម្រើការងារនៅតាមស្ថាប័នឯកជន មានជាង ២ម៉ឺននាក់ ខណៈជនពិការក្រីក្រនៅតាមសហគមន៍ទទួលបានរបបឧបត្ថម្ភគោលនយោបាយ មានរហូតដល់ជាង ៨ម៉ឺននាក់។
លោកស្រី បានបន្តថា ចាប់តាំងពីឆ្នាំ១៩៨៧ រហូតមកដល់ឆ្នាំ២០២២ ជនពិការជាង ១ម៉ឺន ៧ពាន់នាក់ បានទទួលការបណ្តុះបណ្តាលជំនាញវិជ្ជាជីវៈពី មជ្ឈមណ្ឌលអភិវឌ្ឍន៍សង្គមពោធិ៍សែនជ័យ JCIA និងអង្គការបន្ទាយព្រាប JSC ក្នុងនោះរយៈពេល ៥ឆ្នាំចុងក្រោយនេះ មជ្ឈមណ្ឌលបណ្តុះបណ្តាលវិជ្ជាជីវៈជនពិការទាំងពីរ បានបណ្តុះបណ្តាលសិស្សជាង ៣០០នាក់, ប្រកបមុខរបរចំនួន ១១១នាក់, និងបម្រើការងារចំនួន ៥៦នាក់។
លោក ហាច ហ៊ាន អនុរដ្ឋលេខាធិការ ក្រសួងសង្គមកិច្ច អតីតយុទ្ធជន និងយុវនីតិសម្បទា ស្នើឱ្យវិស័យឯកជនបន្តទទួលយកជនមានពិការភាពចូលបម្រើការងារ ស្របតាមច្បាប់ស្តីពីកិច្ចការពារ និងលើកកម្ពស់សិទ្ធិជនពិការ ដើម្បីធានាឱ្យមានការពង្រឹងគុណភាពសេវា និងការជួយគាំទ្រជនមានពិការភាពឱ្យទទួលបានឱកាសការងារ និងការពង្រឹងសេដ្ឋកិច្ចគ្រួសារឱ្យបានកាន់តែប្រសើរឡើង។
លោកបានបន្តថា ការទទួលយកជនមានពិការភាពចូលបម្រើការងារក្នុងវិស័យឯកជន គឺជាការចូលរួមបង្កើនឱកាសសេដ្ឋកិច្ចបន្ថែម សម្រាប់ជនមានពិការភាព ព្រមទាំងពង្រឹងភាពអង់អាច និងសមត្ថភាពសមស្របសម្រាប់ជនមានពិការ ដើម្បីពួកគេអាចចាប់យកឱកាសទាំងនោះ ដើម្បីជីវភាព និងជិវិតឯករាជ្យ។
លោក ហាច ហ៊ាន បានឱ្យដឹងទៀតថា រាជរដ្ឋាភិបាល តែងតែជំរុញឱ្យក្រសួងស្ថាប័នរដ្ឋ និងវិស័យឯកជន ឱ្យទទួលជនមានពិការភាពចូលបម្រើការងារ តាមអត្រាកំណត់ដូចមានចែងក្នុងអនុក្រឹត្យស្តីពី ការជ្រើសរើសជនមានពិការភាព ចូលបម្រើការងារ ដែលមាន ២ភាគរយសម្រាប់ស្ថាប័នរដ្ឋ និង ១ភាគរយសម្រាប់វិស័យឯកជន៕
អត្ថបទ៖ សំអឿន
-
កីឡា៥ ថ្ងៃ ago
ឈ្នះខ្សែក្រវាត់ថ្ងៃជាមួយ ឈឿង ល្វៃ កីឡាករ Erdene ក៏មានរថយន្តទទួល
-
ព័ត៌មានជាតិ៤ ថ្ងៃ ago
ម្ចាស់សំណង់របងថ្មនៅរមណីយដ្ឋានឆ្នេរនេសាទ នៅតែរឹងទទឹងមិនព្រមវាយកម្ទេចរបងចេញ
-
សេដ្ឋកិច្ច១ សប្តាហ៍ ago
តាសក់ផ្អែម ៥ តោន របស់ កសិករម្នាក់ លក់ចេញអស់ ក្រោយសហគមន៍កសិកម្មជួយរកទីផ្សារ
-
ព័ត៌មានអន្ដរជាតិ១ សប្តាហ៍ ago
នាឡិកា ៦ គ្រឿងរបស់កូនពៅសេដ្ឋី ឥណ្ឌា ដែលខំសន្សំទុក មានមួយមេ Facebook ទាក់ចិត្តខ្លាំង
-
សន្តិសុខសង្គម៦ ថ្ងៃ ago
ដកហូតមុខតំណែង មេបញ្ជាការរងស្រុកស្វាយជ្រុំ៣នាក់ ពាក់ព័ន្ធករណីទារប្រាក់ពីអ្នកប្រើប្រាស់គ្រឿងញៀនជាង១ពាន់ដុល្លារ
-
ជីវិតកម្សាន្ដ៧ ថ្ងៃ ago
មនុស្សស្និទ្ធស្នាលទម្លាយពីស្ថានភាព Ngoc Trinh ក្រោយចេញពីពន្ធនាគារជាង៣ខែ
-
ព័ត៌មានជាតិ៤ ថ្ងៃ ago
ដើម្បីកុំឱ្យភោជនីយដ្ឋានដួលរលំបះជើងទាន់ សម្ដេចធិបតី បញ្ជាឱ្យកែម៉ោងពិនិត្យជាតិអាល់កុល
-
ជីវិតកម្សាន្ដ៥ ថ្ងៃ ago
តួជនទី៣ Benz ត្រលប់មកតំណែងស្រីស្អាតម្ដងទៀត ទោះឈានដល់អាយុ៤៣ឆ្នាំ