ជនបរទេសល្បីឈ្មោះ៥រូបនេះ ទទួលបានសញ្ជាតិខ្មែរ ក្រោយបានរួមចំណែកជួយកម្ពុជា

សញ្ជាតិ សំដៅដល់ចំណងគតិយុត្ត និង​នយោបាយ​ដែល​ភ្ជាប់ជនបរទេសទៅនឹងប្រ​ទេសណាមួ​យ។ ចំពោះការផ្តល់ស​ញ្ជាតិ​ខ្មែរឲ្យជនបរទេសណាមួយ ត្រូវមាន​លក្ខខណ្ឌមួយចំនួនដែលអនុលោមតាមច្បា​ប់ស្ដីពីសញ្ជាតិរបស់កម្ពុជា។ នៅថ្ងៃនេះ «កម្ពុជាថ្មី» សូមណែនាំឲ្យស្គាល់ជនបរទេសល្បីឈ្មោះចំនួន៥រូបដែលទទួលបានសញ្ជាតិខ្មែរ ក្រោយអ្នកទាំងនោះបានរួមចំណែកក្នុងបុព្វហេតុបម្រើជាតិ និងប្រជាជនកម្ពុជា។

១/ កីឡាករប្រដាល់ ធីអាហ្គូ តេយសឺរ៉ា  (THIAGO TEIXEIRA)

កីឡាករ​ប្រដាល់ Thiago Teixeira បាន​ទទួល​សញ្ជាតិ​ខ្មែរ​ដោយសញ្ជាតូបនីយកម្មជាចង្កោមគ្រួសារ កាល​ពី​​​ថ្ងៃទី១១ ខែ​មេសា ឆ្នាំ​២០២៣​ បន្ទាប់​ពីកីឡាករជនជាតិប្រេស៊ីលរូបនេះ បាន​រួម​ចំណែក​​ក្នុង​ការ​ផ្សព្វផ្សាយ និង​លើក​កម្ពស់​គុន​ខ្មែរទៅកាន់ពិភពលោក។ ក្រោយបានប្រកួតជាមួយកីឡាករកម្ពុជា ធឿន ធារ៉ា កាលពីខែកុម្ភៈ កីឡាករ Thiago បានចាប់អារម្មណ៍ខ្លាំងលើគុនខ្មែរ ហើយបានសម្រេចចិត្ត​មក​ហ្វឹក​ហាត់​គុន​ខ្មែរ​នៅ​​កម្ពុជា​ ថែមទាំងបាន​ប្រកាសធ្វើ​ជា​តំណាង​ឲ្យ​គុន​ខ្មែរក្នុងការប្រកួត​​លើ​ឆាក​អន្តរជាតិផងដែរ។

២/ អ្នកនាង អ៊ែនជេលីណា ចូលី (ANGELINA JOLIE)

ពេលលឺឈ្មោះ អ៊ែន​ជេ​លីណា ចូលី មជ្ឈដ្ឋានទាំងជាតិ និងអន្តរជាតិ ប្រាកដជាបានស្គាល់យ៉ាងច្បាស់ គឺជាឈ្មោះតារាហូលីវូដដ៏មានកេរិ៍្តឈ្មោះល្បីល្បាញ។ អ្នកនាង អ៊ែន​ជេ​លីណា ចូលី ត្រូវបានគេចាត់ទុកថា ជាតារាហូលីវូដម្នាក់ដែលធ្លាប់បានមកកាន់ប្រទេសកម្ពុជាជាច្រើនលើក ច្រើនសារ ចាប់តាំងពីឆ្នាំ២០០០មក។ តារាហូលីវូដរូបនេះ បានរួមចំណែកលើកិច្ចការមនុស្សធម៌នៅកម្ពុជាយ៉ាងច្រើនតាមរយៈមូលនិធិម៉ាដក្សចូលីភីត ដែលការបង្កើតឡើងនូវមូលនិធិនេះ គឺបន្ទាប់ពីអ្នកនាងបានយកក្មេងប្រុសកម្ពុជាម្នាក់ទៅចិញ្ចឹមដែលប្រៀបដូចជាកូនបង្កើតរបស់នាង។  

មូលនិធិម៉ាដក្សចូលីភីត ជាកម្មវិធីអភិរក្ស និងអភិវឌ្ឍន៍​សហគមន៍ក្នុងតំបន់​ការពារ​សំឡូត​ ខេត្តបាត់ដំបង ដោយបាន​ផ្តល់ការ​គាំទ្រ​ដល់​ភូមិ​នានា​នៅ​តាម​ជនបទ ការថែរក្សាការពារព្រៃឈើ និងសត្វព្រៃដែលកំពុងរងការគំរាមកំហែង រួមទាំងបានដាក់បញ្ចូលគម្រោងគាំទ្រវិស័យកសិកម្ម អប់រំ សុខាភិបាល​ និងកិច្ចពង្រឹងអំណាចស្ត្រី។ ការលះបង់ទាំងនេះហើយ ទើបព្រះមហាក្សត្រនៃកម្ពុជា បានត្រាស់បង្គាប់ផ្ដល់សញ្ជាតិខ្មែរដោយសញ្ជាតូបនីយកម្មជូនអ្នកនាង អ៊ែនជេលីណា ចូលី កាលពីអំឡុងខែសីហា ឆ្នាំ២០០៥។

៣/ លោក ដាវិស បេន យ៉ូសែប (DAVIS BENJAMIN JOSEPH)

កាលពីអំឡុងឆ្នាំ២០២២ ព្រះមហាក្សត្រនៃកម្ពុជា បានត្រាស់បង្គាប់ផ្ដល់សញ្ជាតិខ្មែរដោយសញ្ជាតូបនីយកម្មជាចង្កោមដល់គ្រួសារសកម្មជនការពារព្រៃឈើ លោក ដាវិស បេន យ៉ូសែប ដែលមានសមាជិកចំនួន ៤រូប គឺលោក ដាវិស បេន យ៉ូសែប ​ភរិយារបសលោក ព្រមទាំងកូនស្រីចំនួន២នាក់ទៀត។ លោក ដាវិស បេន យ៉ូសែប គឺជាជនជាតិអាមេរិកាំង ដែលបានលះបង់កម្លាំងកាយកម្លាំងចិត្ត និងពេលវេលាប្រហែលជាង៣០ឆ្នាំក្នុងការរស់នៅក្នុងប្រទេសកម្ពុជា ដើម្បីចូលរួមការពារ និងអភិរក្សធនធានធម្មជាតិក្នុងដែនជម្រកសត្វព្រៃភ្នំត្នោត-ភ្នំពក ខេត្តព្រះវិហារ។

៤/ កីឡាករ DEREK BIDAUT

កីឡាករ DEREK BIDAUT គឺជា​ជន​ជាតិ​បារាំងដែលបាន​​មក​រស់​នៅ​កម្ពុជា កាល​ពី​​ឆ្នាំ​២០០៩ បន្ទាប់​ពី​ជាប់​ចិត្ត​យ៉ាង​ខ្លាំង​​នឹង​ក្បាច់​គុន​បុរាណ​ខ្មែរ ជា​ពិសេស​​គុន​​​ល្បុក្កតោ។ ​កីឡាករ DEREK BIDAUT​ បាន​ចូល​រួម​​សម្តែង​​គុន​​ល្បុក្កតោ​​ក្នុង​ពិធីថ្នាក់ជាតិ​សំខាន់​ធំ​ៗជា​ច្រើន ដូច​ជា​ ​អង្គរ​សង្ក្រាន្ត បុណ្យសមុទ្រ​ ​កីឡា​ជាតិ ​និង​កម្មវិធី​អន្តរជាតិ​ផ្សេងៗ ខណៈ បច្ចុប្បន្ន លោកក៏ជា​​គ្រូ​បង្ហាត់ក្បាច់​គុន​ខ្មែរ និង​ល្បុក្កតោ ផងដែរ។ ការតស៊ូ​ក្នុង​អាជីព​ក្បាច់​គុន​ល្បុក្កតោ និង​គុន​ខ្មែរ​អស់​រយៈ​ពេលប្រមាណ​ជាង​​១០​ឆ្នាំ​ កីឡាករ​ជនជាតិបារាំងរូបនេះ ត្រូវ​បាន​ព្រះ​មហា​ក្សត្រ ត្រាស់បង្គាប់​ផ្តល់​សញ្ជាតិ​ខ្មែរ​ កាល​ពី​ឆ្នាំ​២០២០។

៥/ លោក Christian

លោក Christian ដែល​ជា​ស្ថាបនិក​នៃ​អង្គការ​ដើម្បី​ស្នាម​ញញឹម​នៃ​កុមារ និងភរិយា​របស់​លោក ត្រូវបាន​អតីត​ព្រះមហា​វីរក្សត្រ ​ព្រះបាទ សម្តេច ព្រះ​នរោត្តម សីហនុ ​ផ្ដល់សញ្ជាតិ​ជាពលរដ្ឋ​ខ្មែរ មុន​ពេល​លោក Christian បាន​ទទួល​មរណភាព​ក្នុង​វ័យ​៨២ឆ្នាំ កាលពី​ខែ​កញ្ញា ឆ្នាំ​២០១៦​។ លោក Christian និង​ភរិយា​ បាន​បង្កើត​អង្គការដើម្បី​ស្នាម​ញញឹម​នៃ​កុមារ ដែល​ជួយ​ឧបត្ថម្ភ​ដល់​ការ​ថែទាំ និង​ការ​អប់រំ​ដល់​ក្មេង​អនាថា ក្មេង​រើស​សំរាម​នៅ​ស្ទឹងមានជ័យ និង​ក្មេង​ក្រីក្រ​រាប់សិបម៉ឺននាក់ ចាប់​តាំង​ពី​ដើម​ឆ្នាំ​១៩៩៥​មក។ លោក និងភរិយា ក៏តែងតែទទួលបាន​ការកោតសរសើរ​ដោយ​ផ្ទាល់ពីអង្គព្រះមហាក្សត្រ​នៃ​កម្ពុជា ក៏ដូចជា​ប្រជាពលរដ្ឋ​កម្ពុជា​ផងដែរ៕

ដោយ៖ ធឿន វ៉ាន់សុង