សម្ដេចតេជោ ហ៊ុន សែន ស្នើភាគីកូរ៉េជួយផ្សព្វផ្សាយឱ្យអ្នកវិនិយោគដាក់ទុននៅកម្ពុជាបន្ថែម

សម្ដេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា នៅព្រឹកថ្ងៃទី ១៤ ខែមករា ឆ្នាំ ២០២៣នេះ បានអនុញ្ញាតឱ្យលោកបណ្ឌិត អូ មីយុង (OU MYUNG) អតីតឧបនាយករដ្ឋមន្ត្រី និងប្រតិភូឧស្សាហកម្មកូរ៉េ ចូលជួបសំដែងការគួរសម និងពិភាក្សាការងារនៅវិមានសន្ដិភាព។

លោក អ៊ាង សុផល្លែត ដែលជាជំនួយការផ្ទាល់របស់សម្ដេចតេជោ បានឱ្យដឹងនៅក្រោយជំនួបនាព្រឹកនេះថា លោកបណ្ឌិត អូ មីយុង បានជម្រាបសម្ដេចតេជោថា ប្រទេសកម្ពុជា មានភាពអនុគ្រោះខ្លាំងសម្រាប់ការវិនិយោគមកពីប្រទេសកូរ៉េ ខណៈភាគីទាំងពី (កម្ពុជា-កូរ៉េ) មានកិច្ចព្រមព្រៀងពាណិជ្ជកម្មសេរី ហើយកម្ពុជាមានសុខសន្តិភាព ស្ថិរភាពនយោបាយ និងមិនមានគ្រោះមហន្តរាយដោយគ្រោះធម្មជាតិ។ ហើយថា អ្វីដែលកម្ពុជាខ្វះខាតនោះ គឺអ្នកវិនិយោគកូរ៉េមិនទាន់មានការយល់ដឹងច្បាស់ អំពីស្ថានភាពវិនិយោគនៅកម្ពុជា។

ជាការឆ្លើយតប សម្ដេចតេជោ ហ៊ុន សែន នាយករដ្ឋមន្ត្រីបានលើកឡើងថា ជាការពិតណាស់ កម្ពុជា មានសុខសន្តិភាព ស្ថិរភាពនយោបាយ និងមិនមានគ្រោះធម្មជាតិ ដូចជាគ្រោះរញ្ជួយដី ផ្ទុះភ្នំភ្លើង ឬខ្យល់ព្យុះនោះទេ។

សម្ដេចតេជោនាយករដ្ឋមន្ត្រី បានស្នើសុំឱ្យលោកបណ្ឌិត អូ មីយុង និងប្រតិភូ ជួយផ្សព្វផ្សាយឱ្យអ្នកវិនិយោគកូរ៉េ សម្លឹងមកកម្ពុជាបន្ថែមលើកត្តាអំណោយផល ខណៈដែលកម្ពុជា និងកូរ៉េ មានកិច្ចព្រមព្រៀងពាណិជ្ជកម្មសេរី, ភាពជាដៃគូសេដ្ឋកិច្ចគ្រប់ជ្រុងជ្រោយតំបន់ (RCEP) កម្ពុជាអនុញ្ញាតឲ្យក្រុមហ៊ុនកូរ៉េ ជាម្ចាស់ភាគហ៊ុន ១០០% ដោយមិនតម្រូវឲ្យមានភាគហ៊ុនក្នុងស្រុកនោះទេ, កម្ពុជា អនុញ្ញាតឲ្យក្រុមហ៊ុនទាំងអស់ ប្រើប្រាស់រូបិយប័ណ្ណបរទេស នោះគឺអនុញ្ញាតឱ្យប្រើប្រាស់ដុល្លារ សម្រាប់បើកប្រាក់ខែឲ្យពលករដោយមិនតម្រូវឱ្យមានការទៅប្ដូរប្រាក់នៅធនាគារឡើយ។

ជាមួយគ្នានោះដែរ កម្ពុជា ក៏មានវត្ថុធាតុដើមដូចជា៖ ស្វាយចន្ទី ស្រូវ កៅស៊ូ ដំឡូង និងកម្លាំងពលកម្មវ័យក្មេងជាច្រើនផងដែរ។ ក្នុងន័យនេះសម្ដេចតេជោ ហ៊ុន សែន បានស្នើសុំប្រតិភូទាំងមូល ជួយជំរុញការវិនិយោគលើវិស័យឧស្សាហកម្មកែច្នៃ និងវិស័យឧស្សាហកម្មបច្ចេកវិទ្យាជាន់ខ្ពស់មកកម្ពុជាផងដែរ៕