ព័ត៌មានជាតិ

សំរាមក្នុងក្រុងបាត់ដំបង ក្លាយជារឿងមេមាន់និងពងមាន់ ពលរដ្ឋមិនដល់ ៥០%បង់ថ្លៃសំរាម

បានផុស

៣ years មុន

នៅ

ថ្ងៃសុក្រ ៣ កុម្ភៈ ២០២៣

ដោយ

សំរាមក្នុងក្រុងបាត់ដំបងបានក្លាយជារឿងក្តៅមួយសម្រាប់អាជ្ញាធរដោយមួយថ្ងៃមានសំរាមមិនក្រោម ៣០០ តោន ខណៈពលរដ្ឋមិនដល់ ៥០ ភាគរយ បានបង់ថ្លៃសេវាប្រមូលសំរាម។ នេះបើតាមការបញ្ជាក់ពីលោក សុខ លូ អភិបាលខេត្តបាត់ដំបង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក សុខ លូ អភិបាលខេត្តបានថ្លែងក្នុងសន្និសីទ ជោគជ័យរយៈពេល ៥ ឆ្នាំ របស់រដ្ឋបាលខេត្តកាលពីពេលថ្មីៗនេះថា បញ្ហាសំរាមនេះបានក្លាយជារឿងពងមាន់និងកូនមាន់ ដោយពលរដ្ឋចោទក្រុមហ៊ុនប្រមូលសំរាមថាមានភាពយឺតយ៉ាវ ហើយក្រុមហ៊ុនចោទថាមកពីពលរដ្ឋមិនចូលរួមបង់ថ្លៃសេវា។

ពលរដ្ឋឈ្មោះ ឡាយ រស់នៅភូមិវត្តលៀប សង្កាត់ចំការសំរោង លើកឡើងថា ក្រុមគ្រួសាររបស់លោកបានបង់ថ្លៃសេវាសំរាមជាប្រចាំ ប៉ុន្តែលោកក៏ឃើញថាមានពលរដ្ឋខ្លះក៏មិនបានបង់ដែរមិនដឹងមកពីមូលហេតុអី។

ពលរដ្ឋឈ្មោះ ឡាយ សុប៊ិន និងលោក សេក សារុម ដែលរស់នៅក្នុងភូមិសង្កាត់ជាមួយគ្នានេះបាននិយាយថា ពួកលោកបង់ថ្លៃប្រមូលសំរាមជាប្រចាំ បើទោះបីទំហំសំរាមតិចតួចក៏ដោយ។

ប្រជាពលរដ្ឋដែលកម្ពុជាថ្មីបានសម្ភាសន៍ហើយមិនបានបង់ថ្លៃសំរាមបានការពារថា ពួកគាត់ក៏ចង់បង់ដែរ តែដោយសារតែមិនមានធុងសំរាមនៅតាមចិញ្ចើមដងផ្លូវសម្រាប់ដាក់សំរាម ទើបត្រូវបង្ខំចិត្តយកទៅបោះចោលកន្លែងផ្សេងៗឬដុតចោលនៅតាមលំនៅដ្ឋានខ្លះៗ។ ពួកគាត់ថា អាជ្ញាធរឬក្រុមហ៊ុនគួរដាក់ធុងសំរាមតាមដងផ្លូវសម្រាប់អ្នករស់នៅខាងក្រោយគេយកមកចោល បើអាជ្ញាធរមិនរៀបចំទេអ្នកនៅខាងមុខមិនព្រមឲ្យយកសំរាមមកដាក់នៅខាងមុខលំនៅដ្ឋានរបស់គេនោះទេ បើទោះជាចិញ្ចើមផ្លូវសាធារណះក៏ដោយ។

កម្ពុជាថ្មីបានព្យាយាមទាក់ទងទៅលោក លៀង វាសនា អភិបាលក្រុងបាត់ដំបងដោយលោកឆ្លើយប្រាប់ថា លោកមិនផ្តល់សម្ភាសន៍តាមទូរស័ព្ទនោះទេដោយលោកប្រាប់កម្ពុជាថ្មីថា បើចង់ដឹងអីមកសាលាក្រុងទៅ។

បើទោះបីយ៉ាងនេះក្តី លោក កត បូរ៉ាន់ ប្រធានមន្ទីរបរិស្ថានបានឲ្យកម្ពុជាថ្មីដឹងថា យើងពិតជាលំបាកណាស់ នៅក្នុងក្រុងបាត់ដំបង សំរាមក្នុងមួយថ្ងៃមានជាង ៣០០តោន ហើយការចូលរួមបង់ថ្លៃសំរាមពីបងប្អូនអាជីវករនិងប្រជាពលរដ្ឋមានភាគរយតិច។

លោកបន្តថា នេះមកពីកត្តារបស់បងប្អូនមួយចំនួនធ្វើតាមទម្លាប់គឺរាល់ថ្ងៃដល់ម៉ោង ០៤ ភ្លឺគឺពួកគាត់ច្រកសំរាមយកទៅចោលកន្លែងដែលជាទម្លាប់របស់គាត់តែម្តង។ ម្យ៉ាងទៀតជីវភាពគ្រួសារគាត់ក៏នៅមានកម្រិត ទើបខាងមន្ត្រីមានការយោគយល់ នេះជាកត្តាឲ្យបាត់ភាគរយច្រើនបែបនេះ។

ប្រហាក់ប្រហែលនិងការលើកឡើងពីលោកប្រធានមន្ទីរបរិស្ថាន ពលរដ្ឋជាច្រើនបានលើកឡើងថា ពួកគាត់នៅទីប្រជុំជនក្រុងបានបង់រាល់ខែ។ ដោយឡែកអ្នកដែលនៅជាន់លើមួយចំនួន និងជាយក្រុង អ្នកខ្លះក៏បានបង់តែអ្នកខ្លះបានគេចវេស ហើយយកសំរាមដាក់ក្នុងថង់យកទៅបោះចោលតាមគំនរសំរាម។

បើទោះបែបនេះ លោក សុខ លូ អភិបាលខេត្តបានជំរុញឲ្យរដ្ឋបាលក្រុងត្រូវតែគិតគូរ ខណះដែលលោកចាត់ទុកពាក់ព័ន្ធបញ្ហាអនាម័យ សណ្ដាប់ធ្នាប់ជារឿងសំខាន់ដែលអាជ្ញាធររួមទាំងប្រជាពលរដ្ឋត្រូវចូលរួមដោះស្រាយ។

បើតាមប្រភពពីពលរដ្ឋទាំងអាជីវករនិងពលរដ្ឋទូទៅផង ការបង់ថ្លៃសម្រាមក៏ក្នុងមួយគ្រួសារចន្លោះពី ១ មុឺនរៀលដល់១មុឺន៥ពាន់រៀលដែរ៕

អត្ថបទ៖ សៅ សារិទ្ធ

Related Topics:ខេត្តបាត់ដំបង