ព័ត៌មានជាតិ
បរទេសចូលសារមន្ទីរមិនទាន់បានពាក់កណ្ដាលមុនកូវីដ-១៩ ប៉ុន្តែមានចំនួនហួសការរំពឹងទុក
លោក ឆាយ វិសុទ្ធ ប្រធាននាយកដ្ឋានសារមន្ទីរជាតិកម្ពុជា បានឱ្យ “កម្ពុជាថ្មី” ដឹងថា ចាប់ពីបើកដំណើរការប្រទេសឡើងវិញ មានភ្ញៀវចូលទស្សនាសារមន្ទីរជាតិប្រមាណ ១០០ នាក់ក្នុង១ថ្ងៃ នៅខែកក្កដា សីហា ឆ្នាំ២០២២។ ចំណែកខែកញ្ញា តុលា ភ្ញៀវកាន់តែឡើងចាប់ពី ១០០ ទៅ ២០០នាក់ ក្នុង ១ថ្ងៃ។ លុះចាប់ពីខែវិច្ឆិកា ធ្នូ មកដល់បច្ចុប្បន្ន ភ្ញៀវឡើងចម្លោះពី ២០០ ទៅ ៣០០ នាក់ក្នុងមួយថ្ងៃ។
លោក ឆាយ វិសុទ្ធ មានប្រសាសន៍បន្តថា៖ “ភ្ញៀវទេសចរមកទស្សនាសារមន្ទីរជាតិភាគច្រើន គឺមកពីលោកខាងលិច គឺតាំងពីអឺរ៉ុប និងអាមេរិក ចំណែកភ្ញៀវអាស៊ី មិនសូវមានប៉ុន្មានទេ។ ទេសចរអាស៊ីភាគច្រើនមានដូចជា ចិន វៀតណាម កូរ៉េ ជប៉ុនជាដើម”។
ប្រធាននាយកដ្ឋានសារមន្ទីរជាតិកម្ពុជា រូបនេះបានឱ្យដឹងបន្ថែមថា បើប្រៀបធៀបចំនួនភ្ញៀវឆ្នាំ២០១៩ បច្ចុប្បន្នភ្ញៀវមានកំណើនជាង ៣០ ភាគរយ ប៉ុន្តែចំនួនភ្ញៀវបច្ចុប្បន្នមិនទាន់បាន ៥០ ភាគរយ នៃបរិមាណភ្ញៀវមុនមានវិបត្តិកូវីដ-១៩ ទេ។
លោក ឆាយ វិសុទ្ធ មានប្រសាសន៍បន្តថា៖ “ប៉ុន្តែចំនួនភ្ញៀវបច្ចុប្បន្ន អាចចាត់ទុកថាច្រើនហើយ បើគិតពីវិបត្តិសាកសបញ្ហាជំងឺកូវីដ-១៩ គឺហួសការរំពឹងទុករបស់យើង ព្រោះការលើកគម្រោងទៅរបាយការណ៍ថ្នាក់ជាតិ ក៏យើងមិនបានលើកដល់ប៉ុណ្ណឹងផង ប៉ុន្តែនេះភ្ញៀវចូលមកហួសការរំពឹងទុករបស់យើង”។
លោក ឆាយ វិសុទ្ធ លើកឡើងថា ស្ថានភាពភ្ញៀវបរទេសចូលទស្សនាសារមន្ទីរជាតិបច្ចុប្បន្ន បើតាមចំណាំ និងការប៉ាន់ស្មាន គឺរំហូរភ្ញៀវទេសចរពីខែកុម្ភៈ រហូតដល់ចុងខែមីនា អាចនៅរក្សាចំនួនថេរពី ២០០ ទៅ ៣០០នាក់ក្នុងមួយថ្ងៃ។ ចំណែកចុងខែមីនា និងខែមេសា ជារដូវក្ដៅ ភ្ញៀវអាចចុះ នៅត្រឹមពី ១០០ ទៅ ២០០នាក់ក្នុងមួយថ្ងៃ។ លុះដល់ខែ កក្កដា និងសីហា ជារដូវវស្សមកាលទើបកំណើនភ្ញៀវកើនឡើងវិញ រហូតដល់ខែកញ្ញា តុលា។
លោក ឆាយ វិសុទ្ធ បញ្ជាកថា៖ “តែចរន្តភ្ញៀវក៏អាស្រ័យលើស្ថានភាពកូវីដ និងបញ្ហាសង្គ្រាមរុស្ស៊ី អ៊ុយក្រែន។ យើងមានការរំពឹងថា នឹងមានការកើនឡើងភ្ញៀវទេសចរអាស៊ី ដោយសារយើងបានចាប់ផ្ដើមបើកជើងហោះហើរឡើងវិញជាមួយចិន ដែលយើងអាចសន្និដ្ឋានថា ភ្ញៀវទេសចរនឹងចូលមកកម្ពុជា រង្វង់ ១ លាន ទៅ ២ លាននាក់ក្នុងឆ្នាំ២០២៣នេះ ប៉ុន្តែយើងទាន់អាចដឹងថា ភ្ញៀវមកទស្សនាភ្នំពេញប៉ុន្មាននាក់ និងសៀមរាបប៉ុន្មាននាក់នោះទេ”។
លោក ឆាយ វិសុទ្ធ លើកឡើងថា កត្តាដែលនាំឱ្យភ្ញៀវទេសចរបរទេសចូលមកទស្សនាកម្ពុជា នោះដោយសារកត្តាសុវត្ថិភាព គឺទាំងការធ្វើដំណើរ និងសុខភាព ទន្ទឹមពេលនយោបាយរបស់រាជរដ្ឋាភិបាលបានជំរុញលទ្ធភាពឱ្យមានការភ្ជាប់ទំនាក់ទំនងទេសចរណ៍ ដោយហោះហើរផ្ទាល់ពីបណ្ដាប្រទេសមួយចំនួនមកកម្ពុជា ដោយមិនបាច់ចុះចតនៅប្រទេសណាមុនមកកម្ពុជាឡើយ។
គួរបញ្ជាក់ថា សារមន្ទីរជាតិត្រូវបានកសាង នៅថៃ្ង១៥ ខែសីហា ឆ្នាំ១៩១៧ តាមរបៀបស្ថាបត្យកម្ម ប្រពៃណីខ្មែរ ហើយត្រូវបានសម្ពោធក្នុងឆ្នាំ១៩២០ ដោយព្រះបាទស៊ីសុវត្ថិ។ នៅខាងក្នុងសារមន្ទីរជាតិមានតម្កល់វត្ថុបុរាណតាំងពីសម័យមុនអង្គរ និងសម័យអង្គរ។ សារមន្ទីរជាតិកម្ពុជា ជាការប្រមូលថែរក្សាទុកដ៏ល្អសម្រាប់ពិភពលោកធ្វើការស្រាវជ្រាវអំពីវត្ថុបុរាណ សិល្បៈ សាសនាបុរាណវិទ្យាខ្មែរតាំងពីសតវត្សទី៤ រហូតដល់សតវត្សទី១៣៕
អត្ថបទ៖ ច័ន្ទ វីរៈ
-
កីឡា៥ ថ្ងៃ ago
ឈ្នះខ្សែក្រវាត់ថ្ងៃជាមួយ ឈឿង ល្វៃ កីឡាករ Erdene ក៏មានរថយន្តទទួល
-
ព័ត៌មានជាតិ៤ ថ្ងៃ ago
ម្ចាស់សំណង់របងថ្មនៅរមណីយដ្ឋានឆ្នេរនេសាទ នៅតែរឹងទទឹងមិនព្រមវាយកម្ទេចរបងចេញ
-
សេដ្ឋកិច្ច១ សប្តាហ៍ ago
តាសក់ផ្អែម ៥ តោន របស់ កសិករម្នាក់ លក់ចេញអស់ ក្រោយសហគមន៍កសិកម្មជួយរកទីផ្សារ
-
ព័ត៌មានអន្ដរជាតិ១ សប្តាហ៍ ago
នាឡិកា ៦ គ្រឿងរបស់កូនពៅសេដ្ឋី ឥណ្ឌា ដែលខំសន្សំទុក មានមួយមេ Facebook ទាក់ចិត្តខ្លាំង
-
សន្តិសុខសង្គម៦ ថ្ងៃ ago
ដកហូតមុខតំណែង មេបញ្ជាការរងស្រុកស្វាយជ្រុំ៣នាក់ ពាក់ព័ន្ធករណីទារប្រាក់ពីអ្នកប្រើប្រាស់គ្រឿងញៀនជាង១ពាន់ដុល្លារ
-
ជីវិតកម្សាន្ដ៧ ថ្ងៃ ago
មនុស្សស្និទ្ធស្នាលទម្លាយពីស្ថានភាព Ngoc Trinh ក្រោយចេញពីពន្ធនាគារជាង៣ខែ
-
ព័ត៌មានជាតិ៤ ថ្ងៃ ago
ដើម្បីកុំឱ្យភោជនីយដ្ឋានដួលរលំបះជើងទាន់ សម្ដេចធិបតី បញ្ជាឱ្យកែម៉ោងពិនិត្យជាតិអាល់កុល
-
ជីវិតកម្សាន្ដ៥ ថ្ងៃ ago
តួជនទី៣ Benz ត្រលប់មកតំណែងស្រីស្អាតម្ដងទៀត ទោះឈានដល់អាយុ៤៣ឆ្នាំ