សម្ដេចតេជោ ហ៊ុន សែន ៖ កម្ពុជា មិនបានផ្ដល់ជំនួយយោធាឲ្យអ៊ុយក្រែន ទេ

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានគូសបញ្ជាក់ថា ប្រទេសកម្ពុជា មិនបានផ្ដល់ជំនួយយោធាឲ្យអ៊ុយក្រែន នោះទេ ដោយកម្ពុជា គ្មានសមត្ថភាព ដើម្បីផ្ដល់ជំនួយយោធាឲ្យអ៊ុយក្រែន ឡើយ។  

សម្តេចតេជោ ហ៊ុន សែន នៅក្នុងពិធីប្រគល់សញ្ញាបត្រជូននិស្សិតជ័យលាភី នៃសាកលវិទ្យាល័យវេស្ទើនជាង ៣ពាន់នាក់ នាព្រឹកថ្ងៃទី ២៦ ខែមករានេះ បានថ្លែងថា ប្រទេសកម្ពុជា មិនបានផ្ដល់ជំនួយផ្នែកយោធា ដល់ប្រទេសអ៊ុយក្រែន នោះទេ ដោយកម្ពុជា គ្មានសមត្ថភាព ផ្ដល់ជំនួយបែបនេះឡើយ។

សម្ដេចតេជោ ហ៊ុន សែន បានថ្លែងបែបនេះថា «កន្លងទៅ មានអ្នកលើកឡើងថា កម្ពុជា បានផ្ដល់ជំនួយយោធាឲ្យអ៊ុយក្រែន ខ្ញុំសូមយកឱកាសនេះ ធ្វើការបញ្ជាក់បន្ថែមលើសេចក្ដីថ្លែងការណ៍ របស់ក្រសួងការបរទេស កម្ពុជា មិនបានផ្ដល់ជំនួយយោធាឲ្យអ៊ុយក្រែនទេ កម្ពុជា គ្មានសមត្ថភាព ដើម្បីផ្ដល់ជំនួយយោធាឲ្យអ៊ុយក្រែនទេ»។

សម្ដេចតេជោ ហ៊ុន សែន បានបញ្ជាក់បន្ថែមថា ចំពោះការដែលកម្ពុជា ជួយបណ្ដុះបណ្ដាលអ្នកដោះមីនអ៊ុយក្រែន គឺជាកិច្ចការមនុស្សធម៌សុទ្ធសាធ។ ដូច្នេះ សូមកុំឲ្យមានការយល់ច្រឡំឲ្យសោះចំពោះបញ្ហានេះ។

សូមជម្រាបថា ក្រសួងការបរទេស និងសហប្រតិបត្តិការអន្តរជាតិនៃកម្ពុជា បានច្រានចោលការចុះផ្សាយថា រាជរដ្ឋាភិបាលកម្ពុជាគាំទ្រផ្នែកយោធាដល់ប្រទេសអ៊ុយក្រែននៅក្នុងការតទល់សង្គ្រាមជាមួយរុស្ស៊ី។ ការច្រានចោលរបស់ក្រសួងការបរទេសបែបនេះគឺធ្វើឡើងបន្ទាប់ពីមាន Channel Telegram មួយដែលមានឈ្មោះ«DEMOGRAFIYA UPALA» បានចុះផ្សាយអំពីជំហររបស់ប្រទេសនានាទាក់ទងនឹងសង្គ្រាមនៅអ៊ុយក្រែន រួមទាំងកម្ពុជាផងដែរ។

ឆ្លើយតបការចុះផ្សាយនេះ ក្រសួងការបរទេសកម្ពុជា បានលើកឡើងថា ការសម្រេចចិត្តរបស់រាជរដ្ឋាភិបាលកម្ពុជាក្នុងការផ្តល់វគ្គបណ្តុះបណ្តាលបច្ចេកទេសបោសសម្អាតមីនដល់កម្មករដោះមីនអ៊ុយក្រែននៅកម្ពុជា គឺធ្វើឡើងផ្អែកលើមូលដ្ឋានការងារមនុស្សធម៌សុទ្ធសាធ។ ក្រសួងការបរទេស បញ្ជាក់ថា ការបណ្ដុះបណ្ដាលបច្ចេកទេសបោសសម្អាតមីនដល់ភាគីអ៊ុយក្រែន នៅពេលនេះ គឺជាកិច្ចសហការរវាងកម្ពុជា និងទីភ្នាក់ងារសហប្រតិបត្តិការអន្តរជាតិជប៉ុន (JICA)។

ក្រសួងការបរទេស បានគូសបញ្ជាក់បន្ថែមថា ការជួយដល់ភាគីអ៊ុយក្រែនេះ គឺស្របជាមួយនឹងបេស​កកម្មរក្សាសន្តិភាពជាច្រើនរបស់កម្ពុជានៅអាហ្វ្រិក និងបណ្ដាប្រទេសនៅមជ្ឈិមបូព៌ា ក្រោមការឧបត្ថម្ភរបស់អង្គការសហប្រជាជាតិ។

ត្រង់ចំណុចនេះ ក្រសួងការបរទេសកម្ពុជា បានជំរុញឲ្យបណ្តាញ Channel Telegram «DEMOGRAFIYA UPALA» កែតម្រូវការបោះពុម្ពផ្សាយនេះ ដោយហេតុថា ការផ្សាយនេះមិនត្រឹមត្រូវទេ ហើយថែមទាំងអាចផ្ដល់ផលប៉ះពាល់ដល់កិត្តិយសកម្ពុជាផងដែរ។

ជាថ្មីម្ដងទៀត ក្រសួងការបរទេស បានសង្កត់ធ្ងន់ថា កម្ពុជាជាប្រទេសដែលស្រលាញ់សន្តិភាព ហើយប្រកាន់ខ្ជាប់យ៉ាងម៉ឺងម៉ាត់នូវគោលនយោបាយការបរទេសអព្យាក្រឹតភាព ដែលមានចែងក្នុងរដ្ឋធម្មនុញ្ញរបស់ខ្លួន៕