លោកស្រី  ឱ វណ្ណឌីន រដ្ឋលេខាធិការក្រសួងសុខភិបាល និងជាប្រធានគណៈកម្មការ​ចំពោះ​កិច្ចចាក់វ៉ាក់សាំងកូវីដ១៩ ទូទាំងប្រទេស បានអះអាងថា ប្រជាពលរដ្ឋដែលទទួលវ៉ាក់សាំងកូវីដ១៩ បានគ្រប់ដូសចាប់ពីដូសមូលដ្ឋាន ដល់ដូសទី៦ ស្មើនឹងមានរនាំង និងកងការពារដ៏រឹងមាំពីការឆ្លងជំងឺកូវីដ១៩។

ថ្លែងក្នុងឱកាសចុះទស្សនកិច្ចការចាក់វ៉ាក់សាំងកូវីដ១៩ នៅតាមរោងចក្រ សាលារៀន ផ្សារ និងនៅតាមសហគមន៍ រយៈពេល២ថ្ងៃ គឺថ្ងៃទី២៦ និង២៧ ខែមករា នៅក្នុងខេត្តតាកែវ លោកស្រីបាន មានប្រសា​ស​ន៍​ថា ជំងឺកូវីដ១៩ ​វាមិនទាន់រលាយបាត់ពីភពផែនដីនៅឡើយទេ ពោល គឺវានៅតែឆ្លងរីករាលដាលជា​ខ្លាំង​នៅបណ្ដាប្រទេសផ្សេងៗជុំវិញពិភពលោក ពិសេស នៅក្នុងប្រទេសកម្ពុជា នៅតែមាន​ការឆ្លងពីមួយថ្ងៃទៅមួយថ្ងៃ ប៉ុន្ដែ ការឆ្លងវាមានកម្រិតទាប។ លោកស្រីបានបន្តថា៖ «ទោះបីជាយ៉ាងណា យើងកុំមានការធ្វេសប្រហែសឱ្យសោះ ត្រូវមានការប្រុងប្រយ័ត្ន​ជានិច្ចចំពោះ​ជំងឺ​កូវីដ១៩នេះ ពិសេស ជំងឺកូវីដ១៩ បំប្លែងខ្លួនថ្មីប្រភេទអូមីក្រុង វាងាយឆ្លងលឿនណាស់ បើសិនយើងមិនបានចាក់វ៉ាក់សាំងគ្រប់គ្រាន់ទេវាអាចបណ្ដាលឱ្យមានគ្រោះថ្នាក់ដល់អាយុជីវិតបាន»។

លោកស្រីបានណែនាំថា ដើម្បីបង្ការទប់ស្កាត់ជំងឺកូវីដ១៩បាន គប្បីម្នាក់ៗត្រូវ​មកទទួលវ៉ាក់សាំងបង្ការជំងឺកូវីដ១៩ ឱ្យបានគ្រប់ដូសតាមការអំពាវនាវរបស់រាជរដ្ឋាភិបាល និងអាជ្ញាធរខេត្ត ពិសេស ត្រូវចូលរួមអនុវត្តវិធានការ ៣កុំ និង៣ការពារ និងវិធានការដទៃទៀតរបស់​ក្រសួងសុខាភិបាលដែលបានដាក់ចេញ ពោលត្រូវមានអនាម័យខ្លួនប្រាណជាប្រចាំ ព្រោះកត្តា​អនាម័យនេះសំខាន់ណាស់សំរាប់សុខភាព និងការពារបានពីការឆ្លងពីជំងឺកូវីដ១៩ និងជំងឺដទៃទៀតបាន។

ជាមួយគ្នានេះដែរ លោក ស្រីក៏បានធ្វើការជំរុញបន្ថែមទៀតដល់អាជ្ញាធរមូលដ្ឋាន​ត្រូវជំរុញដល់ប្រជាពលរដ្ឋដែលចាប់ពី៣ឆ្នាំឡើង ឲ្យមកទទួលវ៉ាក់សាំងបង្ការជំងឺកូវីដ១៩ ឱ្យបានគ្រប់ៗគ្នា ពិសេស មន្រ្តីទទួលបន្ទុកការចាក់វ៉ាក់សាំងត្រូវណែនាំពួកគាត់ឱ្យយល់ដឹងពី​គម្លាតរយៈពេលនៃការចាក់វ៉ាក់សាំងឱ្យបានច្បាស់ ​ចៀសវាងមានរយៈពេលយូរ ដែលជាហេតុធ្វើ​អោយប្រព័ន្ធ​ភាពស៊ាំ ​ក្នុងរាង្គកាយមានការចុះខ្សោយ ​នៅពេលមានការឆ្លងជំងឺកូវីដ១៩ វាអាចវិវត្តន៍​ជាធ្ងន់ធ្ងរបាន និងឈានដល់ការបាត់បង់ជីវិតផងដែរ៕

ដោយ៖ សំអឿន