សម្ដេចតេជោ ហ៊ុន សែន​នឹងអញ្ជើញបើកការដ្ឋាន​សាងសង់​ពង្រីកផ្លូវជាតិលេខ​ ៤១ ថ្ងៃស្អែក​

សម្ដេចតេជោ ហ៊ុន សែន នាយករដ្ឋមន្ត្រីកម្ពុជានៅព្រឹកថ្ងៃទី ២៦ ខែធ្នូ ឆ្នាំ ២០២២នឹងអញ្ជើញជាអធិបតីភាពបើក​ការដ្ឋានសាងសង់​ពង្រីក និងលើកកម្រិតផ្លូវជាតិលេខ៤១ ដែលតភ្ជាប់ផ្លូវជាតិលេខ ៤ ពីថ្នល់ថ្នល់ទទឹង ខេត្តកណ្ដាល ដល់ផ្លូវជាតិលេខ៣ ក្នុងស្រុកជុំគិរី ខេត្តកំពត។

ផ្លូវជាតិលេខ ៤១ ត្រូវបានស្ថាបនាក្នុងឆ្នាំ ២០១៤ ជាកំណាត់ផ្លូវសំខាន់តភ្ជាប់ពីផ្លូវជាតិលេខ ៤ ទៅ​ខេត្តកំពត ខណៈកន្លងផ្លូវមួយខ្សែនេះរងការខូច​ខាតបង្កការ​លំបាកធ្វើដំណើរ​សម្រាប់ប្រជាពលរដ្ឋ។

មន្ទីរសារធារណការ និងដឹកជញ្ជូនខេត្តកំពង់ស្ពឺបានផ្សព្វផ្សាយកាលពីពេលកន្លងមកថា ផ្លូវជាតិលេខ ៤១ ស្ថិតក្នុងគម្រោងធ្វើឱ្យប្រសើរឡើងវិញ​ក្រោមហិរញ្ញប្បទានសហប្រតិបត្តិការពីសាធារណរដ្ឋប្រជាមានិតចិន។​ ក្រុមហ៊ុន CRBC ជាក្រុមហ៊ុនដេញថ្លៃសម្រាប់ការសាងសង់លើគម្រោងនេះ។

គម្រោងសាងសង់ផ្លូវជាតិលេខ៤១ មានប្រវែងសរុប ៩៥,២៧គីឡូម៉ែត្រ ចាប់ពីថ្នល់ទទឹង ត្រង់ចំណុចប្រសព្វផ្លូវជាតិលេខ៤ ខេត្តកណ្តាល ទៅដល់ស្រុកជុំគីរី ត្រង់ចំណុចប្រសព្វផ្លូវជាតិលេខ៣ ខេត្តកំពត នឹងត្រូវសាងសង់លើកកម្រិតគុណភាពជាប្រភេទផ្លូវក្រាលបេតុងកៅស៊ូAC កម្រាស់ ៥សង់ទីម៉ែត្រ និងពង្រីកទទឹងតួផ្លូវរហូតដល់ ១២ម៉ែត្រ ទៅតាមតាមស្តង់ដារកម្រិត២។

គម្រោងនេះ នឹងសាងសង់បន្ថែមសំណង់សិល្បការ្យរួមមាន ពង្រីកស្ពានចាស់ ០១កន្លែង ប្រវែងសរុប ២០០ម៉ែត្រ ដាក់លូគ្រប់ប្រភេទចំនួន ៣១៥កន្លែង បំពាក់កាមេរ៉ាត្រួតពិនិត្យល្បឿនចំនួន០៨កន្លែង រួមទាំងបំពាក់ផ្លាកសញ្ញា គំនូសសញ្ញា បង្គោលគីឡូម៉ែត្រ និងបង្គោលសុវត្ថិភាពផងដែរ៕