ឆ្នាំនេះ ប្រតិបត្តិករជាតិចំនួន៣ នឹងចូលរួម បោសសម្អាតផ្ទៃដីមីន ១៨០ម៉ែត្រក្រឡា

ក្រោមការគាំទ្រពីមូលនិធិកម្ពុជាគ្មានមីនឆ្នាំ២០២៥ អាជ្ញាធរមីនបានចុះកិច្ចសន្យាជាមួយប្រតិបត្តិករជាតិចំនួន៣ ក្នុងការចូលរួមប្រតិបត្តិការបោសសម្អាតមីននៅខេត្តចំនួន១៨ របស់កម្ពុជា ដែលមានផ្ទៃដីប្រមាណជាង១៨០ម៉ែត្រក្រឡាសម្រាប់ឆ្នាំ២០២៣នេះ។

ការចុះកិច្ចសន្យាស្ដីពីការបោសសម្អាតមីននេះបានធ្វើឡើងនៅថ្ងៃទី ២៦ ខែមករា ឆ្នាំ២០២៣ ក្រោមវត្តមានលោកទេសរដ្ឋមន្ត្រី លី ធុជ អនុប្រធានទី១ នៃអាជ្ញាធរមីន និងលោកឧត្តមសេនីយ៍ឯក ហ៊ុន ម៉ាណែត អគ្គមេបញ្ជាការរង និងជាមេបញ្ជាការកងទ័ពជើងគោក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រតិបត្តិករជាតិទាំង៣ ដែលទទួលភារកិច្ចក្នុងប្រតិបត្តិការបោសសម្អាសមីនសម្រាប់ឆ្នាំ២០២៣នេះ រួមមាន៖ បញ្ជាការដ្ឋានកងទ័ពជើងគោក មជ្ឈមណ្ឌលសកម្មភាពកំចាត់មីនកម្ពុជា (CMAC) និងមជ្ឈមណ្ឌលជាតិគ្រប់គ្រងកងកម្លាំងរក្សាសន្តិភាព បោសសម្អាតមីន និងកាកសំណល់សង្គ្រាម។

បើតាមលោកទេសរដ្ឋមន្ត្រី លី ធុជ ការចុះកិច្ចសន្យាស្ដីពីការបោសសម្អាតមីននេះ គឺក្រោមការគាំទ្រពីមូលនិធិកម្ពុជាគ្មាន មីនឆ្នាំ២០២៥ ដែលមានថវិកាសរុប ៣០លានដុល្លារសម្រាប់ការបម្រើឲ្យសកម្មភាពបោសសម្អាតមីន ហើយថវិកាចំនួន ៣០លានដុល្លារនេះសោតទៀត នឹងត្រូវបែងចែកទៅដល់ប្រតិបត្តិករជាតិទាំង៣ក្នុងបេសកកម្មដោះមីន។

លោកទេសរដ្ឋមន្ត្រី លី ធុជ បានបញ្ជាក់ថា ជាផែនការសម្រាប់ឆ្នាំ២០២៣ អាជ្ញាធរមីននឹងធ្វើការបោសសម្អាតមីនលើផ្ទៃដីសរុបប្រមាណ ៤១១ម៉ែត្រក្រឡា ក្នុងនោះផ្ទៃដីជាង ១៨០ម៉ែត្រក្រឡា បានប្រគល់ជូនប្រតិបត្តិករជាតិទាំង៣ ដោយប្រើមូលនិធិ ៣០លានដុល្លាររបស់រាជរដ្ឋាភិបាល និងផ្ទៃដីជាង ១៧០ម៉ែត្រក្រឡាទៀតជាការចូលរួមជួយដោយប្រទេសជាមិត្ត និងអង្គការជាដៃគូនានា។

លោកទេសរដ្ឋមន្ត្រី បានថ្លែងឲ្យដឹងថា ផ្ទៃដីចម្ការមីនជាង ១៨០ម៉ែត្រក្រឡា អាជ្ញាធរមីនបានប្រគលជូនបញ្ជាការដ្ឋានកងទ័ពជើងគោកធ្វើការបោសសម្អាតមីនលើផ្ទៃដីជាង ៤៦ម៉ែត្រក្រឡា ហើយគ្រោងចំណាយថវិកាចំនួន ៣.៩លានដុល្លារ។ រីឯមជ្ឈមណ្ឌលជាតិគ្រប់គ្រងកងកម្លាំងរក្សាសន្តិភាព បោសសម្អាតមីន និងកាកសំណល់សង្គ្រាម បោស សម្អាតក្នុងទំហំផ្ទៃដីជាង ២៧ម៉ែត្រក្រឡា ហើយគ្រោងចាយថវិកាចំនួន ៥.១លានដុល្លារ ខណៈនៅផ្ទៃដីមីនប្រមាណ ១០៦ម៉ែត្រក្រឡាប្រគល់ឲ្យមជ្ឈមណ្ឌលសកម្មភាពកំចាត់មីនកម្ពុជា (CMAC) ធ្វើការបោសសម្អាត ហើយទទួលបានថវិកាចំនួន ១៥.៩លានដុល្លារ។

លោក លី ធុជ បានបង្ហាញក្ដីសង្ឃឹមថា នៅពេលប្រតិបត្តិករជាតិបោសសម្អាតមីនទាំង៣ បានធ្វើការដោះមីនដោយជោគជ័យនៅក្នុងឆ្នាំ២០២៣នេះ ខេត្តចំនួន១៨របស់កម្ពុជា នឹងត្រូវប្រកាសជាខេត្តគ្មានមីនជាផ្លូវការ នាពេលខាងមុខឆាប់ៗនេះ៕

ដោយ៖ ធឿន វ៉ាន់សុង