សម្ដេចតេជោ ផ្ញើជូនបទចម្រៀង «ចន្ទរះលើរថយន្តក្រុង» សម្រាប់ជាចំណងដៃដល់កម្លោះ-ក្រមុំ ដែលស្គាល់គ្នាលើរថយន្តក្រុង

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានផ្ញើជូនបទចម្រៀងមួយបទ ដែលមានចំណងជើងថា «ចន្ទរះលើរថយន្តក្រុង» សម្រាប់ជាចំណងដៃដល់កម្លោះ-ក្រមុំ ដែលស្គាល់គ្នាលើរថយន្តក្រុង។

នៅក្នុងពិធីសម្ពោធដាក់ឲ្យប្រើប្រាស់ជាផ្លូវការអគារសម្ភព ស្ថិតនៅក្នុងបរិវេណនៃមន្ទីរពេទ្យកុមារជាតិ រាជធានីភ្នំពេញ កាលពីព្រឹកថ្ងៃទី ២០ ខែមេសានេះ សម្ដេចតេជោ ហ៊ុន សែន បានឲ្យដឹងថា ប្រជាជនប្រមាណជា ៥ម៉ឺននាក់ បានជិះរថយន្តក្រុង ដែលរៀបចំដោយសាលារាជធានីភ្នំពេញ ក្នុងអំឡុងពិធីបុណ្យចូលឆ្នាំថ្មី ប្រពៃណីជាតិខ្មែរ ដែលទើបនឹងបញ្ចប់កាលពីពេលថ្មីៗនេះ។

នៅក្នុងពិធីនោះ សម្ដេចតេជោ ហ៊ុន សែន បានលើកឡើងថា ប្រជាជនបានស្គាល់គ្នាលើរថយន្ដក្រុង និងដែលអាចមានកម្លោះ-ក្រមុំស្គាល់គ្នាផងដែរ ហើយប្រសិនបើមានកម្លោះ-ក្រមុំគូណា ដែលបានស្គាល់គ្នាលើរថយន្ដក្រុងអំឡុងពេលចូលឆ្នាំថ្មី រៀបអាពាហ៍ពិពាហ៍ សូមប្រាប់ដល់សម្ដេចផង។

ជាមួយគ្នានេះ តាមរយៈបណ្ដាញសង្គមតេលេក្រាម សម្ដេចតេជោ ហ៊ុន សែន ផ្ញើជូនបទចម្រៀងមួយបទមានចំណងជើងថា «ចន្ទរះលើរថយន្តក្រុង» ដើម្បីជាចំណងដៃសម្រាប់កម្លោះ-ក្រមុំទាំងឡាយដែលស្គាល់គ្នាលើរថយន្តក្រុងស្ដាប់កម្សាន្ដ ដែលជាចំហាយសប្បាយនៅសល់ពីចូលឆ្នាំជាមួយសមិទ្ធិផលថ្មីក្នុងឆ្នាំថ្មី៕