ភ្លើងឆេះមន្ទីរពេទ្យនៅទីក្រុង Hamburg អាល្លឺម៉ង់សម្លាប់អ្នកជំងឺ ៣នាក់ និងបង្ករបួស ៣៤នាក់

អគ្គិភ័យបានឆាបឆេះពេញមួយយប់នៅមន្ទីរពេទ្យ Marienkrankenhaus ក្នុងទីក្រុង Hamburg ប្រទេសអាល្លឺម៉ង់ ដោយបានសម្លាប់អ្នកជំងឺបុរសវ័យចំណាស់ ៣នាក់ដែលមានអាយុ ៨៤ ឆ្នាំ ៨៥ និង ៨៧ និងអ្នកជំងឺ ៣៤នាក់ផ្សេងទៀត​បាន​​​រងរបួស។ នេះបើយោងតាមការចេញផ្សាយរបស់ទីភ្នាក់ងារព័ត៌មាន​ AP នៅថ្ងៃទី០២ខែមិថុនានេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អគ្គិភ័យនេះបានចាប់ផ្តើមភ្លាមៗនៅពាក់កណ្តាលអធ្រាត្រក្នុងបន្ទប់ជាន់ផ្ទាល់ដីដែលជាបន្ទប់សម្រាប់មនុស្សចាស់របស់មន្ទីរពេទ្យ ហើយបានរាលដាលដល់ផ្នែកខាងមុខនៃជាន់ខាងលើ ដោយបញ្ចេញផ្សែងហុយពេញអគារបួនជាន់។ អ្នកពន្លត់​អគ្គិភ័យបានឆ្លើយតបភ្លាមៗ ដោយបានជួយសង្គ្រោះអ្នកជំងឺចេញពីបង្អួច និងខាងក្នុងអគារ។ ទីបំផុតភ្លើងត្រូវបានពន្លត់ក្នុងរយៈពេល ២០នាទី។

អ្នករបួសភាគច្រើនត្រូវបានព្យាបាលនៅនឹងមន្ទីពេទ្យដដែល ពីរនាក់ត្រូវបានបញ្ជូនទៅមន្ទីរពេទ្យនៅក្បែរនោះក្នុងនោះមានម្នាក់ស្ថិតនៅក្នុងធ្ងន់ធ្ងរ​អាច​​ប៉ះពាល់ដល់អាយុជីវិត។

ក្រោយមកប៉ូលិសបានឃាត់ខ្លួនអ្នកជំងឺអាយុ ៧២ឆ្នាំម្នាក់ ដោយសង្ស័យថា គាត់ជាអ្នកបង្កឲ្យមានភ្លើងឆេះ។ អ្នកស៊ើបអង្កេតកំពុងស្វែងរកថាតើគាត់មានជំងឺផ្លូវចិត្តឬអត់៕

អត្ថបទ៖ ប៊ុន សុភាព