មហាសេដ្ឋីពហុជំនួញអ្នកឧកញ៉ា សុខ គង់ អគ្គនាយកក្រុមហ៊ុនសូគីម៉ិច និងសុខាអូតែល បានវិនិយោគ​លើវិស័យ​សណ្ឋាគារ យ៉ាងជោគជ័យ ដោយបានពង្រីកចំនួន ៧ទីតាំង នៅតាមបណ្តារាជធានីខេត្តគោលដៅទេសចរណ៍ ក្នុងប្រទេសកម្ពុជា ក្នុងនោះសណ្ឋាគារលំដាប់ផ្កាយ៥ មានចំនួន៦ និងផ្កាយ៤ ចំនួនមួយទីតាំង។

សណ្ឋាគារទាំង៧ របស់អ្នកឧកញ៉ា សុខ គង់ រួមមាន៖

សណ្ឋាគារឆ្នេរសុខា ក្រុងព្រះសីហនុ លំដាប់ផ្កាយ៥៖ បានបើកដំណើរការអាជីវកម្មនៅឆ្នាំ ២០០៤ រហូតមដល់​បច្ចុប្បន្នមានចំនួន រាប់ពាន់បន្ទប់។

នៅខេត្តសៀមរាបមានចំនួនបី គឺសណ្ឋាគារសុខាអង្គរ លំដាប់ផ្កាយ៥ ចំនួនពីរ និងផ្កាយមួយចំនួនមួយ។ សណ្ឋាគារសុខាអង្គរ បើកដំណើរការជាផ្លូវការនៅឆ្នាំ ២០១០ ដោយមាន​ ២៧៦បន្ទប់។

ចំណែកសណ្ឋាគារសុខាសៀមរាប ៖ បើកដំណើរការជាផ្លូវការនៅឆ្នាំ ២០១៧ មានចំនួន ១២៤២បន្ទប់។

សណ្ឋាគាររេស៊ីដង់សុខាភ្នំពេញ ៖ បើកដំណើរការផ្លូវការឆ្នាំ ២០១៥  មាន ៥៤៩បន្ទប់។ នៅក្នុងសណ្ឋាគារនេះ មានសេវាគ្រប់លំដាប់អន្តរជាតិថ្នាក់ផ្កាយ៥។

ចំណែកនៅលើភ្នំបូកគោមានចំនួនពីរ គឺសណ្ឋាគាររមណីយដ្ឋានឋានសួគ៌សុខា និងសណ្ឋាគារឡឺបូកគោ ផាឡេស ថ្នាក់លំដាប់ផ្កាយ៥ទាំងពីរ។​

លោក ផ្លុង ច័ន្ទដារិទ្ធ នាយកចាត់ការទូទៅនៃសណ្ឋាគាររេស៊ីដង់សុខាភ្នំពេញ បានប្រាប់កម្ពុជាថ្មីថា សណ្ឋាគារសុខា ក្រោមការដឹកនាំរបស់អ្នកឧកញ៉ា សុខ គង់ បានបើកដំណើរជិត ២០ឆ្នាំមកហើយ។ តាមរយៈបទពិសោធ​នៅក្នុង​វិស័យនេះ លោកថា សណ្ឋាគារសុខា តែងទទួលបានការជឿទុកចិត្ត ដោយមានការរៀបចំពិធីធំៗជាច្រើន ទាំងថ្នាក់ជាតិ និងអន្តរជាតិ។ ជាក់ស្តែងដូចជា កិច្ចប្រជុំវេទិកាសេដ្ឋកិច្ចពិភពលោក និងកិច្ចប្រជុំកំពូលអាស៊ាន ដែលមានមេដឹក​នាំកំពូលៗ​ពីប្រទេសមហាអំណាចធំៗជាច្រើន មកចូលរួម និងស្នាក់នៅសណ្ឋាគារសុខា អូតែល។ ក្នុងនោះ លោក ផ្លុង ច័ន្ទដារិទ្ធ បង្ហើបថា មានមេដឹកនាំប្រទេសធំៗចំនួន ៧ បានស្នាក់នៅសណ្ឋាគារសុខា ពេលកិច្ចប្រជុំកំពូលអាស៊ាន។

លោក ផ្លុង ច័ន្ទដារិទ្ធ បានគូសបញ្ជាក់ទៀតថា នៅកម្ពុជា មានសណ្ឋាគារលំដាប់ផ្កាយ៥ច្រើន តែបើប្រៀបធៀបនឹង​ប្រព័ន្ធសុវត្ថិភាព ការបដិសណ្ឋាគារកិច្ចគ្រប់បែបយ៉ាង លោកជឿថា សណ្ឋាគារសុខអូតែល ជាជម្រើសលើគេ ដែលអាច​ធ្វើអ្វីៗបានគ្រប់បែបយ៉ាង សម្រាប់ទទួលភ្ញៀវទាំងជាតិ និងអន្តរជាតិ ពិសេសថ្នាក់ដឹកនាំធំៗលើពិភពលោក៕