ក្រសួងអប់រំ លើកកម្ពស់គោលនយោបាយសាលាបៃតង ដើម្បីការអភិវឌ្ឍសុខភាពសិក្សា

ក្នុងនាមថ្នាក់ដឹកនាំក្រសួងអប់រំ យុវជន និងកីឡា លោកស្រីបណ្ឌិត សឿ សុជាតា អនុរដ្ឋលេខាធិការ អមដំណើរដោយលោកស្រីវេជ្ជបណ្ឌិត ឆាយ គឹមសុទ្ធាវី ប្រធាននាយកដ្ឋានសុខភាពសិក្សា និងសហការីនៃនាយកដ្ឋានពាក់ព័ន្ធ បានចូលរួមជាអធិបតីក្នុងព្រឹត្តិការណ៍ប្រកួតប្រណាំងសាលាស្អាតក្នុងខេត្តបន្ទាយមានជ័យ ដែលផ្តោតជាពិសេសលើការអនុវត្តល្អនៃការផ្តល់ និងប្រើប្រាស់ទឹកស្អាតដើម្បីសុវត្ថិភាព និងការកសាងព្រមទាំងប្រើប្រាស់ហេដ្ឋារចនាសម្ព័ន្ធអនាម័យស្តង់ដា រួមមានបង្គន់អនាម័យ កន្លែងលាងដៃ និងការរៀបចំបរិស្ថានស្អាតក្នុងសាលារៀន និងសហគមន៍ ដែលស្ថិតក្រោមគម្រោងកម្មវិធីនៃអង្គការការីតាស នារសៀលថ្ងៃទី៣០ ខែមីនា ឆ្នាំ២០២៣។

គម្រោងអភិវឌ្ឍន៍ បានអនុវត្តក្នុងចំណោមសាលារៀនចំនួន ៥៣ សាលា និងសាលាចំនួន២២ បានប្រតិបត្តិទទួលបានជោគជ័យវិវឌ្ឍក្លាយជាសាលាជ័យលាភីប្រែក្លាយពីចំណាត់ថ្នាក់ផ្កាយ សូន្យ (០)ទៅជាសាលាដែលមានចំណាត់ថ្នាក់ផ្កាយ ៣។

លោកស្រីបណ្ឌិត សឿ សុជាតា បានទទួលស្គាល់ និងលើកទឹកចិត្តឱ្យមន្រ្តីអប់រំទាំងអស់នៅទូទាំងខេត្ត ចូលរួមលើកកម្ពស់សុខភាពសិក្សា និងបន្តជំរុញការចូលរួមកាន់តែប្រសើរបន្ថែមទៀតការរៀបចំបរិស្ថានបៃតង អនាម័យស្អាត នៅតាមគ្រឹះស្ថានសិក្សាគ្រប់កម្រិតនៅទូទាំងខេត្ត ព្រោះខ្លឹមសារ និងបទពិសោធន៍ដែលទទួលបានពីគម្រោងនេះ ពិតជាជួយកសាងទម្លាប់ល្អជូនដល់កុមារ និងយុវជនកម្ពុជាក្នុងការរក្សាបានអនាម័យល្អដើម្បីសុខភាព និងការអភិវឌ្ឍបរិស្ថានបៃតងល្អទាំងក្នុងគ្រឹះស្ថានសិក្សា និងបន្តទៅដល់សហគមន៍។

ទន្ទឹមនឹងនេះផលនៃគម្រោងនេះ ក៏ជាចំណែកដ៏វិសេសវិសាលដែលបានគាំទ្រដល់គោលនយោបាយអប់រំ ក៏ដូចជាការបំពេញសិទ្ធិមនុស្ស សិទ្ធិកុមារ ដើម្បីអភិវឌ្ឍខ្លួនក្លាយជាមូលធនមនុស្សដែលមានសក្តានុពលពេញលេញឈានទៅសម្រេចគោលដៅអភិវឌ្ឍជាតិនាឆ្នាំ២០៣០ និងឆ្នាំ២០៥០។

លោក ម៉ាក្ស គូលឃ្ល័រ Marc Gloekler ប្រធានអង្គការការីតាស្ស បានសន្យានឹងបន្តការអភិវឌ្ឍមូលដ្ឋានសាលាបៃតងបន្ថែមទៀតនៅក្នុងខេត្តបន្ទាយមានជ័យ និងបណ្តាខេត្តផ្សេងទៀតជាបន្តបន្ទាប់ទៅតាមលទ្ធភាព។

ចុងបញ្ចប់ លោកស្រីបណ្ឌិត សឿ សុជាតា បានកំណត់ថា ទីណាដែលមានគណៈគ្រប់គ្រងឈ្លាសវៃប្រកបដោយឆន្ទៈទទួលខុសត្រូវ មានគ្រូបង្រៀនល្អ បរិស្ថានស្រស់បំព្រង សិស្សពូកែ សហគមន៍កន្លែងនោះនឹងមានការអភិវឌ្ឍរុងរឿង៕