ទុនវិនិយោគលើវិស័យឧស្សាហកម្មជប៉ុន​នៅកម្ពុជា​កើនជិត ១ ពាន់លានដុល្លារ

សម្ដេចតេជោ ហ៊ុន សែន នាយករដ្ឋមន្ត្រីកម្ពុជា នៅថ្ងៃទី ២៧ ខែកុម្ភៈ ឆ្នាំ ២០២៣នេះ មានប្រសាសន៍ថា ចំនួនទឹកប្រាក់របស់ក្រុមហ៊ុនជប៉ុនវិនិយោគលើវិស័យឧស្សាហកម្មបានកើនឡើងដល់ជិត ១ ពាន់លានដុល្លារ ខណៈកម្ពុជាមានគោលដៅទាក់ទាញអ្នកវិនិយោគពីបរទេសបង្កើតការងារក្នុងស្រុកសម្រាប់ប្រជាពលរដ្ឋ។

សម្ដេចតេជោ ហ៊ុន សែន មានប្រសាសន៍ថា៖ «យើង​ទាក់ទាញនូវឧស្សាហកម្មដែលមានបច្ចេកទេសខ្ពស់​ ដែលសព្វថ្ងៃបានធ្វើដំណើរមកបណ្ដើរៗ ដូចជាក្រុមហ៊ុនជប៉ុន មាននាវា ដែលមុននេះ វិនិយោគ​ត្រឹមតែជាង ៣០ លានទេ ឥឡូវ​ក្រុមហ៊ុននេះ វិនិយោគឡើងជិត ១ ពាន់លានទៅហើយ​ ដែលផលិតម៉ូទ័រ​ ហើយកម្ពុជា​បានអនុវត្តនូវរូបមន្ត ១ បូក ​មូលដ្ឋាននៅថៃ ហើយមកផលិតនៅកម្ពុជា ប៉ុន្តែឥឡូវកម្រិតផលិតនៅក្នុងប្រទេសថៃ និងនៅកម្ពុជាកម្រិតផលិតប្រហាក់ប្រហែល​គ្នា»។

​ប្រភេទម៉ូទ័រមានច្រើនប្រភេទតាំងពីខ្នាតតូចរហូតដល់ខ្នាតធំ ទៅលើម៉ូទ័រម៉ាស៊ីនត្រជាក់ ម៉ាស៊ីនថត និងឧបករណ៍សម្ពារជាច្រើនទៀត​ដែលបំពាក់ម៉ូទ័រ។

បើតាមសម្ដេចតេជោ អ្នកជំនាញបច្ចេកទេស​ត្រូវទទួលការបណ្ដុះបណ្ដាលនៅប្រទេសថៃ ខណៈកម្ពុជាត្រូវសហការជាមួយក្រុមផលិត ដើម្បីឱ្យគេបញ្ជូនគ្រូមកបណ្ដុះបណ្ដាលការផលិតសម្រាប់ផ្គត់ផ្គង់ត្រឡប់ទៅវិញ។ ជប៉ុនក៏គ្រោងបើកក្រុមហ៊ុន TOYOTA នៅតំបន់សេដ្ឋកិច្ចពិសេសភ្នំពេញ ដែលទាមទារអ្នកបច្ចេកទេសកម្រិតខ្ពស់៕

អត្ថបទ៖ ឡេង ដេត