ព័ត៌មានជាតិ

រាជបណ្ឌិត្យសភាកម្ពុជា បន្តបេសកកម្មរុករកតំបន់ទេសចរណ៍នៅកម្ពុជា

បានផុស

៣ years មុន

នៅ

ថ្ងៃសុក្រ ៦ មករា ២០២៣

ដោយ

ក្រោយបញ្ចប់ខេត្តក្រុងចំនួន ២៣ ក្រុមការងាររបស់រាជបណ្ឌិត្យសភាកម្ពុជានឹងចុះទៅខេត្តគោលដៅចំនួនពីរទៀតក្នុងបេសកកម្មបញ្ចប់ការរុករកតំបន់ទេសចរណ៍កម្ពុជាទូទាំង ២៥ ខេត្តក្រុង ដើម្បីផ្សព្វផ្សាយនៅលើវេបសាយនិងកម្មវិធីទូរសព្ទដៃ (App)។

លោក ឈិត វណ្ណឫទ្ធិ ប្រធានក្រុមដឹកនាំបេសកកម្មបានប្រាប់កម្ពុជាថ្មីថា នៅពាក់កណ្តាលខែមករានេះ ក្រុមការងារនឹងបន្តបើកយុទ្ធនាការរុករកតំបន់ទេសចរណ៍ក្នុងខេត្តគោលដៅចំនួនពីរទៀតគឺសៀមរាប និងព្រះវិហារ ក្នុងដំណើររុករកតំបន់ទេសចរណ៍ទូទាំងប្រទេសដើម្បីយកមកផ្សព្វផ្សាយនៅលើគេហទំព័រ និងនៅលើ App ទូរសព្ទដៃ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោករំពឹងទុកថា ដំណើរបេសកកម្មនេះនឹងទទួលបានជោគជ័យ បើទោះបីក្រុមការងារអាចជួបបញ្ហាប្រឈមខ្លះសម្រាប់ដំណើរចុះការងារលើកនេះក៏ដោយ។

»ជាធម្មតាការដើររុករកតំបន់ទេសចរណ៍នៅតាមតំបន់ប្រជុំជនមិនអីទេ តែតំបន់ខ្លះនៅឆ្ងាយពិបាកផ្លូវធ្វើដំណើរ កន្លែងខ្លះត្រូវដើរថ្មើរជើងរុករកតាមព្រៃ ហើយត្រូវដេកតាមផ្លូវក៏មានដែរ«។

លោកបញ្ជាក់ថា ខេត្តទាំងពីរនេះជាខេត្តគោលដៅចុងក្រោយសម្រាប់បេសកកម្មរុករកតំបន់ទេសចរណ៍ទាំង ២៥ ខេត្តក្រុងទូទាំងប្រទេស។ តាមការចុះប្រមូលទិន្នន័យបឋមក្នុងខេត្តគោលដៅទាំងពីរ អាចមានទីតាំងតំបន់ទេសចរណ៍ប្រមាណ ៤០០ កន្លែង ដែលក្រុមការងារនឹងចុះស្រាវជ្រាវដល់ទីតាំងដើម្បីកត់ត្រាអាប់ដេតបន្ថែមចូលលើវេបនិងអេប។

លោកបន្តថា ក្រោយបញ្ចប់គម្រោងនេះនឹងជាផ្នែកមួយជួយផ្សព្វផ្សាយវិស័យទេសចរណ៍កម្ពុជាឲ្យបានទូលំទូលាយ អាចឲ្យភ្ញៀវទេសចរងាយស្រួលសម្រេចចិត្តជ្រើសរើសដំណើរកម្សាន្ត ពេលមកទស្សនាប្រទេសកម្ពុជា។ ជាមួយគ្នានេះ ក៏នឹងកាត់បន្ថយកត្តាអវិជ្ជមានឲ្យបានអតិបរមា គឺការកេងចំណេញទៅលើភ្ញៀវទេសចរពីសំណាក់អ្នកផ្តល់សេវាកម្ម។

គម្រោងរយៈពេល ៣ ឆ្នាំ (២០២១-២០២៣) របស់រាជបណ្ឌិត្យសភាកម្ពុជាលើការបង្កើតវេបសាយទេសចរណ៍កម្ពុជា មានគោលបំណងបង្កើតកម្មវិធីទេសចរណ៍ សម្រាប់ប្រើប្រាស់នៅលើវេបនិងកម្មវិធីទូរសព្ទដៃ ដែលបង្ហាញលម្អិតអំពីតំបន់ទេសចរណ៍ក្នុងប្រទេសកម្ពុជា។ ក្នុងនោះក៏មានបង្កើតជាផែនទីបង្ហាញផ្លូវដល់ទេសចរជាតិនិងអន្តរជាតិ។

លោក ឈិត វណ្ណឫទ្ធិ គម្រោងនេះនឹងបង្កើនសក្ដានុពលទេសចរណ៍របស់ប្រទេសកម្ពុជា តាមរយៈទិន្នន័យដែលក្រុមការងារបានចុះស្រាវជ្រាវចងក្រង អាចបង្ហាញដល់ទេសចរជាតិនិងអន្តរជាតិ ស្វែងរកពីតំបន់គោលដៅទេសចរណ៍ក្នុងប្រទេសកម្ពុជា ដោយមានបង្ហាញពីព័ត៌មានលម្អិតរួមទាំងផែនទីបង្ហាញផ្លូវធ្វើដំណើរផងដែរ។

គម្រោងបង្កើតវេបសាយទេសចរណ៍កម្ពុជារបស់រាជបណ្ឌិត្យសភាកម្ពុជា រៀបចំឡើងមានទាំងភាសាខ្មែរ អង់គ្លេស ចិន រុស្សី និងភាសាផ្សេងៗទៀត៕