រដ្ឋបាលខេត្តបាត់ដំបង បង្ហូរទឹកស្ទឹងចេញមួយ​ភាគធំ ដើម្បីសម្អាតបរិស្ថានបាតស្ទឹង និងជួស​ជុលច្រាំង

កាលពីចុងខែធ្នូ កន្លងទៅថ្មីៗនេះ លោក សុខ លូ អភិបាលនៃអភិបាលខេត្តបាត់ដំបង បានលើកឡើងថា អាជ្ញាធរ ត្រៀម​នឹងបង្ហូរទឹកស្ទឹងសង្កែមួយភាគធំទម្លាក់ទៅកាន់ផ្នែក​ខាងក្រោម បឹងទន្លេសាប ដើម្បីសម្អាតអនាម័យ បរិស្ថានបាតស្ទឹង ដងស្ទឹង ពិសេសត្រង់ចំណុចទីប្រជុំជនក្រុងបាត់ដំបងតែម្តង ដែលមានប្រវែង រាប់សិបគីឡូម៉ែត្រ។  ដោយលោកអភិបាលខេត្តបានសង្កត់ធ្ងន់ថា ការស្តារដើម្បីរៀបចំឆ្នេរស្ទឹង គឺត្រូវបង្ហូរទឹកស្ទឹងសង្កែមួយភាគធំចេញ ដោយមន្ត្រីជំនាញនេះ គ្រោងនឹងធ្វើឡើង​នៅដើមខែមករា ឆ្នាំ២០២៣ នេះ។

ជាមួយនឹងគម្រោងផែនការស្តារបាតស្ទឹងនេះដែរ គឺជាការលើកកម្ពស់សោភ័ណភាពដងស្ទឹង ដោយលោកអភិបាលខេត្ត សុខ លូ បានជំរុញដល់បណ្តាអាជ្ញាធរមូលដ្ឋាន ដែលស្ថិតនៅជាប់ដងស្ទឹងចំនួន៤ ក្រុង ស្រុក រួមមាន ក្រុងបាត់ដំបង ស្រុកបាណន់ ស្រុកសង្កែ និងស្រុកឯកភ្នំ ថែមទាំងបំផុសដល់ប្រជាពលរដ្ឋឲ្យចូលរួមក្នុងយុទ្ធនាការប្រមូលសំរាម និងពន្លឿនចុះណែនាំដល់ពលរដ្ឋទាំងអស់ ឲ្យចូលរួមថែរក្សាអនាម័យកុំឲ្យចោលសំរាមក្នុងស្ទឹងសង្កែ ឬក្នុងព្រែក ប្រឡាយ បឹងបួទាំងឡាយ សំដៅលើកស្ទួយមុខមាត់ ក្នុងមូលដ្ឋានចៀសផុតពីជំងឺផ្សេងៗ និងលើកកម្ពស់ដល់វិស័យទេចរណ៍ ឲ្យល្អប្រសើរឡើង ដើម្បីទាក់ទាញភ្ញៀវទេសចរជាតិអន្តរជាតិឲ្យមានចំនួនកាន់តែច្រើនថែមទៀត។     

បណ្តោយស្ទឹងសង្កែ ដែលស្ថិតក្នុងគម្រោងសម្អាតអនាម័យ មិនធ្លាប់មានពីមុនមកនោះ គឺចាប់ពីស្រុកបាណន់ លាតសន្ធឹងកាត់ក្រុងបាត់ដំបង ដល់ទំនប់ស្ទាក់ទឹក សាលាតាអន របស់ស្រុកឯកភ្នំ មានប្រវែងរាប់សិបគីឡូម៉ែត្រ ដោយឡែក ចំពោះទីកន្លែងច្រាំងស្ទឹង ដែលត្រូវរៀបចំកែលម្អសាងសង់ឡើងវិញ ក្នុងទីប្រជុំជនក្រុង មានចំនួន៥កន្លែង។

ក្រោយបញ្ចប់គម្រោងមន្ត្រីជំនាញ នឹងបើកទម្លាក់ទឹកចុះមកវិញដោយរក្សាទឹកក្នុងកម្ពស់ពី១២ម៉ែត្រ ដល់ជាង១៣ម៉ែត្រ ខណ:ទឹកស្ទឹងសង្កែ​ក្រោមសភាពពណ៌ស្លែ បច្ចុប្បន្នមានកម្ពស់ ១០,៣០ ម៉ែត្រ តែប៉ុណ្ណោះ៕

អត្ថបទ៖ សោ និយមរ័ត្ន