លោក សាយ សំអាល់៖ អ្នក​មិនទទួលស្គាល់ជ័យជម្នះ​ ៧ មករា ប្រៀបដូចជាស្រឡាញ់សង្គ្រាម

រដ្ឋមន្រ្តីក្រសួងបរិស្ថាន លោក សាយ សំអាល់ បានលើកឡើងថា សម្រាប់អ្នកដែលមិនទទួលស្គាល់ជ័យជម្នះ ៧មករា ប្រៀបដូចនឹងអ្នកស្រឡាញ់របបប្រល័យពូជសាសន៍ និងសង្គ្រាមអីចឹង។

លោក សាយ សំអាល់ មានប្រសាសន៍ថា៖ “ការមិនទទួលស្គាល់ទិវា ៧មករា ជ័យជម្នះ គឺមានន័យថា ស្រឡាញ់របបប្រល័យពូជសាសន៍ និងសង្គ្រាម”។

លោកបានរំលឹកថា ជ័យជម្នះ ៧មករានេះ មិនត្រឹមតែជាថ្ងៃរំលឹកនៃការរំដោះជាតិចេញពីរបបប៉ុលពតប៉ុណ្ណោះទេ គឺជាថ្ងៃប្រវត្តិសាស្ត្រមួយ ដែលដាស់តឿនដល់ប្រជាជនកម្ពុជាគ្រប់រូប កុំឱ្យត្រឡប់ទៅរកដានរបស់ប្រវត្តិសាស្ត្រដ៏ឃោឃៅនេះម្តងទៀត។

រដ្ឋមន្ត្រីក្រសួងបរិស្ថានរូបនេះ ក៏បានបន្តថា កម្ពុជាមានថ្ងៃនេះបាន ក៏ព្រោះតែកម្ពុជាមានសាមគ្គីភាព ឯករាជ្យភាព ព្រមទាំងកិច្ចខិតខំប្រឹងប្រែងការពារនូវសុខសុវត្ថិភាព សន្តិភាព របស់រាជរដ្ឋាជូនប្រជាពលរដ្ឋ។

លោកបានថ្លែងបែបនេះ នៅក្នុងពិធីអបអរសាទរខួបលើកទី៤៤ នៃទិវាជ័យជម្នះ ៧មករា នៅខេត្តព្រះសីហនុ នាថ្ងៃទី ១៥ ខែមករា ឆ្នាំ២០២៣នេះ។ ក្នុងពិធីនេះ ក៏មានការចូលរួមពី លោក គួច ចំរើន អភិបាលខេត្តព្រះសីហនុ និងមន្ត្រីជាន់ខ្ពស់ផ្សេងទៀតផងដែរ។

ក្រោយពីកម្ពុជាបានរំដោះខ្លួនរួចផុតពីរបបខ្មៅងងឹតមក បានធ្វើឱ្យកម្ពុជាមានសន្តិភាពពេញលេញ មានភាពរីកចម្រើនស្ទើរតែគ្រប់វិស័យ ក្រោមយុទ្ធសាស្ត្រដឹងនាំប្រទេសដ៏មានឈ្លាសវៃរបស់សម្តេចតេជោ ហ៊ុន សែន៕