សិល្បករ ៤រូប ចែករំលែកការចងចាំពីកុមារភាព និងប្តេជ្ញាអប់រំកូនតាមបែបវិជ្ជមាន

ក្រោមយុទ្ធនាការគំរូអហិង្សាដើម្បីលុបបំបាត់អំពើហិង្សាលើកុមារ អង្គការទស្សនៈពិភពលោក បានផ្សព្វផ្សាយវីដេអូចំនួន ៨ ស្តីពី «អាណាព្យាបាលជំនាន់ថ្មី៖ បទពិសោធ និងការចងចាំពីកុមារភាព» របស់សិល្បករ-សិល្បការិនី និងអ្នកផលិតមាតិកាចំនួន ៤រូប។ អ្នកទាំង ៤រូបនេះ រួមមាន៖ អ្នកនាង ឌុច លីដា អ្នកនាង ដួង ម៉ាណា កញ្ញា វ៉ាន់ម៉ៅ ហ្សូលីនដា ហៅលីនវី និងលោក ទៀង អេងលាង ហៅខាយ។

វីដេអូខ្លីទាំងនេះ នឹងត្រូវបានបង្ហោះនៅលើបណ្តាញសង្គមរបស់អង្គការទស្សនៈពិភពលោកអន្តរជាតិនៅកម្ពុជា ដូចជា៖ ហ្វេសប៊ុក យូធូប អ៊ីនស្តាក្រាម និងទំព័រហ្វេសប៊ុករបស់សិល្បករ-សិល្បការិនី និងអ្នកផលិតមាតិកាទាំង៤រូប។ តាមរយៈវីដេអូខ្លីនេះ សិល្បករ-សិល្បការិនី និងអ្នកផលិតមាតិកាទាំង៤រូប នឹងបង្ហាញពីការចែករំលែកបទ​ពិសោធនៃការចងចាំពីកុមារភាព ជាពិសេសការប្តេជ្ញាចិត្តក្នុងការចិញ្ចឹមកូនបែបវិជ្ជមានរបស់ពួកគាត់។

អ្នកនាង ដួង ម៉ាណា ជាម្ដាយម្នាក់ និងជាសិល្បការនីមួយរូបដែលចូលរួមនៅក្នុងយុទ្ធនាការគំរូអហិង្សា បានកត់សម្គាល់ពីសារៈសំខាន់ជាច្រើននៃការចិញ្ចឹមកូនដោយមិនប្រើប្រាស់អំពើហិង្សា។ អ្នកនាង ដួង ម៉ាណា បានលើកឡើងដូច្នេះថា៖ «ខ្ញុំសប្បាយរីករាយដែលបានចូលរួមជាមួយយុទ្ធនាការគំរូអហិង្សា ព្រោះយុទ្ធនាការនេះ​ពិតជាមានសារៈសំខាន់ និងមានឥទ្ធិពលសម្រាប់អាណាព្យាបាលគ្រប់រូប រួមទាំងរូបខ្ញុំដែរ»។ អ្នកនាងជឿថា ការអប់រំកូនបែបវិជ្ជមាន ការចិញ្ចឹមកូនដោយសេចក្តីស្រលាញ់ និងការយកចិត្តទុកដាក់ នឹងជួយឲ្យកូនលូត​លាស់ធំធាត់បានល្អ ព្រមទាំងមានអនាគតល្អប្រសើរ។

ដោយឡែកលោក ទៀង អេងលាង ហៅខាយ ដែលជាសិល្បករមួយរូបដែរនោះ ទោះជាមិនទាន់មាន​បទពិសោធក្នុង​ការចិញ្ចឹមបីបាច់ថែរក្សាកូនក៏ដោយ តែលោកយល់ឃើញថា អាណាព្យាបាលគ្រប់រូបគួរចាប់ផ្តើម​ផ្លាស់ប្តូរឥរិយាបថក្នុង​ការអប់រំកូន ហើយជ្រើសរើសវិធីសាស្ត្របែបវិជ្ជមាន ដើម្បីបង្កើតការចងចាំពីកុមារភាពដ៏ល្អសម្រាប់ពួកគេ។

លោក ខាយ បានបន្ថែមថា៖ «គ្រប់ក្រុមគ្រួសារតែងតែមានរបៀបក្នុងការរស់នៅផ្សេងៗគ្នា។ តួយ៉ាងសម្រាប់ខ្ញុំ អ្វីដែលខ្ញុំ​ទទួល​បានពីឪពុកម្តាយ ហើយខ្ញុំចង់អនុវត្តតាមពួកគាត់នោះ គឺការចំណាយពេលជាមួយគ្នា ពិភាក្សាដោយបើកចំហរ ព្រមទាំងការបង្កើតស្នាមញញឹម និងសំណើចនៅក្នុងគ្រួសារ»។ លោកចង់ឲ្យការចងចាំរបស់កុមារទាំងអស់អំពីកុមារភាព​របស់ពួកគេដូចរូបគំនូរដែលមានវាលស្មៅពណ៌បៃតងស្រស់។

សូមបញ្ជាក់ថា បច្ចុប្បន្នមានប្រទេសចំនួន ៨៧កំពុងចូលរួមក្នុងការទប់ស្កាត់អំពើហិង្សាលើកុមារ តាមរយៈយុទ្ធនាការគំរូអហិង្សាជាសកល ហើយកម្ពុជាបានចាប់ផ្ដើមយុទ្ធនាការនេះក្នុងឆ្នាំ២០១៧។ យុទ្ធនាការគំរូអហិង្សាមានគោលបំណង ផ្លាស់ប្ដូរអត្តចរិត និងអាកប្បកិរិយាឪពុកម្តាយ អាណាព្យាបាល និងគ្រូ អំពីការដាក់ពិន័យលើរាងកាយ និងធ្វើឲ្យកុមារអាម៉ាស់ ការផ្តល់ភាពអង់អាចដល់កុមារមានភាពធន់ តស៊ូមតិ និងការពង្រឹងយន្តការការពារកុមារនៅក្នុងមូលដ្ឋានក្នុងការបញ្ឈប់អំពើហិង្សាលើកុមារ៕ ដោយ៖ ធឿន វ៉ាន់សុង