ក្រសួងអប់រំ យុវជន និងកីឡា មុននេះបន្តិច បានឱ្យដឹង កាលបរិច្ឆេទជាក់លាក់ នៃជំនួបរវាង សម្ដេចតេជោ ហ៊ុន សែន នាយករដ្ឋមន្ត្រីកម្ពុជា ជាមួយសិស្សនិទ្ទេស A សម័យប្រឡង ៥ ធ្នូ ២០២២។ ក្រសួងបានឱ្យដឹងថា សម្តេចតេជោ ហ៊ុន សែន នាយករដ្ឋមន្ត្រី នឹងជួបសំណេះសំណាល សិស្សនិន្ទេស A ចំនួន ១ ០៤៩ នាក់ នៅ​ថ្ងៃ​២ ខែកុម្ភៈ ឆ្នាំ២០២៣ ខាងមុខនេះ។

គួររំលឹកថា ​នៅក្នុងពិធីបើកការដ្ឋានស្ដារ និងលើកកម្រិតផ្លូវ​ជាតិលេខ​៤១ កាលពីថ្ងៃទី២៦ ខែធ្នូ ឆ្នាំ២០២២នេះ សម្ដេចតេជោ ហ៊ុន សែន ធ្លាប់មានប្រសាសន៍ថា សម្ដេចគម្រោងនឹងជួបសិស្សនិទ្ទេស A អាចនឹងត្រូវរៀបចំឡើង​នៅក្នុងខែកុម្ភៈ ខណៈកំពុងរង់ចាំការបញ្ជាទិញ iPad ចែកជូនដល់សិស្សពូកែ។

សម្ដេចតេជោ ហ៊ុន សែន បានអំពាវនាវកុំឱ្យផ្ដោតតែលើនិទ្ទេសល្អ សំខាន់គឺជាប់បាក់ឌុប រឿង​និទ្ទេស​ជារឿងមួយ មិនប្រាកដកថា អ្នកជាប់និទ្ទេស A ចូលទៅមហាវិទ្យាល័យពូកែជាងនិទ្ទេស E ទេ។ សម្ដេចក៏លើកទឹកចិត្តចំពោះសិស្សដែលធ្លាក់​ កុំបាក់ទឹកចិត្ត ខំរៀនបន្ថែមរង់ចាំឆ្នាំក្រោយប្រឡងទៀត​ ហើយបន្ត​ចូលរៀនបរិញ្ញាបត្ររង។

គួរបញ្ជាក់ថា ការប្រឡងសញ្ញាបត្រមធ្យមសិក្សាទុតិយភូមិ បានរៀបចំឡើងនៅថ្ងៃទី៥ ខែធ្នូ ឆ្នាំ២០២២ និងបានប្រកាសលទ្ធផលកាលពីថ្ងៃទី២២ ខែឆ្នាំដដែល ដោយមានបេក្ខជនប្រឡងជាប់ចំនួន ៩០ ៩៥០នាក់ ត្រូវជា ៧២,៣៣% នៃបេក្ខជនមកប្រឡងចំនួន ១២៥ ៧៣៥ នាក់ កើនឡើងជាងឆ្នាំមុន ដែលមានត្រឹមជាង ៦៥%ប៉ុណ្ណោះ។ ក្នុងនោះបេក្ខជនជាប់និទ្ទេសA ចំនួន ១ ០៤៩ នាក់, និទ្ទេសB ចំនួន ៧ ២៣២ នាក់, និទ្ទេស C ចំនួន ១៩ ០៥៣ នាក់, និទ្ទេសD ចំនួន ៣១ ១៦៦ ​នាក់ និង និទ្ទេសE ចំនួន ៣២ ៤៥០នាក់៕