ព័ត៌មានជាតិ

ឆ្នាំ ២០២៣ រុស្សី មានគម្រោងបញ្ជូនមន្ត្រីនគរបាលជាតិកម្ពុជា ទៅបណ្ដុះបណ្ដាលក្នុងវិស័យសន្តិសុខផ្សេងៗ នៅប្រទេសរុស្សី

បានផុស

៤ years មុន

នៅ

ថ្ងៃសុក្រ ៣០ ធ្នូ ២០២២

ដោយ

នៅឆ្នាំ ២០២៣ ខាងមុខនេះ សហព័ន្ធរុស្សី មានគម្រោងបញ្ជូនមន្ត្រីនគរបាលជាតិកម្ពុជា ទៅបណ្ដុះបណ្ដាលក្នុងវិស័យសន្តិសុខផ្សេងៗនៅប្រទេសរុស្សី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គម្រោងនេះ ត្រូវបានបង្ហាញដោយ លោក Anatoly BOROVIK ឯកអគ្គរដ្ឋទូតសហព័ន្ធរុស្សី ប្រចាំនៅព្រះរាជាណាចក្រកម្ពុជា ក្នុងឱកាសចូលជួបសម្ដែងការគួរសម និងពិភាក្សាការងារជាមួយ សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ កាលពីរសៀលថ្ងៃទី ២៩ ធ្នូ នាទីស្ដីការក្រសួង។

លោកឯកអគ្គរដ្ឋទូត បានលើកឡើងថា ភ្នាក់ងារអនុវត្តច្បាប់រុស្សី បានធ្វើការងារយ៉ាងជិតស្និទ្ធជាមួយភ្នាក់ងារអនុវត្តរបស់កម្ពុជា ដែលក្នុងនោះមានកិច្ចសហប្រតិបត្តិការលើការងារបណ្ដុះបណ្ដាលដល់មន្ត្រីនគរបាលជាតិកម្ពុជា នៅប្រទេសរុស្សី ក្នុងវិស័យសន្តិសុខផ្សេងៗ រួមមាន ការប្រឆាំងឧក្រិដ្ឋកម្មឆ្លងដែន ការប្រឆាំងអំពើភេរវកម្ម ការប្រឆាំងសកម្មភាពជ្រុលនិយម និងការប្រឆាំងការលាងលុយកខ្វក់ (គ្រីតូ) ផងដែរ។

លោកឯកអគ្គរដ្ឋទូត ជម្រាបជូន សម្ដេចក្រឡាហោម ថា នៅឆ្នាំថ្មីខាងមុខនេះ ប្រទេសរុស្សី មានគម្រោង និងរៀបចំនូវវគ្គបណ្ដុះបណ្ដាលថ្មី ព្រមទាំងនឹងត្រៀមទទួលមន្ត្រីនគរបាលរបស់ភាគីកម្ពុជាឲ្យចូលរួមក្នុងវគ្គបណ្ដុះបណ្ដាលនេះផងដែរ។

ក្នុងឱកាសនោះ លោកឯកអគ្គរដ្ឋទូត បានស្នើដល់ កម្ពុជា បន្ថែមកិច្ចសហប្រតិបត្តិការ ក្នុងការពង្រីកកិច្ចសហប្រតិបត្តិការរវាងប្រទេសទាំងពីរ មានគិតចាប់តាំងពីឆ្នាំ ១៩៩១ មក មានឯកសារ នៃកិច្ចសហប្រតិបត្តិការចំនួន ៧៤ ច្បាប់ ដែលបានចុះហត្ថលេខា និងកំពុងអនុវត្ត និងមាននៅសល់ឯកសារ នៃកិច្ចសហប្រតិបត្តិការមួយចំនួនទៀត ស្ថិតក្នុងដំណាក់កាលសិក្សា មិនទាន់បានចុះហត្ថលេខានៅឡើយ។

ផ្អែកតាមការងារដែលនៅសេសសល់នេះ លោកឯកអគ្គរដ្ឋទូត សូមស្នើដល់ សម្ដេចក្រឡាហោម ដើម្បីជួយពិនិត្យ និងពន្លឿនលើកិច្ចការងារទាំងនេះឲ្យបានឆាប់រហ័ស។

ជាការឆ្លើយតប សម្ដេចក្រឡាហោម ស ខេង បានថ្លែងអំណរគុណបន្ថែមទៀតដល់ប្រទេសរុស្ស៊ី ដែលបានជួយបណ្ដុះបណ្ដាលមន្ត្រីនគរបាលជាតិកម្ពុជា។

ពាក់ព័ន្ធទៅនឹងលាងលុយកខ្វក់តាមរយៈរូបិយប័ណ្ណនិម្មិតគ្រីតូនេះដែរ សម្ដេចក្រឡាហោម ក៏បានលើកឡើងដែរថា ការប្រើប្រាស់រូបិយប័ណ្ណនិម្មិតគ្រីតូ ដូចដែលភាគីរុស្ស៊ីកំពុងព្រួយបារម្ភ គឺជាបញ្ហាទាមទារឲ្យមានការយកចិត្តទុកដាក់ខ្ពស់ ព្រោះជនល្មើសប្រើវិធីនេះដើម្បីលាងលុយកខ្វក់ និងប្រព្រឹត្តបទល្មើសឆ្លងដែន។

ដោយឡែកចំពោះឯកសារ នៃកិច្ចសហប្រតិបត្តិការដែលនៅសេសសល់ សម្ដេច សន្យាថា នឹងជំរុញមន្ត្រីពាក់ព័ន្ធធ្វើយ៉ាងណាជំរុញការងារនេះឲ្យមានវឌ្ឍនភាពបានលឿន៕

អត្ថបទ ៖ សំអឿន