មកដឹងពីសាច់ក្រកធ្វើពីសាច់ក្របី ៣រសជាតិរបស់រាជបណ្ឌិត្យសភាកម្ពុជា

រាជបណ្ឌិត្យសភាកម្ពុជា បានកែច្នៃផលិតបានសាច់ច្រក (សាច់ក្រក) ចេញពីសាច់ក្របីតាំងពីឆ្នាំ២០២២ ដោយមាន៣រសជាតិ គឺរសជាតិបែបខ្មែរ រុស្ស៊ី និងចិន។ សាច់ច្រកសាច់ក្របីមានលក្ខណៈពិសេសត្រង់មិនមានខ្លាញ់ និងមានប្រូតេអ៊ីនខ្ពស់។

(រូបតំណាង)

សាច់ច្រកសាច់ក្របីដែលរាជបណ្ឌិត្យសភាកម្ពុជា ស្រាវជ្រាវ និងផលិតបានចេញមកពីផលិតចេញពីសាច់ក្របីចិញ្ចឹម នៅឧទ្យានរាជបណ្ឌិត្យសភាកម្ពុជា។ ការផលិតសាច់ច្រកបែបខ្មែរ និងមាន៣រសជាតិនេះ គឺជាការស្រាវជា្រវ និងផលិតចេញមកជាលើកដំបូងផងដែរ។

រាជបណ្ឌិត្យសភាកម្ពុជាបានបង្ហោះកាលពីថ្ងៃទី១៧ ខែឧសភា ឆ្នាំ២០២៣នេះ ពីគ្រឿងផ្សំ ការបរិភោគនៃរសជាតិទាំង៣ នោះគឺសាច់ច្រកបែបខ្មែរ រុស្ស៊ី និងចិន ដូចខាងក្រោម។

ទី១ សាច់ច្រករសជាតិបែបខ្មែរ៖ គឺផលិតចេញពីសាច់ក្របីសុទ្ធ លាយជាមួយនឹងគ្រឿងខ្មែរមានដូចជា អង្ករលីង រំដេង និងស្ករត្នោត។ ចំពោះក្លិនវិញ គឺមានក្លិនចេញពីគ្រឿងខ្មែរ មានរសជាតិជូរបន្តិច ផ្អែម និងប្រៃល្មម។ សាច់ច្រកបែបខ្មែរនេះ អាចទទួលទានជាមួយជ្រក់ល្ហុង និងនំប៉័ងអាំងកាន់តែមានរសជាតិឆ្ងាញ់។

សាច់ច្រកបែបខ្មែរ (រូបភាព៖ រាជបណ្ឌិត្យសភាកម្ពុជា)

ទី២ សាច់ច្រករសជាតិបែបរុស្ស៊ី៖ សាច់ច្រកសាច់ក្របីបែបរុស្ស៊ី ផលិតចេញពីសាច់ក្របីសុទ្ធ លាយជាមួយបន្លែដូចជាខ្ទឹមបារាំង ដំឡូងបារាំង ជីផាស្លី អំបិល ខ្ទឹមស L&P និងគ្រឿងផ្សំផ្សេងទៀត។ ចំពោះរសជាតិវិញគឺបែបស្រាល។

សាច់ច្រកបែបរុស្ស៊ី (រូបភាព៖ រាជបណ្ឌិត្យសភាកម្ពុជា)

ទី៣ សាច់ច្រករសជាតិបែបចិន៖ គឺផលិតចេញពីសាច់ក្របីសុទ្ធដូចគ្នា ដោយផ្សំជាមួយនឹងគ្រឿងចិន ទឹកប៉េងប៉ោះ ប្រេងល្ង និងគ្រឿងផ្សំផ្សេងទៀត។ សាច់ច្រកនេះមានក្លិនចេញពីគ្រឿងចិន រសជាតិជូរបន្តិច និងផ្អែម ប្រៃល្មម។ សាច់ច្រកបែបចិននេះ អាចទទួលទានជាមួយបន្លែច្រើនមុខដូចជា ស្ពៃបូគោ ស្ពៃក្តោប ខ្ញីស្រស់ ជីរណា ការ៉ុត និងបន្លែផ្សេងទៀត។

សាច់ច្រកបែបចិន (រូបភាព៖ រាជបណ្ឌិត្យសភាកម្ពុជា)

បើតាមប្រភពដដែលបញ្ជាក់ថា រាល់សាច់ក្របីដែលយកមកផលិត គឺយកសាច់សុទ្ធទាំងអស់ កិនដោយ​ម៉ាស៊ីនកិនសាច់ រួចលាយគ្រឿងទៅតាមរសជាតិទាំង៣បែប រួចច្រកចូលពោះវៀនជ្រូក។ បន្ទាប់ពីផ្សំគ្រឿង និងច្រករួចរាល់ហើយ គឺត្រូវយកទៅសម្ងួតនៅក្នុងម៉ាស៊ីនសម្ងួតដែលមានអនាម័យខ្ពស់ បន្ទាប់មកទើបធ្វើការវេចខ្ចប់។ ប្រសិនពលរដ្ឋមានបំណងចង់ទិញសាច់ច្រក (សាច់ក្រក) ពីសាច់ក្របីនេះ អាចរកទិញនៅ ផ្សារផលិតផលខ្មែររាជបណ្ឌិត្យសភាកម្ពុជា នៅក្នុងរាជបណ្ឌិត្យសភាកម្ពុជាតែម្តង៕