លោក ជា វ៉ាន់ដេត អញ្ជើញបើកកម្មវិធីសង្រ្កាន្តនៅភូមិក្រាំងធ្នង់ ឃុំក្រាំងធ្នង់ ស្រុកបាទី ខេត្តតាកែវ

លោក ជា វ៉ាន់ដេត ប្រធានក្រុមការងារចុះជួយស្រុកបាទី កាលពីព្រឹកថ្ងៃទី ១២ ខែមេសា ឆ្នាំ ២០២៣នេះ បានអញ្ជើញបើកកម្មវិធីសង្រ្កាន្តភូមិភូមិក្រាំងធ្នង់ ដើម្បីទទួលទេវតាឆ្នាំថ្មីប្រពៃណីខ្មែរ ដោយកម្មវិធីនេះ ក៏មានការចូលរួមពីលោក គី តិច ប្រធានក្រុមការងារចុះជួយឃុំក្រាំងធ្នង់ ផងដែរ។

កម្មវិធីសង្ក្រានភូមិក្រាំងធ្នង់នេះ រៀបចំឡើងដោយលោក ឈិត បូរ៉ាវុធ អនុប្រធានក្រុមការងារចុះជួយឃុំក្រាំងធ្នង់ ហើយទទួលបន្ទុកភូមិក្រាំងធ្នង់ និងសមាជិកមេធាវី ចុះជួយភូមិក្រាំងធ្នង់រួមជាមួយសមា​ជិកក្រុមមេធាវីរារដ្ឋាភិបាលចុះជួយឃុំក្រាំងធ្នង់ រួមជាមួយប្រជាពលរដ្ឋនៅក្នុងភូមិឃុំក្រាំងធ្នង់ ជាច្រើននាក់ទៀត។

សង្រ្កាន្តនៅភូមិក្រាំងធ្នង់ ឃុំក្រាំងធ្នង់ ស្រុកបាទីខេត្តតាកែវនេះ ក៏មានការៀបចំសម្តែងរបាំត្រុដិផងដែរ ដើម្បីអបអរសាទរនៅក្នុងឱកាសបុណ្យចូលឆ្នាំថ្មីប្រពៃណីខ្មែរ ឆ្នាំថោះ ពុទ្ធសករាជ ២៥៦៧ ដែលនឹងចាប់ផ្តើមចាប់ពីថ្ងៃទី ១៤ ដល់ថ្ងៃទី ១៦ ខែមេសាឆាប់ៗនេះ។ ការរៀបចំពិធីសម្ដែងរបាំឆៃយ៉ាំ និងរបាំត្រុដិនេះ ក៏ដើម្បីបណ្ដេញឧបទ្រពចង្រៃនៅក្នុងឆ្នាំចាស់ និងនាំមកនូវការរីកចម្រើន សុភមង្គល ព្រមទាំងទទួលបាននូវភាពជោគជ័យ ចំពោះប្រជាពលរដ្ឋខ្មែរនៅក្នុងភូមិឃុំក្រាំងធ្នង់ ក៏ដូចជាប្រទេសខ្មែរទាំងមូល សម្រាប់ឆ្នាំថ្មីនេះផងដែរ។

ថ្លែងនៅក្នុងឱកាសបើកសង្រ្កាន្តភូមិក្រាំងធ្នង់នេះ លោក ជា វ៉ាន់ដេត លើកឡើងថា ការដែលប្រជាព​លរដ្ឋមានឱកាស ជួបជុំគ្នារាំលេងកម្សាន្ដ និងលេងល្បែងប្រពៃណីនាពេលនេះ គឺដោយសារតែប្រទេសជាតិ មានសុខសន្តិភាព និងការអភិវឌ្ឍ។ សន្តិភាព និងការអភិវឌ្ឍនេះ គឺដោយសារតែការដឹកនាំរបស់ គណបក្សប្រជាជនកម្ពុជា ដែលមានសម្តេចតេជោ ហ៊ុន សែន ជានាយករដ្ឋមន្រ្តី និងជាមគ្គុទេសឯក។

នៅក្នុងឱកាសនោះដែរ លោក គី តិច ប្រធានក្រុមការងារចុះជួយឃុំក្រាំងធ្នង់ ក៏បានលើកឡើងអំពីភាពរីកចម្រើនរបស់ប្រទេសកម្ពុជានាពេលបច្ចុប្បន្ននេះ ហើយលោកក៏បានរំលឹកដល់ប្រជាពលរដ្ឋនៅឃុំក្រាំងធ្នង់ ក៏ដូចជានៅស្រុកបាទី ខេត្តតាកែវទាំងអស់ ត្រូវរួមគ្នាបន្តថែរក្សាការពារសុខសន្តិភាព ហើ​យដើម្បីមានសុខសន្តិភាព និងការអភិវឌ្ឍនេះ គឺយើងទាំងអស់គ្នាត្រូវបន្តគាំទ្រដល់គណបក្សប្រជាជនកម្ពុជា។ មានគណបក្សប្រជាជនកម្ពុជា គឺមានអ្វីៗទាំងអស់។

បន្ថែមពីលើនេះលោក គី តិច ក៏បានក្រើនរំលឹកដល់ប្រជាពលរដ្ឋទាំងអស់ មិនថាតែនៅស្រុកបាទីនោះទេ ត្រូវមានការប្រុងប្រយ័ត្នខ្ពស់ ចំពោះការធ្វើដំណើរទៅស្រុកកំណើត និងទៅកន្លែងកម្សាន្ដនានា ត្រូវចូលរួមគោរពច្បាប់ចរាចរណ៍ និងមានការយោគយល់គ្នាទៅវិញទៅមក ផងដែរ។

សូមជម្រាបថា សង្រ្កាន្តភូមិក្រាំងធ្នង់ដែលរៀបចំយ៉ាងឱឡារឹកនេះ គឺដើម្បីបើកឲ្យប្រជាពលរដ្ឋមកពីគ្រប់ទិសទីលេងកម្សាន្ដសប្បាយ និងល្បែងប្រជាប្រិយប្រពៃណីខ្មែររយៈពេល ៣ថ្ងៃ ហើយក្រៅពីល្បែងប្រជាប្រិយក៏មានការប្រគំតន្រ្តីផងដែរ ដែលជាការឧបត្ថម្ភរបស់លោក ឈិត បូរ៉ាវុធ និងក្រុមការងារចុះជួយភូមិ ឃុំនិងស្រកបាទី ទាំងមូល៕