លម្អិតប្រវត្តិសិក្សាឯកឧត្តម ហ៊ុន ម៉ានិត មេបញ្ជាការរងកងទ័ពជើងគោក

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានសម្រេចតែងតាំងមុខតំណែងឯកឧត្តមឧត្ដមសេនីយ៍ឯក ហ៊ុន ម៉ានិត ជាមេបញ្ជាការរងកងទ័ពជើងគោក បន្ថែមលើមុខងារបច្ចុប្បន្នដែលកំពុងកាន់ជាអគ្គនាយកអគ្គនាយកដ្ឋានចារកិច្ច។ ការតែងតាំងនេះ គឺស្របពេលដែលឯកឧត្តមបណ្ឌិត ហ៊ុន ម៉ាណែត ដែលជាមេបញ្ជាការកងទ័ពជើងគោក ត្រូវបានដំឡើងឋានន្តរស័ក្តិជានាយឧត្តមសេនីយ៍ផ្កាយមាសបួន នាពេលថ្មីៗនេះ។

ក្នុងចំណោមកូនប្រុសស្រីចំនួន ៥រូប មានតែកូនប្រុស ៣រូបប៉ុណ្ណោះរបស់សម្ដេចតេជោ ហ៊ុន សែន និងសម្ដេចកិត្តិព្រឹទ្ធ បណ្ឌិត ប៊ុន រ៉ានី ដែលកំពុងកាន់តំណែងជាន់ខ្ពស់ក្នុងកិច្ចការរដ្ឋ។ តែយ៉ាងណា ការតែងតាំងមុខតំណែងឲ្យកូនៗរបស់សម្ដេចតេជោនាយករដ្ឋមន្ត្រីជាបន្តបន្ទាប់នេះ គឺធ្វើឡើងដោយឈរលើសមត្ថភាព គួបផ្សំនឹងកម្រិតវប្បធម៌ដ៏ជ្រៅជ្រះ និង បទពិសោធការងារ ជាពិសេសអ្នកបន្តទាំង៣រូបសុទ្ធតែបានបញ្ចប់ការសិក្សាថ្នាក់ក្រោយឧត្តមសិក្សា និងថា្នក់បណ្ឌិតនៅបរទេស។

បើនិយាយអំពីឯកឧត្តមឧត្តមសេនីយ៍ ហ៊ុន ម៉ានិត គឺឯកឧត្តមបានចូលរៀននៅសាលាចតុមុខ រាជធានីភ្នំពេញ កាលចន្លោះឆ្នាំ​១៩៨៧ ដល់ឆ្នាំ១៩៩២។ នៅពាក់កណ្ដាលឆ្នាំ១៩៩២ ក្នុងវ័យទើបតែ១១ឆ្នាំ ឯកឧត្តម ហ៊ុន ម៉ានិត ត្រូវបានក្រុមគ្រួសារបញ្ជូនឲ្យទៅសិក្សានៅសាលាធម្យមសិក្សានៅប្រទេសបារាំង។

ក្រោយបញ្ចប់ការសិក្សាកម្រិតមធ្យមសិក្សាក្នុងឆ្នាំ១៩៩៨ ឯកឧត្តម ហ៊ុន ម៉ានិត បានបន្តការសិក្សាថ្នាក់វិទ្យាល័យនៅប្រទេសបារាំងដដែល។ តែនៅពាក់កណ្ដាលឆ្នាំ១៩៩៨ ឯកឧត្តមក៏បានចាកចេញពីប្រទេសបារាំង ហើយទៅសិក្សានៅវិទ្យាល័យ PORTLEDGE សហរដ្ឋអាមេរិក ជំនួសវិញ។

លុះក្នុងឆ្នាំ២០០២ ឯកឧត្តម ហ៊ុន ម៉ានិត បានចាប់ផ្ដើមចូលសិក្សានៅកម្រិតមហាវិទ្យាល័យ ដោយឯកឧត្តមបានទទួលសញ្ញាបត្រថ្នាក់បរិញ្ញាបត្រផ្នែកសេដ្ឋកិច្ច នៃសាកលវិទ្យាល័យ Hofstra ទីក្រុង ញូយ៉ក សហរដ្ឋអាមេរិក ក្នុងឆ្នាំ២០០៦ និងក្នុងឆ្នាំ២០០៨ ឯកឧត្តម ក៏បានបញ្ចប់សញ្ញាបត្រ​អនុបណ្ឌិតផ្នែកធុរកិច្ចអន្តរជាតិ នៃសាកលវិទ្យាល័យ Deakin ប្រទេសអូស្ត្រាលី។

ចំពោះបទពិសោធការងារ គឺដំបូងឡើយ ឯកឧត្តម ហ៊ុន ម៉ានិត ធ្វើជាជំនួយការរបស់សម្ដេចតេជោ ហ៊ុន សែន ខណៈ ឯកឧត្តមត្រូវបានតែងតាំងជាអគ្គនាយកនៃអគ្គនាយកដ្ឋានចារកិច្ច ក្រសួងការពារជាតិ តាំងពីអំឡុងឆ្នាំ២០១៥។ ​ក្រៅ​ពី​នេះ ​ឯកឧត្តម ហ៊ុន ម៉ានិត ​ក៏​មាន​តួនាទីផ្សេងៗ​ទៀត​ ដូច​ជា​ នាយករង​ខុទ្ទកាល័យសម្ដេច​នាយករដ្ឋមន្ត្រី តួនាទីជាអគ្គលេខាធិការ​រង​នៃ​អាជ្ញាធរ​ជាតិ​ដោះស្រាយ​ទំនាស់​ដីធ្លី​ និង​ជា​អនុ​ប្រធាន​គណៈ​កម្មការ​សម្រាប់ការ​ដោះ​ស្រាយ​បញ្ហា​កូដកម្ម​ និង​បាតុកម្ម​ ជាដើម៕

ដោយ៖ ធឿន វ៉ាន់សុង