ពិព័រណ៍ការងារ នឹងធ្វើឡើងមួយថ្ងៃពេញ នៅCJCC

មជ្ឈមណ្ឌលប្រតិ្តបត្តិការកម្ពុជា-ជប៉ុន (CJCC) នឹងរៀបចំកម្មវិធី «CJCC-ពិព័រណ៏ការងារ ឆ្នាំ២០២៣» រយៈពេលមួយថ្ងៃ ដើម្បីផ្តល់ឱកាសការងារផ្សេងៗសម្រាប់សិស្ស និស្សិត និងសាធារណជនដែលត្រូវការការងារ។

«CJCC-ពិព័រណ៏ការងារ ឆ្នាំ២០២៣» នឹងធ្វើឡើងនៅថ្ងៃទី១៥ ខែមករា ឆ្នាំ២០២៣ ចាប់ពីម៉ោង៨ព្រឹក ដល់ម៉ោង៥ល្ងាច នៅ CJCC ក្នុងសាកលវិទ្យាល័យភូមិន្ទភ្នំពេញ ចូលរួមដោយសេរី។ ក្នុងពិព័រណ៌នេះ នឹងមានការចូលរួមដោយក្រុមហ៊ុនធំៗជាច្រើនក្នុងប្រទេសកម្ពុជាផងដែរ។ ពិព័រណ៌ការងារនេះ អ្នកចូលរួមអាចដើរទស្សនានៅស្តង់តាមក្រុមហ៊ុន ឬ ស្ថាប័នផ្សេងៗ ព្រមទាំង មានជួបសម្ភាសន៍ផ្ទាល់ជាមួយក្រុមហ៊ុន ក្នុងករណីដែលអ្នកចូលរួមមានចំណាប់អារម្មណ៍ខាងផ្នែកអ្វីមួយ។ ដូច្នេះ កុំភ្លេចត្រៀមប្រវត្តិរូបសង្ខេបទៅជាមួយផង។

ឆ្លៀតក្នុងឱកាសនេះ​ លោកអ្នកអាចទទួលបានផលប្រយោជន៍៤ នៅក្នុងពិព័រណ៌នេះ។ ទី១ លោកអ្នកអាចស្វែងរក និងសាកសួរព័ត៌មានការងារដែលអ្នកពេញចិត្ត។ ទី២ ចូលរួមស្តាប់បទបង្ហាញពីក្រុមហ៊ុនផ្សេងៗ។ ទី៣ ចូលរួមសិក្ខាសាលា និងទី៤ គឺទទួលបានឱកាសប្រឹក្សាយោបល់អំពីការសិក្សា និងអាហារូបករណ៍ទៅប្រទេសជប៉ុន។

ពិព័រណ៌ការងារ តែងតែធ្វើឡើងជាញឹកញាប់នៅកម្ពុជា ដើម្បីផ្តល់ភាពងាយស្រួលដល់សាធារណជនក្នុងការស្វែងរកការងារ និងក្រុមហ៊ុនដែលពួកគេស្រឡាញ់។ មនុស្សជាច្រើន តែងតែចាប់អារម្មណ៍ពិព័រណ៍ការងារនេះ ជាពិសេស គឺ សិស្ស និស្សិតតែម្តង៕

ដោយ៖ អុន ស្រីមាន