ក្រសួងការបរទេសបានជួយសង្គ្រោះពលរដ្ឋជិត ៨ពាន់នាក់ពីអំពើជួញដូរក្នុងឆ្នាំ២០២២

ក្នុងពិធីបើកសន្និបាតប្រចាំរបស់ក្រសួងការបរទេស និងសហប្រតិបត្តិការអន្តរជាតិ នាថ្ងៃទីពុធនេះ លោក អ៊ុច បូររិទ្ធ រដ្ឋលេខាធិការប្រចាំក្រសួងការបរទេស បានថ្លែងឲ្យដឹងថា ក្នុងរយៈពេលនៃឆ្នាំ២០២២ កន្លងទៅ ក្រសួងបានជួយសង្គ្រោះ និងសម្របសម្រួលដល់ពលរដ្ឋកម្ពុជាដែលរងគ្រោះដោយអំពើជួញដូរមនុស្សចំនួនជិត ៨ពាន់នាក់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើតាមរបាយការណ៍ដែលអានដោយលោក អ៊ុច បូររិទ្ធ បានឲ្យដឹងដូច្នេះថា៖ «ក្រសួងការបរទេស និងសហប្រតិបត្តិការអន្តរជាតិ បានផ្តល់ការគាំពារ ជួយសង្គ្រោះ និងសម្របសម្រួលដល់ការធ្វើមាតុភូមិនិវត្តន៍ដល់ពលរដ្ឋកម្ពុជាដែលរងគ្រោះដោយការរំលោភសិទ្ធិសេរីភាព និងអំពើជួញដូរមនុស្សចំនួន៧ ៩៥៣នាក់ពីប្រទេសចំនួន៨ ជាអាទិ៍ ថៃ ឡាវ វៀតណាម ម៉ាឡេស៊ី ចិន ឥណ្ឌូនេស៊ី មីយ៉ាន់ម៉ា សិង្ហបុរី»។

ជាមួយគ្នានេះ លោក អ៊ុច បូររិទ្ធ បានគូសបញ្ជាក់ថា ស្ថានទូតរបស់កម្ពុជាប្រចាំនៅបណ្ដាប្រទេសនានា តែងតែបានយកចិត្តទុកដាក់ខ្ពស់ក្នុងការប្រាស្រ័យទាក់ទងជាមួយពលរដ្ឋកម្ពុជាដែលរស់នៅបរទេសជាប់ជាប្រចាំ ជាពិសេសប្រជាពលរដ្ឋកម្ពុជាដែលរស់នៅសហរដ្ឋអាមេរិក បារាំង អឺរ៉ុប និងអូស្ត្រាលី ជាដើម។ ក្នុងនោះ ស្ថានទូតកម្ពុជា ក៏បានសម្របសម្រួលដល់សេចក្តីត្រូវការរបស់ប្រជាពលរដ្ឋ សិស្ស និស្សិត ពលករ ដែលកំពុងរស់នៅ ធ្វើការ និងសិក្សានៅបរទេស ដែលរួមមានការផ្តល់សេវារដ្ឋបាល សេវាកុងស៊ុល និងការឧបត្ថម្ភគាំពារផ្សេងៗជាច្រើន។

ពាក់ព័ន្ធនឹងទំនាក់ទំនងទ្វេភាគី គឺកម្ពុជាបានបន្តពង្រឹងទំនាក់ទំនង និងសហប្រតិបត្តិការទ្វេភាគីជាមួយបណ្ដាប្រទេសជាមិត្តជាច្រើននៅលើពិភពលោក តាមរយៈសកម្មភាពរបស់ស្ថានទូត និងស្ថានតំណាងអចិន្ត្រៃយ៍កម្ពុជាប្រចាំនៅប្រទេសទាំងនោះ។ យោងតាមរបាយការណ៍ គិតមកដល់ពេលនេះ កម្ពុជា មានស្ថានទូត និងស្ថានតំណាងអចិន្ត្រៃយ៍ប្រចាំនៅបរទេសចំនួន៣១ ស្ថានអគ្គកុងស៊ុលចំនួន១២ កុងស៊ុលកិត្តិយសចំនួន២៦ និងមានមន្ត្រីការទូតដែលកំពុងបម្រើការ និងបំពេញបេសកកម្មនៅបរទេសសរុបចំនួន ២០២នាក់៕

ដោយ៖ ធឿន វ៉ាន់សុង