បញ្ចៀស​អ្នក​ក្លែង​​បន្លំ​សញ្ញាបត្រ គ្រឹះស្ថានឧត្តម​សិក្សា ១១ កន្លែង សហការ​ប្រើ​ថ្នាល ​verify.gov.kh

នារសៀលម្សិលមិញនេះ នៅទីស្ដីការក្រសួងប្រៃសណីយ៍និងទូរគមនាគមន៍ មាន​ការ​​ចុះហត្ថលេខាលើ​កិច្ច​ព្រមព្រៀងស្ដីពី​កិច្ចសហប្រតិបត្តិការក្នុងការដាក់ឱ្យប្រើថ្នាលផ្ទៀងផ្ទាត់ឯកសារ verify.gov.kh ជាមួយ​គ្រឹះស្ថាន​ឧត្តម​សិក្សា​ចំនួន ១១ កន្លែង​ សម្រាប់ផ្ទៀងផ្ទាត់សញ្ញាបត្រ​កម្រិតឧត្ដមសិក្សា​ចេញដោយ​គ្រឹះស្ថាន​ឧត្ដមសិក្សា​នីមួយៗ។

​​គ្រឹះស្ថានឧត្ដមសិក្សា​ទាំង ១១ ដែល​បាន​ចុះ​កិច្ចព្រមព្រៀង​ប្រើប្រាស់​ថ្នាល​ផ្ទៀងផ្ទាត់ឯកសារ verify.gov.kh ​ក្នុង​នោះ​មាន​ ១) ​សាកលវិទ្យាល័យភូមិន្ទភ្នំពេញ ២) សាកលវិទ្យាល័យភូមិន្ទនីតិសាស្ត្រនិងវិទ្យាសាស្ត្រ​សេដ្ឋកិច្ច ៣) សាកលវិទ្យាល័យភូមិន្ទវិចិត្រសិល្បៈ ៤) វិទ្យាស្ថានបច្ចេកវិទ្យាកម្ពុជា ៥) វិទ្យាស្ថានជាតិអប់រំ ៦) សាកលវិទ្យាល័យជាតិបាត់ដំបង ៧) សាកលវិទ្យាល័យជាតិមានជ័យ ៨) សាកលវិទ្យាល័យ ហេង សំរិន ត្បូងឃ្មុំ ៩) វិទ្យាស្ថានជាតិកសិកម្មកំពង់ចាម ១០) វិទ្យាស្ថានកំពង់ឈើទាល និង ១១) សាកលវិទ្យាល័យអាមេរិកាំងភ្នំពេញ។

ថ្លែងក្នុងពិធីនេះ លោក ជា វ៉ាន់ដេត រដ្ឋមន្ត្រី​ក្រសួងប្រៃសណីយ៍និងទូរគមនាគមន៍ បានលើកឡើង​អំពីសារៈសំខាន់​នៃ​កិច្ច​សហការ​របស់​គ្រឹះស្ថានឧត្ដមសិក្សាទាំង ១១ ជា​ការចូលរួម​ចំណែក​អនុវត្តតាម​ការណែនាំ​ពី​​ប្រមុខ​រដ្ឋាភិបាល​ដែល​ចាត់ទុកឌីជីថលូបនីយកម្ម​ក្នុងវិស័យ​សាធារណៈ​និងឯកជន ជាការងារអាទិភាពដើម្បីកសាងរដ្ឋាភិបាលឌីជីថល សេដ្ឋកិច្ចឌីជីថល សង្គមឌីជីថល និងប្រជាជនឌីជីថល។

លោក​រដ្ឋមន្រ្តី​បន្ត​ថា ថ្នាលផ្ទៀងផ្ទាត់ឯកសារ verify.gov.kh គឺជាថ្នាលរបស់រាជរដ្ឋាភិបាលដែលអភិវឌ្ឍដោយក្រសួងប្រៃសណីយ៍និងទូរគមនាគមន៍ ត្រូវបានដាក់ឱ្យប្រើប្រាស់​ក្នុងគោលបំណងលុបបំបាត់ការក្លែងបន្លំឯកសារ ផ្តល់ភាពងាយស្រួលក្នុងការប្រើប្រាស់ និងផ្ទៀងផ្ទាត់ភាពត្រឹមត្រូវនៃឯកសារ ផ្តល់ទំនុកចិត្ត ចំណេញពេលវេលា និងកាត់បន្ថយចំណាយ​នានា ព្រមទាំងជំរុញការធ្វើបរិវត្តកម្មឌីជីថលស្របតាមឧត្តមានុវត្តជាអន្តរជាតិ។

ការផ្ទៀងផ្ទាត់ឯកសារនៅលើថ្នាល verify.gov.kh ធ្វើឡើងតាមរយៈការដាក់បញ្ចូល QR Code ស្តង់ដា ដោយប្រើបច្ចេកវិទ្យាប្លុកឆេន (Blockchain) ដែលមានសុវត្ថិភាពខ្ពស់នៅលើសន្លឹកនៃឯកសារនីមួយៗ។ ទន្ទឹមនឹងនេះ ការប្រើឯកសារដែលមានដាក់បញ្ចូល QR Code ស្តង់ដានេះ មិនតម្រូវឱ្យមានការធ្វើនីត្យានុកូលកម្ម​លើឯកសារថតចម្លងក្នុងទម្រង់ជាក្រដាសឡើយ។

គិតត្រឹមថ្ងៃទី ២២ ខែឧសភា ឆ្នាំ២០២៣ នេះ មានគ្រឹះស្ថានឧត្ដមសិក្សាសាធារណៈនិងឯកជនចំនួន ១២ ដែលបានចុះកិច្ចព្រមព្រៀងសហប្រតិបត្តិការ ហើយក៏នៅមានគ្រឹះស្ថានមួយចំនួនទៀតដែលនឹងឈានដល់ការចុះកិច្ចព្រមព្រៀងសហប្រតិបត្តិការក្នុងពេលឆាប់ៗខាងមុខនេះ៕