ប្រមុខរាជរដ្ឋាភិបាលប្រកាសបន្ថែមឧបត្ថម្ភសាច់ប្រាក់ដល់កម្មការិនីមានផ្ទៃពោះ

សម្ដេចតេជោ ហ៊ុន សែន នាយករដ្ឋមន្ត្រីកម្ពុជា បានប្រកាសថា រាជរដ្ឋាភិបាលកម្ពុជានឹងដំឡើងសាច់ប្រាក់ឧបត្ថម្ភបន្ថែមដល់កម្មការិនីបម្រើការងារក្នុងសេដ្ឋកិច្ចក្នុងប្រព័ន្ធ។

សម្ដេចតេជោ ហ៊ុន សែន ប្រកាសនៅក្នុងពិធីសំណេះសំណាលជាមួយ កម្មករ និយោជិត នៅខេត្តព្រះសីហនុនាព្រឹកថ្ងៃទី២២ ខែឧសភា ឆ្នាំ២០២៣។

សម្ដេចតេជោ ហ៊ុន សែនមានប្រសាសន៍ថា៖ «ពេលចាប់ផ្ដើមមានផ្ទៃពោះ ទៅពិនិត្យសុខភាពម្ដង ឥឡូវក្មួយៗមានប័ណ្ណ ប.ស.ស ទៅពិនិត្យសុខភាពគេអត់យកលុយ ប៉ុន្តែពេលដែលពូប្រកាសចេញ នៅពេលទៅពិនិត្យសុខភាពគេឱ្យលុយ ៤ ដង មុនពេលសម្រាល ដល់ពេលសម្រាលគេឱ្យកញ្ចប់ថវិកាមួយទៅពិនិត្យសុខភាព ១០ លើក រហូតដល់កូនអាយុ ២ ឆ្នាំ»។

សម្ដេចតេជោ ហ៊ុន សែនបញ្ជាក់ថា ប្រសិនបើយើងអនុវត្តបន្ថែម ក៏មិនអាចដួលរលំនូវសេដ្ឋកិច្ចរបស់កម្ពុជាទេ ប៉ុន្តែផ្ទុយទៅវិញវាក៏បានផ្ដល់ឱកាសសម្រាប់កម្មការិនី​មានសុខភាពល្អ។

កម្មវិធីឧបត្ថម្ភសាច់ប្រាក់ជូនដល់កម្មការនីមានផ្ទៃពោះ និងកុមារក្រោមអាយុ ២ឆ្នាំនេះ គឺអនុវត្តចំនួន ៣ដំណាក់កាល ដោយដំណាក់កាលទី១ ស្ត្រីមានផ្ទៃពោះទៅពិនិត្យផ្ទៃពោះចំនួន ៤លើកនឹងទទួលបានថវិកាក្នុង១លើកចំនួន ៤ម៉ឺនរៀល។ ពេលសម្រាលកូនភ្លាមស្ត្រីទទួលប្រាក់ចំនួន ២០ម៉ឺនរៀល។

ក្រោយសម្រាលកូនរួច ស្ត្រីទៅពិនិត្យសុខភាពទាំងម្តាយ និងកូនអាយុដល់ ២ឆ្នាំ ចំនួន ១០លើក ទទួលបានក្នុង១លើក ៤ម៉ឺនរៀល៕