សង្ក្រាន្តស្វាយរៀង បន្តរៀបចំកម្មវិធីតំបន់ត្រជាក់ចិត្ត ក្រោយចប់ចូលឆ្នាំ

សង្ក្រាន្តស្វាយរៀង នឹងបន្តរៀបចំកម្មវិធីតំបន់ត្រជាក់ចិត្ត ចំនួន ២ចុងសប្ដាហ៍បន្តទៀត បន្ទាប់ពីបញ្ចប់ពិធីបុណ្យចូលឆ្នាំថ្មី។

គណៈកម្មការរៀបចំព្រឹត្តិការណ៍សង្ក្រាន្តស្វាយរៀង នៅថ្ងៃទី១៨ ខែមេសា ឆ្នាំ២០២៣នេះ បានចេញសេចក្តីជូនដំណឹងដល់ មន្ត្រីរាជការ ប្រជាពលរដ្ឋក្នុងខេត្តស្វាយរៀង និងប្រជាពលរដ្ឋនៅតាមបណ្តាខេត្តនានា មេត្តាជ្រាបថា យោងតាមអនុសាសន៍របស់ អភិបាលនៃគណៈអភិបាលខេត្តស្វាយរៀង ដើម្បីបន្តភាពសប្បាយរីករាយជូនដល់បងប្អូនប្រជាពលរដ្ឋក្នុងខេត្តស្វាយរៀងក្នុងឱកាសបុណ្យចូលឆ្នាំខ្មែរ ក្រុមការងារសង្ក្រាន្តស្វាយរៀង សហការជាមួយអង្គភាពរដ្ឋករទឹកខេត្តស្វាយរៀង នឹងបន្តដំណើរការកម្មវិធីតំបន់ត្រជាក់ចិត្ត នៃកម្មវិធីសង្ក្រាន្តស្វាយរៀង រៀងរាល់ថ្ងៃសៅរ៍-អាទិត្យ រហូតដល់ដំណាច់ខែមេសា ឆ្នាំ២០២៣។

កម្មវិធីដូចខាងក្រោម៖

– ថ្ងៃសៅរ៍ និងថ្ងៃអាទិត្យ ទី២២-២៣ ខែមេសា ឆ្នាំ២០២៣ ចាប់បើកពីដំណើរពីម៉ោង ១៣:០០នាទី – ១៧:០០នាទី

– ថ្ងៃសៅរ៍ និងថ្ងៃអាទិត្យ ទី២៩-៣០ ខែមេសា ឆ្នាំ២០២៣ ចាប់បើកដំណើរការពីម៉ោង ១៣:០០នាទី – ១៧:០០នាទី

គណៈកម្មការរៀបចំព្រឹត្តិការណ៍សង្ក្រាន្តស្វាយរៀង សូមអញ្ជើញ ប្រជាពលរដ្ឋក្នុងខេត្តស្វាយរៀង និងប្រជាពលរដ្ឋនៅតាមបណ្តាខេត្តនានា មេត្តាចូលរួមសប្បាយ ចូលឆ្នាំថ្មីបន្តទៀតនៅក្នុងក្រុងស្វាយរៀង តាមបណ្ដោយផ្លូវមុខសាលាខេត្តស្វាយរៀង ឱ្យបានច្រើនកុះករ៕