កម្ពុជាអាចនឹងមានភ្លៀងធ្លាក់ ផ្គរ រន្ទះ​ និងខ្យល់កន្ត្រាក់ពេញមួយសប្តាហ៍

ក្រសួងធនធានទឹក និងឧតុនិយម បានឲ្យដឹងថា ចាប់ពីថ្ងៃទី២៤ ដល់ថ្ងៃទី៣០ ខែឧសភានេះ ព្រះរាជាណាចក្រកម្ពុជា ទទួលឥទ្ធិពលពីតំបន់នៃជ្រលងសម្ពាធទាបពីភាគខាងលើប្រទេសថៃ ឡាវ និងវៀតណាម ជាមួយខ្យល់មូស្យុងនិរតីមធ្យម។

ស្ថានភាពបែបនេះធ្វើឲ្យតំបន់មួយចំនួននៅក្នុងប្រទេសកម្ពុជាមានដូជា តំបន់ទំនាបកណ្តាល មានសីតុណ្ហភាពអប្បបរមា​ពី២៥-២៧°C និងសីតុណ្ហភាពអតិបរមាមានពី៣៤-៣៦°C។​ តំបន់ខ្ពង់រាប មានសីតុណ្ហភាពអប្បបរមាពី ២៤-២៦°C និងសីតុណ្ហភាពអតិបរមាមានពី៣៣-៣៤°C។ តំបន់ទាំងពីរនេះ អាចមានភ្លៀងធ្លាក់ក្នុងកម្រិតពីតិចទៅបង្គួរ លាយឡំដោយផ្គរ រន្ទះ និងខ្យល់កន្ទ្រាក់។

ចំណែក តំបន់មាត់សមុទ្រ មានសីតុណ្ហភាពអប្បបរមាពី២៥-២៧°C និងសីតុណ្ហភាពអតិបរមាមានពី៣២-៣៤°C ហើយអាចមានភ្លៀងក្នុងកម្រិតពីមធ្យមទៅច្រើន លាយឡំដោយផ្គរ រន្ទះ និងខ្យល់កន្ត្រាក់។ នៅលើផ្ទៃសមុទ្រ ​អាចមានភ្លៀង ខ្យល់កន្ត្រាក់ និងរលកសមុទ្រ។

ក្រសួងធនធានទឹក និងឧតុនិយម បានអំពាវនាវ ដល់សាធារណជនឲ្យបង្កើនការប្រុងប្រយ័ត្នចំពោះបាតុភូតធម្មជាតិដែលអាចកើតមានឡើងជាយថាហេតុ៕