ក្រសួងអប់រំ យុវជន និងកីឡា មានរៀបចំកិច្ចប្រជុំស្ដីពី វឌ្ឍនភាពនៃការរៀបចំរបាយការណ៍អនុវិស័យអប់រំក្រៅប្រព័ន្ធ ក្រោមការដឹកនាំដោយ លោក ណុះ ស្លេះ រដ្ឋលេខាធិការក្រសួងអប់រំ យុវជន និងកីឡា និងមានការចូលរួមពី ថ្នាក់ដឹកនាំក្រសួង អគ្គនាយក លេខាធិការដ្ឋាន ថ្នាក់ដឹកនាំនាយកដ្ឋានអប់រំក្រៅប្រព័ន្ធ នាយកដ្ឋានពាក់ព័ន្ធ និងដៃគូអភិវឌ្ឍ នៅសាលប្រជុំជាន់ទី១ នៃអគាររដ្ឋបាល នៅថ្ងៃទី៣០ ខែមករា ឆ្នាំ២០២៣។

ក្នុងមតិបើកអង្គប្រជុំ លោក ណុះ ស្លេះ បានស្នើសុំឱ្យសមាជិក សមាជិកាទាំងអស់ចូលរួមកែសម្រួលនូវខ្លឹមសារ អក្ខរាវិរុទ្ធ ទិន្នន័យមួយចំនួន និងទម្រង់របាយការណ៍ឱ្យបានសមស្របសម្រាប់យកទៅដាក់បញ្ចូលនៅក្នុងសន្និបាតអប់រំឆ្នាំ២០២១-២០២២ និងលើកទិសដៅឆ្នាំ២០២២-២០២៣។

កិច្ចប្រជុំនេះ ផ្ដោតលើទម្រង់របាយការណ៍ និងខ្លឹមសារនៃកម្មវិធីទាំង៧ របស់នាយកដ្ឋានអប់រំក្រៅប្រព័ន្ធ រួមមាន កម្មវិធីអក្ខរកម្មវិជ្ជាជីវៈ ក្រោយអក្ខរកម្ម ការចូលរៀនឡើងវិញ បង្កើនប្រាក់ចំណូល សមមូលបឋមសិក្សា សមមូលមធ្យមសិក្សា និងបំពេញវិជ្ជា។ ដោយមានការបញ្ចេញមតិពីសមាជិក សមាជិកា នៃអង្គប្រជុំ ឃើញថា ទម្រង់របាយការណ៍ចុងក្រោយសម្រាប់សន្និបាតអប់រំឆ្នាំ២០២១-២០២២នេះ មានខ្លឹមសារកាន់តែប្រសើរឡើង៕