ក្រុមហ៊ុនជប៉ុន គ្រោងបង្កើតរោងចក្រផលិតអេតាណុល​ចេញពីដំឡូងមី កាត់បន្ថយឧស្ម័នកាបូនិច ជួយដល់បរិស្ថាន​នៅកម្ពុជា

លោក KOJIMA Masanobu អគ្គនាយកក្រុមហ៊ុន KOJIMAHOLDINGS Co.,Ltd ចង់វិនិយោគបង្កើត​រោងចក្រអេតាណុល ចេញពីដំឡូងមី តាមរយៈការប្រើប្រាស់បច្ចេកវិទ្យា និងឧបករណ៍ទំនើប ដើម្បីជួយកាត់​បន្ថយឧស្ម័នកាបូនិច ដល់បរិស្ថាននៅកម្ពុជា។

លោក ឌិត ទីណា រដ្ឋមន្រ្តីក្រសួងកសិកម្ម បានសម្តែងការស្វាគមន៍ និងគាំទ្រចំពោះក្រុមហ៊ុនដែលចង់វិនិយោគ​លើការបង្កើត​រោងចក្រ​អេតាណុល( Ethanol) នៅកម្ពុជានេះ ដោយលោកមើលឃើញថា ជាការចូលរួមចំណែក​ដ៏សំខាន់មួយក្នុងការកាត់បន្ថយឧស្ម័នកាបូនិច ជួយដល់បរិស្ថាន និងលើកកម្ពស់ជីវភាពប្រជាជន។

នៅក្នុងជំនួបពិភាក្សាការងារជាមួយប្រធានក្រុមហ៊ុន​ KOJIMAHOLDINGS Co.,Ltd កាលពីថ្ងៃទី ១៧ មីនា លោករដ្ឋមន្រ្តី ឌិត ទីណា ចង់ឱ្យគម្រោងនេះ លេចចេញជារូបរាងឡើង ដោយក្រសួងនឹងជួយសម្រួល​ឱ្យមានការចាប់​ដៃសហការក៏ដូចជារកដៃគូវិនិយោគនានា ពោលគឺទាំងទិដ្ឋភាពផ្លូវច្បាប់ បច្ចេកទេស និងនយោបាយ ព្រមទាំងជួយ​ជំរុញឱ្យមានការចូលរួមពីកសិករ អ្នកផលិតដើម្បីផ្គត់ផ្គង់ ឱ្យស្របទៅតាមតម្រូវការរបស់ជប៉ុនផងដែរ។

ជាមួយគ្នានេះ លោក ឌិត ទីណា បានណែនាំឱ្យក្រុមហ៊ុនធ្វើការសិក្សាឱ្យបានច្បាស់លាស់ពីខ្សែច្រវាក់​តម្លៃដំឡូងមី​នៅកម្ពុជា រួមទាំងថ្លៃដើម ទីតាំងរោងចក្រ និងការដឹកជញ្ជូនជាដើម ដើម្បីមើលឱ្យឃើញពីភាពជោគជ័យ និងមាន​និរន្តរភាព។ បើតាមលោករដ្ឋមន្រ្តី ចំពោះការដឹកជញ្ជូនផ្លូវទឹក គឺជាជម្រើសដ៏ល្អបំផុត និងជួយកាត់បន្ថយថ្លៃដើម​បានច្រើន។ បន្ថែមលើនេះ ចំណុចសំខាន់ក្នុងការសហការធ្វើការងារជាមួយគ្នា ក្រុមហ៊ុនត្រូវគិតគូរក្នុង​ការអនុវត្ត​កសិកម្មតាម​កិច្ចសន្យា (Contract Farming) ដើម្បីធានានូវទំនុកចិត្ត ការផលិត ការផ្គត់ផ្គង់ និងតម្លៃ។

ទាក់ទិននឹងទីផ្សារដំឡូងមី គិតត្រឹមថ្ងៃទី១៤ ខែមីនា ឆ្នាំ ២០២៣ កម្ពុជាបាននាំចេញដំឡូងមីស្រស់ចំនួន ១៤៨.៣១០​តោន ទៅប្រទេសវៀតណាម និងថៃ, កាកសំណល់ដំឡូងមី ៣៤.៦៦៤តោន និងចំណិតដំឡូងមីក្រៀមចំនួន ៧៧៨.៥២៨​តោន នាំចេញទៅវៀតណាម ថៃ និងចិន, និងម្សៅដំឡូងមី ១៣.៤៦៧,៣០តោន នាំចេញទៅប្រទេសចិន ជប៉ុន និងឥណ្ឌា៕